ଲକ୍ଷ୍ନୌ:ଉତ୍ତରପ୍ରଦେଶ ଆଗ୍ରା ଜିଲ୍ଲା ଶାହାଗଞ୍ଜରେ ଭାଙ୍ଗିଲା ଘରର ବାଲକୋନି । ଏହି ବାଲକୋନିରେ ଛିଡ଼ା ହୋଇଥିବା 7 ଜଣ ମହିଳା ତଳେ ପଡ଼ି ଯାଇଥିବା ବେଳେ ତାଙ୍କ ଉପରେ ପଡ଼ିଥିଲା ଭଗ୍ନାବଶେଷ । ଆହତ ମହିଳାଙ୍କୁ ସଙ୍ଗେ ସଙ୍ଗେ ସ୍ଥାନୀୟ ଲୋକେ ହସ୍ପିଟାଲରେ ଭର୍ତ୍ତି କରାଯାଇଛି । 24 ଘଣ୍ଟା ମଧ୍ୟରେ ଉକ୍ତ ଅଞ୍ଚଳରେ ଏହା ଦ୍ବିତୀୟ ଘଟଣା ବୋଲି କୁହାଯାଉଛି । ପୂର୍ବରୁ ଗତକାଲି (ଶନିବାର ) ମଧ୍ୟ ଏଭଳି ଏକ ଘଟଣା ଦେଖିବାକୁ ମିଳିଥିଲା ।
ଶାହାଗଞ୍ଜ ପୃଥ୍ବୀନାଥ ମନ୍ଦିର ନିକଟ ଜୋଗିପଡ଼ାଠାରେ ଥିବା ଏକ ଘରର ବାଲକୋନି ଭାଙ୍ଗି ପଡ଼ିଥିଲା । ଏହି ଘଟଣାରେ ଆହତ ହୋଇଥିବା ମହିଳା ପୁଷ୍ପାଞ୍ଜଳି କହିଛନ୍ତି ଯେ ସେ ନିଜ ସମ୍ପର୍କୀୟ ପିଙ୍କି ଘରକୁ ଆସିଥିଲେ । ପିଙ୍କିଙ୍କ ଶାଶୁ ପ୍ରେମବତୀଙ୍କ ମୃତ୍ୟୁ ଘଟିଥିବାରୁ ସେମାନେ ଆସିଥିଲେ । ଶୋକ ସନ୍ତପ୍ତ ପରିବାରକୁ ସମ୍ବେଦନା ଜଣାଇବା ଲାଗି ଲୋକେ ଆସିଥିବା ବେଳେ ଏହି ଅଘଟଣ ଘଟିଛି । ହଠାତ୍ ବାଲକୋନି ଭାଙ୍ଗିପଡ଼ିବା ପରେ ସ୍ଥାନୀୟ ଅଞ୍ଚଳ ଚିତ୍କାରରେ ଫାଟି ପଡ଼ିଥିଲା । ଘଟଣା ସମ୍ପର୍କରେ ପୋଲିସ ଖବର ପାଇବା ପରେ ସେଠାରେ ପହଞ୍ଚି ଆହତଙ୍କୁ ହସ୍ପିଟାଲରେ ପହଞ୍ଚାଇଥିବା ବେଳେ ଘର ଖାଲିଥିଲା । ସୁରକ୍ଷା ଦୃଷ୍ଟିରୁ ସେହି ଅଞ୍ଚଳରେ ଏବେ ଯାତାୟାତ ମଧ୍ୟ ବନ୍ଦ କରାଯାଇଛି ।