କଂଗ୍ରେସ ନେତାଙ୍କ ଲଟ୍‌କା-ଝଟ୍‌କା ମନ୍ତବ୍ୟ: ରାହୁଲଙ୍କୁ ଟାର୍ଗେଟ କଲେ ସ୍ମୃତି ଇରାନୀ

କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କ ବିରୁଦ୍ଧରେ କଂଗ୍ରେସ ନେତାଙ୍କ ଲଟ୍‌କା ଝଟ୍‌କା ମନ୍ତବ୍ୟ । ରାହୁଲ ଗାନ୍ଧୀଙ୍କୁ ଟାର୍ଗେଟ କଲେ ସ୍ମୃତି ଇରାନୀ । ଅଧିକ ପଢନ୍ତୁ

ଲକ୍ଷ୍ନୌ: ଉତ୍ତରପ୍ରଦେଶ କଂଗ୍ରେସ ନେତା ଅଜୟ ରାୟ କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କ ବିରୁଦ୍ଧରେ ଆପତ୍ତିଜନକ ମନ୍ତବ୍ୟ ଦେଇଛନ୍ତି । ସ୍ମୃତି ଇରାନୀ କେବଳ ଲଟ୍‌କା ଝଟ୍‌କା ଦେଖାଇବାକୁ ତାଙ୍କ ନିର୍ବାଚନ ମଣ୍ଡଳୀକୁ ଆସନ୍ତି ବୋଲି ସେ କହିଛନ୍ତି । ଯାହାର କଡା ଜବାବ ଦେଇଛନ୍ତି କେନ୍ଦ୍ରମନ୍ତ୍ରୀ ଇରାନୀ(UP Congress leader's 'latka-jhatka' comment) । କଂଗ୍ରେସ ନେତାଙ୍କ ବିବାଦୀୟ ମନ୍ତବ୍ୟକୁ ନେଇ ସେ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି । କେନ୍ଦ୍ରମନ୍ତ୍ରୀ ୨୦୨୪ରେ ଅମେଠୀରୁ ନିର୍ବାଚନ ଲଢିବାକୁ ରାହୁଲଙ୍କୁ ଆହ୍ବାନ ଦେଇଛନ୍ତି ।

ସ୍ମୃତି ଇରାନୀ ଟ୍ବିଟ୍ କରିଛନ୍ତି, "ରାହୁଲ ଗାନ୍ଧୀଜୀ ଆପଣ ନିଜର ଜଣେ ସ୍ଥାନୀୟ ନେତାଙ୍କ ଦ୍ବାରା ୨୦୨୪ରେ ଅମେଠୀରୁ ନିର୍ବାଚନ ଲଢିବା ପାଇଁ ଅଭଦ୍ର ଭାବେ ଘୋଷଣା କରିଥିବା ଶୁଣିବାକୁ ମିଳୁଛି । ଅମେଠୀରୁ ଲଢିବା ପକ୍କା ବୋଲି ମୁଁ ବୁଝିବି ତ ? ଆପଣ ଅନ୍ୟ କୌଣସି ଆସନରୁ ନିର୍ବାଚନ ଲଢିବା ପାଇଁ ପଳାୟନ କରିବେ ନାହିଁ ତ ? ଡରି ଯିବେନି ତ ? ଆପଣ ଓ ଆପଣଙ୍କ ମାଆ ମହିଳାଙ୍କ ପ୍ରତି ଅଶାଳୀନ ମନ୍ତବ୍ୟ ଦେଉଥିବା ମହିଳା ବିରୋଧି ଗୁଣ୍ଡାଙ୍କୁ ନୂଆ ଭାଷଣ ଲେଖକ(speechwriter) ଯୋଗାଇ ଦିଅନ୍ତୁ ।"

ପ୍ରକାଶଥାଉ କି, ସ୍ମୃତି ଇରାନୀ ଏବେ ଅମେଠୀରୁ ସାଂସଦ ଥିବାବେଳେ ଉତ୍ତରପ୍ରଦେଶ କଂଗ୍ରେସ ନେତା ଅଜୟ ରାୟ ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ, ''ଅମେଠୀରୁ ଅଧିକାଂଶ କଳକାରଖାନା ବନ୍ଦ ହେଲାଣି । ଜଗଦୀଶପୁର ଅଞ୍ଚଳରେ ଅଧାରୁ ଅଧିକ ଶିଳ୍ପ କାରଖାନା ବନ୍ଦ ହୋଇଯାଇଛି । ସ୍ମୃତି ଇରାନୀ ଏଠାକୁ କେବଳ ଲଟ୍‌କା ଝଟ୍‌କା ଦେଖାଇବାକୁ ଆସୁଛନ୍ତି ଓ ଚାଲି ଯାଉଛନ୍ତି । ଅମେଠୀରୁ ହେଉଛି କଂଗ୍ରେସର ଗଡ । ଏଠାରୁ ରାହୁଲ ଗାନ୍ଧୀ, ରାଜୀବ ଗାନ୍ଧୀ ଓ ସଂଜୟ ଗାନ୍ଧୀ ଲୋକସଭା ସାଂସଦ ଥିଲେ ।'' ୨୦୨୪ରେ ରାହୁଲ ଗାନ୍ଧୀ ଏହି ଆସନରୁ ଲଢିବେ କି ବୋଲି ସାମ୍ବାଦିକଙ୍କ ପ୍ରଶ୍ନରେ କଂଗ୍ରେସ ନେତା ଏପରି କହିଥିଲେ ।

ଅଜୟ ରାୟଙ୍କ ମନ୍ତବ୍ୟ ଉପରେ ବିଜେପି ତୀବ୍ର ପ୍ରତିକ୍ରିୟା ପ୍ରକାଶ କରିଛି । ଯେଉଁ ଦଳରୁ ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ହୋଇଥିଲେ ସେହି ଦଳର ନେତାଙ୍କ ଏପରି ମନ୍ତବ୍ୟ ଲଜ୍ଜାଜନକ ବୋଲି ବିଜେପି କହିଛି ।