ମୁମ୍ବାଇ:ମହାରାଷ୍ଟ୍ର ରାଜନୀତିରେ ଲାଗି ରହିଥିବା ମହାସଙ୍କଟ ଟଳିବାର ନାଁ ନେଉନାହିଁ । ଶିବସେନା ନେତୃତ୍ବାଧୀନ ମହାବିକାଶ ଅଘାଡି ମେଣ୍ଟ (MVA) ସରକାରର ଭାଗ୍ୟ ସୁତାଖିଅରେ ଝୁଲୁଥିବାବେଳେ ଆଜି ନୂଆ ଦଳ ଗଠନ କରିବାକୁ ଘୋଷଣା କରିଛନ୍ତି ଏକନାଥ ସିନ୍ଧେଙ୍କ ନେତୃତ୍ବାଧୀନ ବିରୋଧୀ ବିଧାୟକଙ୍କ ଗୋଷ୍ଠୀ । ଏହି ଦଳର ନାମ ରଖାଯିବ ‘ଶିବସେନା ବାଲାସାହେବ ’। ଆଜି ଏନେଇ ସିନ୍ଧେଙ୍କ ଗୋଷ୍ଠୀ ପକ୍ଷରୁ ସ୍ପଷ୍ଟ କରାଯାଇଛି ।
ଆଜି ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ନେତୃତ୍ବରେ ଦଳର କାର୍ଯ୍ୟକାରିଣୀ ବୈଠକ ଜାରି ରହିଥିବାବେଳେ ବିଦ୍ରୋହୀ ଗୋଷ୍ଠୀ ଏହି ନିଷ୍ପତ୍ତିରେ ପହଞ୍ଚିଛନ୍ତି । ସିନ୍ଧେଙ୍କ ଶିବିରରେ ବର୍ତ୍ତମାନ ପ୍ରାୟ 40 ବିଧାୟକ ଥିବାବେଳେ ନୂଆ ଦଳ ଗଠନ କରିବା ପ୍ରକ୍ରିୟାରେ କୌଣସି ବାଧା ମଧ୍ୟ ନାହିଁ । ଦୁଇ ତୃତୀୟାଶଂ ବିଧାୟକ ସଂଖ୍ୟା ଥିବାରୁ ଦଳ ବଦଳ ନିୟମ ମଧ୍ୟ ଲାଗୁ ହେବ ନାହିଁ । ବିଦ୍ରୋହୀ ବିଧାୟକମାନେ ଏବେ ସୁଦ୍ଧା ମଧ୍ୟ ମୁମ୍ବାଇ ପ୍ରତ୍ୟାବର୍ତ୍ତନ କରିନାହାନ୍ତି । ବିଦ୍ରୋହୀ ବିଧାୟକଙ୍କ ସଂଖ୍ୟାକୁ ବାଦ ଦେଲେ ଶିବସେନା ନେତୃତ୍ୱାଧୀନ ମହା ବିକାଶ ଆଗାଡି (MVA) ସରକାରର ସ୍ଥାୟୀତ୍ବ ନେଇ ଅନିଶ୍ଚିତତା ଲାଗି ରହିଛି ।