ନୂଆଦିଲ୍ଲୀ:ଗତକାଲି(ମଙ୍ଗଳବାର) ଆଗତ ହୋଇଥିବା ମହିଳା ସଂରକ୍ଷଣ ବିଲକୁ ନେଇ ଆଜିଲୋକସଭାରେ ଜାରି ରହିଛି ଚର୍ଚ୍ଚା । ଶାସକ ଓ ବିରୋଧୀ ଆଜି ଏହି ଚର୍ଚ୍ଚାରେ ଅଂଶଗ୍ରହଣ କରି ମତ ରଖୁଛନ୍ତି । ପ୍ରମୁଖ ବିରୋଧୀ ଦଳ କଂଗ୍ରେସର ବରିଷ୍ଠ ନେତ୍ରୀ ତଥା ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଆଜି ଏହି ବିଲ୍ ଚର୍ଚ୍ଚାରେ ଅଂଶଗ୍ରହଣ କରି ଏହାକୁ ସମର୍ଥନ ଦେବା ସହ ଏହାକୁ ଶିଘ୍ର ଲାଗୁ କରିବା ଦାବି ଉଠାଇଥିଲେ । ହେଲେ ପରବର୍ତ୍ତୀ ସମୟରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଚର୍ଚ୍ଚାରେ ଅଂଶଗ୍ରହଣ କରି କଂଗ୍ରେସ ଓ ସୋନିଆ ଗାନ୍ଧୀଙ୍କୁ ଏହି ପ୍ରସଙ୍ଗରେ ଟାର୍ଗେଟ କରିଛନ୍ତି । କଂଗ୍ରେସ ଏହି ବିଲର ଶ୍ରେୟ ନେବାକୁ ପ୍ରୟାସ କରୁଛି । ବିଲ୍ ଆଗତ କରିବା ପାଇଁ ସରକାରଙ୍କୁ ଚିଠି ଲେଖିଥିବା କଥା କହୁଛି । ହେଲେ କଂଗ୍ରେସ ଏହି ଅଧିନିୟନର ଶେଷ ଟର୍ମରେ SC/ST ଙ୍କୁ ସଂରକ୍ଷଣ ନମିଳୁ ବୋଲି ଚାହୁଁଥିବା ଇରାନୀ ଅଭିଯୋଗ କରିଛନ୍ତି ।
ଇରାନୀ କହିଛନ୍ତି, କିଛି ଲୋକେ ଏହି ବିଲ୍ ସେମାନଙ୍କର ବୋଲି ଦାବି କରୁଛି । ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ ଏକ ଆର୍ଟିକିଲରେ ଉଲ୍ଲେଖ କରିଛନ୍ତି, ସଂରକ୍ଷଣର ତୃତୀୟ ସାଧାରଣ ନିର୍ବାଚନରେ ଏହି ଅଧିନିୟମରେ SC/ST ବର୍ଗକୁ କୌଣସି ସଂରକ୍ଷଣ ସୁବିଧା ରଖାଯିବ ନାହିଁ । ପୂର୍ବ ଦୁଇ ନିର୍ବାଚନରେ ଏହା କାର୍ଯ୍ୟକାରୀ ହେଲେ ସୁଦ୍ଧା ତୃତୀୟ ଥର ନିର୍ବାଚନରେ SC/ST ବର୍ଗକୁ ସଂରକ୍ଷଣ ଦେବା ବିରୋଧରେ କଂଗ୍ରେସ ପ୍ରସ୍ତାବ ରଖିଥିଲା । ହେଲେ ନରେନ୍ଦ୍ର ମୋଦି ନେତୃତ୍ବାଧୀନ ସରକାର ଏହି ବିଲ୍ ଆଗତ କରିଛନ୍ତି, ଯାହା କାର୍ଯ୍ୟକାରୀ ହେବାର ଆସନ୍ତା 15 ବର୍ଷ ପର୍ଯ୍ୟନ୍ତ ମହିଳାଙ୍କୁ 33 ପ୍ରତିଶତ ସଂରକ୍ଷଣ ଦେବ । ଏଥିରେ SC/ST ବର୍ଗ ମଧ୍ୟ ସାମିଲ ରହିବେ । ଏହା ବିଜେପି ସରକାରର ଏକ ଐତିହାସିକ ଉପଲବ୍ଧି ।