ଗାନ୍ଧୀନଗର:ଗୁଜୁରାଟରେ ବଡ ଅଘଟଣ । କାନ୍ଥ ଭୁଶୁଡି 12 ଜଣ ଶ୍ରମିକ ମୃତ । ଆଜି(ବୁଧବାର) ଗୁଜୁରାଟ ମୋରବି ଜିଲ୍ଲାର ହଲବଦ( Halvad morbi)ରେ ଏହି ଅଘଟଣ ଘଟିଯାଇଛି । ମିଳିଥିବା ସୂଚନା ଅନୁସାରେ, ଆଜି ହଲବଦ ଜିଆଇଡିସି(Halvad GIDC)ରେ ଥିବା ଏକ ଲୁଣ ଫ୍ୟାକ୍ଟ୍ରିର କାନ୍ଥ ହଠାତ୍ ଭୁଶୁଡି ପଡିଛି । ଫଳରେ ଏଠାରେ କାମ କରୁଥିବା 30 ଜଣ ଶ୍ରମିକ କାନ୍ଥ ତଳେ ଚାପି ହୋଇରହିଛନ୍ତି । ଏବେସୁଦ୍ଧା 12 ଜଣଙ୍କ ମୃତଦେହ ଉଦ୍ଧାର କରାଯାଇଛି । ଆଗକୁ ମୃତ୍ୟୁସଂଖ୍ୟା ବଢିବା ନେଇ ଆଶଙ୍କା ରହିଛି ।
ସୂଚନା ଅନୁସାରେ, ଆଜି ମଧ୍ୟାହ୍ନ ସମୟରେ ହଲବଦ ଜିଆଇଡିସି ଅଞ୍ଚଳରେ ଥିବା ସାଗର ସଲ୍ଟ ନାମକ ଫ୍ୟାକ୍ଟ୍ରିର କାନ୍ଥ ଭୁଶୁଡି ପଡିଛି । ଭଙ୍ଗା କାନ୍ଥ ତଳୁ ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଏକ ଜେସିବି ମେସିନ ନିୟୋଜିତ କରାଯାଇଛି । କୁହାଯାଉଛି ଯେ, ଭୁଶୁଡିଥିବା କାନ୍ଥ ନିକଟରେ ଅନେକ ଲୁଣ ବସ୍ତା ରଖାଯାଇଥିଲା । ବସ୍ତାଗୁଡିକର ଭାର ଅଧିକ ଥିବାରୁ କାନ୍ଥଟି ଭୁଶୁଡି ପଡିଛି । କାନ୍ଥ ଭୁଶୁଡିବା ପରେ ସେଠାରେ ପ୍ୟାକେଜିଂ କରୁଥିବା ଶ୍ରମିକମାନଙ୍କ ଉପରେ ପଡିଥିଲା । ତେବେ ମଧ୍ୟାହ୍ନ ଭୋଜନ ସମୟ ହୋଇଥିବାରୁ ଅନେକ ଶ୍ରମିକ ଖାଇବା ପାଇଁ ଯାଇଥିଲେ । ନଚେତ୍ ଆହୁରି ଅନେକ ଶ୍ରମିକଙ୍କ ମୃତ୍ୟୁ ହୋଇଥାନ୍ତା ।