ନୂଆଦିଲ୍ଲୀ:ଆଜି ଅନାସ୍ଥା ପ୍ରସ୍ତାବ ଚର୍ଚ୍ଚାରେ ଅଂଶଗ୍ରହଣ କରି ସଦସ୍ୟତା ଫେରିପାଇବା ପରେ ଗୃହକୁ ଫେରିଥିବା କଂଗ୍ରେସ ସାଂସଦ ରାହୁଲ ଗାନ୍ଧୀ ମଣିପୁର ହିଂସା ପ୍ରସଙ୍ଗରେ ସିଧା ପ୍ରଧାନମନ୍ତ୍ରୀ ଓ ଭାରତୀୟ ଜନତା ପାର୍ଟି ସରକାରକୁ ଜୋରଦାର ସମାଲୋଚନା କରିଛନ୍ତି । ଏହା ପରେ ରାହୁଲଙ୍କୁ ଟାର୍ଗେଟ କରିଛନ୍ତି ତାଙ୍କ ପାରମ୍ପରିକ ପ୍ରତିଦ୍ବନ୍ଦ୍ବୀ ତଥା କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ।
ଆଜି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଅଭିଯୋଗ କରିଛନ୍ତି ଯେ, କଂଗ୍ରେସ ସାଂସଦ ରାହୁଲ ଗାନ୍ଧୀ ଗୃହରେ ଅନାସ୍ଥା ପ୍ରସ୍ତାବରେ ବକ୍ତବ୍ୟ ରଖିବା ପରେ ସଂସଦରୁ ବାହାରକୁ ଯାଉଥିବାବେଳେ 'ଫ୍ଲାଇଂ କିସ୍' ଇଙ୍ଗୀତ କରିଥିଲେ । ସ୍ମୃତି କହିଥିଲେ, "ସଂସଦରେ ମହିଳା ସଦସ୍ୟମାନେ ମଧ୍ୟ ଅଛନ୍ତି । ଗୃହରେ ମହିଳାଙ୍କ ସମ୍ମାନ ପାଇଁ ଆଇନ ପ୍ରଣୟନ ହେଉଛି । କେବଳ ଜଣେ ମହିଳା ବିରୋଧୀ ପୁରୁଷ ହିଁ ଏପରି କାର୍ଯ୍ୟ କରିପାରେ । ଏହା ସଂସଦରେ କେବେ ହୋଇନଥିଲା ।"
ଭାରତୀୟ ଜନତା ପାର୍ଟି(ବିଜେପି)ର ମହିଳା ସାଂସଦମାନେ ରାହୁଲ ଗାନ୍ଧୀଙ୍କ ବିରୋଧରେ ଅଭିଯୋଗ କରି ଲୋକସଭା ବାଚସ୍ପତି ଓମ୍ ବିର୍ଲାଙ୍କ ନିକଟରେ ଦ୍ବାରସ୍ଥ ହୋଇଛନ୍ତି । ବିଜେପି ସାଂସଦ ଶୋଭା କରନ୍ଦଲାଜେ କହିଛନ୍ତି, ସଂସଦ ଇତିହାସରେ ଏପରି କେବେ ହୋଇନଥିଲା । ଏହା ସମସ୍ତ ମହିଳା ସଦସ୍ୟଙ୍କ ପ୍ରତି ଅପମାନ । ସେମାନେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଏସମ୍ପର୍କରେ ଅଭିଯୋଗ କରିଛନ୍ତି । ସଂସଦର ସିସିଟିଭି ଫୁଟେଜ୍ ଚେକ୍ କରି ରାହୁଲ ଗାନ୍ଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେମାନେ ଦାବି କରିଛନ୍ତି ।