ହାଇଦ୍ରାବାଦ: ଇସ୍ରାଏଲ ଉପରେ ‘ହମାସ’ ଆତଙ୍କବାଦୀ ସଂଗଠନ କରିଥିବା ଆକ୍ରମଣ ପରି ଭାରତରେ ମଧ୍ୟ ଆକ୍ରମଣ କରିବା ପାଇଁ ଧମକ ଦେଲା ମୋଷ୍ଟଓ୍ବାଣ୍ଟେଡ ଖଲିସ୍ତାନୀ ଆତଙ୍କବାଦୀ ଗୁରୁପନ୍ତଓ୍ବନ୍ତ ସିଂ ପନ୍ନୁନ । ଭାରତରେ ଆତଙ୍କବାଦୀ ସଂଗଠନ ଘୋଷିତ ହୋଇଥିବା ଶିଖ୍ ଫର ଜଷ୍ଟିସ (SFJ)ର ମୁଖ୍ୟ ହେଉଛି ପନ୍ନୁନ । ସେ ଏବେ କାନାଡ଼ାରେ ରହି ଏହି ଖଲିସ୍ତାନୀ ଆନ୍ଦୋଳନର ନେତୃତ୍ବ ନେଉଛି । ଭାରତରେ ଅସ୍ଥିରତା ସୃଷ୍ଟି କରିବା ସହ ଖଲିସ୍ତାନୀ ଆନ୍ଦୋଳନକୁ ଜାରି ରଖିବା ପାଇଁ ତାର ନେତୃତ୍ବରେ ଏହି ଆତଙ୍କୀ ସଂଗଠନ କାର୍ଯ୍ୟ ଜାରି ରଖିଛି । ତେବେ ଇସ୍ରାଏଲ ଉପରେ ‘ହମାସ’ ଆତଙ୍କୀ ଗୋଷ୍ଠୀ ଆକ୍ରମଣ କରିବା ପରେ ପନ୍ନୁନର ଏକ ଭିଡିଓ ବାର୍ତ୍ତା ସୋସିଆଲ ମିଡିଆରେ ସାମ୍ନାକୁ ଆସିଛି । ଯେଉଁଥିରେ ସେ ଭାରତ ଓ ପ୍ରଧାନମନ୍ତ୍ରୀ ମୋଦିଙ୍କ ନାମ ନେଇ ଏପରି ଆକ୍ରମଣ କରିବା ପାଇଁ ଧମକ ଦେଉଛି ।
ସୋସିଆଲ ମିଡିଆରେ ଘୁରି ବୁଲୁଥିବା ଭିଡିଓରେ ଆତଙ୍କୀ ପନ୍ନୁନ କହୁଛି, ‘‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇସ୍ରାଏଲ-ପାଲେଷ୍ଟାଇନ ବିବାଦରୁ ଶିକ୍ଷା ଲାଭ କରିବା ଉଚିତ୍ । ଦଖଲ ଅଧୀନରେ ଥିବା ପଞ୍ଜାବରୁ ପାଲେଷ୍ଟାଇନ ପର୍ଯ୍ୟନ୍ତ ଲୋକେ ଏହାର ଜବାବ ଦେବେ । ଯଦି ଭାରତ ପଞ୍ଜାବକୁ ଦଖଲକୁ ନେବାକୁ ଚାହେଁ, ତେବେ ଏହିପରି ପ୍ରତିକ୍ରିୟା ସୃଷ୍ଟି ହେବ । ହିଂସା ସୃଷ୍ଟି ହେବ । ଏଥିପାଇଁ ପ୍ରଧାନମନ୍ତ୍ରୀ ମୋଦି ଓ ଭାରତ ଉତ୍ତରଦାୟୀ ରହିବେ । SFJ ବାଲାଟରେ ବିଶ୍ବାସ କରେ, ଭୋଟରେ ବିଶ୍ବାସ କରେ । ପଞ୍ଜାବର ମୁକ୍ତି ନିଶ୍ଚିତ । ବାଲାଟ ନା ବୁଲେଟ, ତାହା ଭାରତ ଏବେ ସ୍ଥିର କରୁ ।’’
ଭାରତରୁ ପଳାୟନ କରି କନାଡ଼ାରେ ଖଲିସ୍ତାନୀ ଆନ୍ଦୋଳନ ଓ ଭାରତ ବିରୋଧୀ କାର୍ଯ୍ୟକଳାପ ଜାରି ରଖିଥିବା ଏହି ଆତଙ୍କୀ 2019 ପରଠାରୁ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ସ୍କାନରରେ ରହିଛି । SFJ ମାଧ୍ୟମରେ ପାଣ୍ଠି ଯୋଗାଡ କରି ଖଲିସ୍ତାନୀ ଆନ୍ଦୋଳନକୁ ବଜାୟ ରଖିବା ଓ ଭାରତର ଅଖଣ୍ଡତା ପ୍ରତି ବିପଦ ସୃଷ୍ଟି କରିବା ଏହି ସଂଗଠନର ଉଦ୍ଦେଶ୍ୟ । ତେବେ କାନାଡ଼ା ସରକାର ଖଲିସ୍ତାନୀ ଆତଙ୍କୀଙ୍କ ପୃଷ୍ଠପୋଷକତା କରୁଥିବାରୁ ଏକାଧିକ ଖଲିସ୍ତାନୀ ଆତଙ୍କବାଦୀ ଏବେ ସେଠାରେ ଆତ୍ମଗୋପନ କରି ଭାରତ ବିରୋଧୀ କାର୍ଯ୍ୟକଳାପ ଜାରି ରଖିଛନ୍ତି । ନିକଟରେ ଅନ୍ୟତମ ଖଲିସ୍ତାନୀ ଆତଙ୍କୀ ହରଦ୍ବୀପ ସିଂ ନିଜ୍ଜାରର ହତ୍ୟାରେ ଭାରତର ଭୂମିକା ଥିବା କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଅଭିଯୋଗ କରିବା ପରେ ଉଭୟ ଦେଶ ମଧ୍ୟରେ ବିବାଦ ଜାରି ରହିଛି । କାନାଡ଼ା ସରକାରଙ୍କ ସମର୍ଥନ ପାଇବା ପରେ ଏବେ ଖଲିସ୍ତାନୀ ଆତଙ୍କୀ ସଂଗଠନ ପୁଣି ସକ୍ରିୟ ହୋଇଉଠିଛି ।