ନୂଆଦିଲ୍ଲୀ:ବଲିଉଡ ଗୀତରେ ରିଲ୍ସ କରି ବେଶ ଜଣାଶୁଣା ହୋଇପାରିଛନ୍ତି ତାଞ୍ଜାନିଆର ଇନଷ୍ଟାଗ୍ରାମ ତାରକା କିଲି ପୌଲ। ଏହି ଲୋକପ୍ରିୟତା ପାଇଁ ତାଙ୍କୁ ତାଞ୍ଜାନିଆରେ ସମ୍ମାନିତ କରିଛନ୍ତି ହାଇ କମିଶନ ଅଫ୍ ଇଣ୍ଡିଆ । ଗତ ସୋମବାର ତାଞ୍ଜାନିଆରେ ଭାରତୀୟ ହାଇ କମିଶନର ବିନୟ ପ୍ରଧାନ ଭାରତୀୟ ଦୂତାବାସ କାର୍ଯ୍ୟାଳୟ ପରିଦର୍ଶନର ଏକ ଫଟୋ ଟ୍ବିଟରରେ ସେୟାର କରିଛନ୍ତି। ଯେଉଁଥିରେ ସେ ଇନଷ୍ଟାଗ୍ରାମ ତାରକା କିଲି ପୌଲଙ୍କୁ ସମ୍ମାନିତ କରୁଥିବା ଦେଖିବାକୁ ମିଳିଛି।
ବିନୟ ପ୍ରଧାନ ଟ୍ବିଟରେ କିଲି ପୌଲଙ୍କ ସହ ଏକ ଫଟୋ ସେୟାର କରି ଲେଖିଛନ୍ତି ଯେ, ତାଞ୍ଜାନିଆର ଭାରତୀୟ ଦୂତାବାସ କାର୍ଯ୍ୟାଳୟରେ ଜଣେ ବିଶେଷ ଅତିଥି ପହଞ୍ଚିଛନ୍ତି। ତାଞ୍ଜାନିଆର ଅଧିବାସୀ କିଲି ପୌଲ ଇନଷ୍ଟାଗ୍ରାମରେ ବଲିଉଡ ଗୀତରେ ରିଲ୍ସ କରି ଅନେକ ଲୋକପ୍ରିୟତା ହାସଲ କରିଛନ୍ତି। ତାଙ୍କର ଏହି ରିଲ୍ସକୁ ଲକ୍ଷ ଲକ୍ଷ ଲୋକ ପସନ୍ଦ କରିବା ସହ ସେ ସଭିଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରି ପାରିଛନ୍ତି।