ନୂଆଦିଲ୍ଲୀ: ସଂସଦ ଟିଭି (Sansad TV)ରେ ଆୟୋଜିତ ‘ଟକ ଶୋ’ ରେ ଅଂଶ ଗ୍ରହଣ କରିବେନାହିଁ ସାଂସଦ ତଥା ବରିଷ୍ଠ କଂଗ୍ରେସ ନେତା ଶଶୀ ଥରୁର । ବିଶୃଙ୍ଖଳିତ ଆଚରଣ ପାଇଁ ଅଧିବେଶନରୁ ନିଲମ୍ବିତ ହୋଇଥିବା12 ଜଣ ବିରୋଧୀ ସାଂସଦଙ୍କୁ ନୈତିକ ସମର୍ଥନ ଜଣାଇ ଥରୁର ଏହି ନିଷ୍ପତ୍ତି ନେଇଛନ୍ତି । ସେ ନିଜର ଇସ୍ତଫା ନେଇ ଏକ ପ୍ରେସ ବାର୍ତ୍ତା ମାଧ୍ୟମରେ ସୂଚନା ଦେଇଛନ୍ତି ।
ଗୃହର ଜଣେ ବରିଷ୍ଠ ସଦସ୍ୟ ଭାବେ ଶଶୀ ଥରୁର ସଂସଦ ଟିଭିରେ ଆୟୋଜିତ ଟକ ଶୋ ‘to the point’ ର ହୋଷ୍ଟିଂ କରିଆସୁଥିଲେ । ତେବେ ସେ ଏହି କାର୍ଯ୍ୟକ୍ରମରେ ଆଉ ଅଂଶ ଗ୍ରହଣ କରିବେ ନାହିଁ । ଶଶୀ କହିଛନ୍ତି ଭାରତୀୟ ଗଣତନ୍ତ୍ର ଭିନ୍ନମତକୁ ସମ୍ମାନ ଦେବାରେ ବିଶ୍ବାସ କରେ । କିନ୍ତୁ ବର୍ତ୍ତମାନ ସେଥିରେ ବ୍ୟତିକ୍ରମ ଦେଖାଯିବା ଆରମ୍ଭ ହେଲାଣି । ବିରୋଧୀ ସାଂସଦଙ୍କ ନିଲମ୍ବନକୁ ଅଗଣତାନ୍ତ୍ରିକ ତଥା ମନମୁଖୀ ବୋଲି ଦର୍ଶାଇ ଥରୁର ଆହୁରି ମଧ୍ୟ କହିଛନ୍ତି ଯେ, ଏହି ନିଲମ୍ବନ ନିଷ୍ପତ୍ତି ସଂସଦୀୟ ପରମ୍ପରା ପ୍ରତି ବଡ ପ୍ରଶ୍ନବାଚୀ ସୃଷ୍ଟି କରିଛି ।
ବର୍ତ୍ତମାନ ସମୟରେ ସଂସଦୀୟ ଅନୁଷ୍ଠାନ ଗୁଡିକ ଅଗଣତାନ୍ତ୍ରିକ ଢଙ୍ଗରେ ପରିଚାଳିତ ହେବା ପରି ଅନୁଭବ ହେଉଛି । ତେବେ ସାଂସଦମାନଙ୍କ ନିଲମ୍ବନକୁ ଅନୈତିକ ତଥା ଅଗଣତାନ୍ତ୍ରିକ ନିଷ୍ପତ୍ତି ବୋଲି ଦର୍ଶାଇବା ସହ ନିଲମ୍ବିତ ସାଂସଦମାନଙ୍କୁ ସମର୍ଥନ ଜଣାଇ ସେ ଏହି ହୋଷ୍ଟ ପଦରୁ ଇସ୍ତଫା ଦେଉଥିବା ସ୍ପଷ୍ଟ କରିଛନ୍ତି ।