ଚଣ୍ଡିଗଡ଼:ପଞ୍ଜାବର ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଗତକାଲି(ଶନିବାର) ମୁଖ୍ୟମନ୍ତ୍ରୀ ପଦବୀରୁ ଇସ୍ତଫା ଦେଇଛନ୍ତି । ଏହାପରେ ରାଜ୍ୟ କଂଗ୍ରେସ ସଭାପତି ନବଜୋତ ସିଂ ସିଦ୍ଧୁ ଦଳର ଦାୟିତ୍ବରେ ଥିବା ହରିଶ ରାୱତ ଏବଂ ଦିଲ୍ଲୀରୁ ଏଠାକୁ ଆସିଥିବା ଦଳର ପର୍ଯ୍ୟବେକ୍ଷକଙ୍କୁ CLP ବୈଠକ ଡାକିବା ପାଇଁ ଲଗାତାର ଭାବେ ଚାପ ପକାଉଛନ୍ତି । କିନ୍ତୁ ନେତାମାନେ ଏହାକୁ ଅସ୍ବୀକାର କରୁଛନ୍ତି । ଏଣୁ ସିଦ୍ଧୁ ନିଜେ ପଞ୍ଜାବର ମୁଖ୍ୟମନ୍ତ୍ରୀ ହେବାକୁ ଚାହୁଁଥିବା ଚର୍ଚ୍ଚା ହେଉଛି ।
କ୍ୟାପଟେନ ଅମରିନ୍ଦର ସିଂ ଇସ୍ତଫା ଦେବା ପରେ ସିଦ୍ଧୁଙ୍କୁ ଆଦୌ ମୁଖ୍ୟମନ୍ତ୍ରୀ ହେବାକୁ ଦେବେ ନାହିଁ ବୋଲି ବୟାନ ଦେଇଛନ୍ତି । ତେଣୁ ଏଭଳି ପରିସ୍ଥିତିରେ ସିଦ୍ଧୁଙ୍କୁ ମୁଖ୍ୟମନ୍ତ୍ରୀ କରିବା କେନ୍ଦ୍ରୀୟ ନେତୃତ୍ବଙ୍କ ପାଇଁ ସହଜ ନୁହେଁ। ଦଳ ଅନ୍ୟ କିଛି ବିକଳ୍ପ ଉପରେ କାର୍ଯ୍ୟ କରୁଥିବା ଜଣାପଡ଼ିଛି । କାରଣ ଦଳର ହାଇକମାଣ୍ଡ ଜାଣିଛନ୍ତି ଯେ କ୍ୟାପଟେନଙ୍କ ଏହି ବୟାନ ପରେ ଯଦି ସିଦ୍ଧୁଙ୍କୁ ମୁଖ୍ୟମନ୍ତ୍ରୀ କରାଯାଏ, ତେବେ ଦଳରେ ବିଶୃଙ୍ଖଳା ସୃଷ୍ଟି ହେବା ସହିତ ଦଳର ଉନ୍ନତି ପରିବର୍ତ୍ତେ ପରିସ୍ଥିତି ଆହୁରି ଜଟିଳ ହେବ।