ବେଙ୍ଗାଲୁରୁ:କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ଓ କ୍ୟାବିନେଟ ମନ୍ତ୍ରୀ ଜମିର ଅହମ୍ମଦ ଖାନଙ୍କ ସହିତ ଏକ ବିଳାସପୂର୍ଣ୍ଣ ଚାଟାର୍ଡ ବିମାନରେ ଯାତ୍ରା କରିବା ଭିଡିଓ ଖୁବ ଭାଇରାଲ ହେଉଛି । ଏହାକୁ ନେଇ ବିଜେପି କଂଗ୍ରେସ ସରକାରକୁ ଟାର୍ଗେଟ କରିଛି । କଂଗ୍ରେସର ନେତା ମନ୍ତ୍ରୀମାନେ ଜନତାଙ୍କ ଟଙ୍କାରେ ବିଳାସମୟ ଜୀବନ ଜିଉଁଥିବା ବିଜେପି ଅଭିଯୋଗ ଆଣିବା ପରେ ଜବାବ ରଖିଛନ୍ତି ମୁଖ୍ୟମନ୍ତ୍ରୀ ସିଦ୍ଧରମୈୟା । ସେ ସିଧାସଳଖ ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କରିଛନ୍ତି । ମୋଦି ୬ ଆସନ ବିଶିଷ୍ଟ ବିମାନରେ ଏକାକୀ ଯାତ୍ରା କରନ୍ତି ବୋଲି କହିଛନ୍ତି ସିଦ୍ଧରମୈୟା ।
ଏହି ଦାମି ବିମାନ ସମ୍ପର୍କରେ ମୁହଁ ଖୋଲି ମୁଖ୍ୟମନ୍ତ୍ରୀ ସିଦ୍ଧରମୈୟା କହିଛନ୍ତି, "ବିଜେପି ନେତାମାନଙ୍କୁ ପ୍ରଶ୍ନ କରିବା ଦରକାର ପ୍ରଧାନମନ୍ତ୍ରୀ ମୋଦି କେଉଁଥିରେ ଯାତ୍ରା କରନ୍ତି ? ପ୍ରଧାନମନ୍ତ୍ରୀ ମୋଦି ୬ ଆସନ ବିଶିଷ୍ଟ ବିମାନରେ ଏକାକୀ ଯାତ୍ରା କରନ୍ତି ।" ବିଜେପି ଆଇଟି ସେଲ ମୁଖ୍ୟ ଅମିତ ମାଲବ୍ୟ ଏକ୍ସ ସାଇଟରେ ସିଦ୍ଧରମୈୟାଙ୍କ ଭିଡିଓକୁ ପୋଷ୍ଟ କରିଥିଲେ । ଏହାପରେ ଭିଡିଓଟି ଖୁବ ଭାଇରାଲ ହୋଇଥିଲା । ଅମିତ ଅଭିଯୋଗ କରି କହିଥିଲେ," କଂଗ୍ରେସ 'ଡୋନେଟ ଫର ଦେଶ' ଅଭିଯାନ ଆରମ୍ଭ କରି ଦେଶବାସୀଙ୍କୁ ଟଙ୍କା ମାଗୁଛି । ହେଲେ ଏପଟେ କଂଗ୍ରେସର ବରିଷ୍ଠ ନେତାମାନେ ଘରୋଇ ବିମାନରେ ଯାତ୍ରୀ କରୁଛନ୍ତି । ଏପରିକି ଇଣ୍ଡିଆ ମେଣ୍ଟ ସମୟରେ ନେତାମାନଙ୍କୁ ସିଙ୍ଗଡା ଭି ପରଷାଯାଉନାହିଁ । "