ଭୋପାଳ:ମଧ୍ୟପ୍ରଦେଶ ସାଗର ଜିଲ୍ଲା ସାନୋଧା ଥାନା ଅଞ୍ଚଳରେ ଏକ ଭୟାନକ ସଡକ ଦୁର୍ଘଟଣା ଘଟିଛି । ଗୋଟିଏ କାରକୁ ଟ୍ରକ ଧକ୍କା ଦେବା ଫଳରେ 6 ଜଣଙ୍କର ମୃତ୍ୟୁ ହୋଇଛି । ଜଣେ ଆହତଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ଟ୍ରକ ଡ୍ରାଇଭର ଜଣଙ୍କୁ ଚିହ୍ନଟ କରାଯାଇଛି । ପୋଲିସ ଘଟଣାର ତଦନ୍ତ ଆରମ୍ଭ କିରଛି ।
ଦୁର୍ଘଟଣା ଏତେ ଭୟଙ୍କର ଯେ କାରଟି ଭାଙ୍ଗି ଚୁରମାର ହୋଇଛି । କେଉଁ ପରିସ୍ଥିତିରେ ଦୁର୍ଘଟଣା ଘଟିଲା ସେ ନେଇ ମଧ୍ୟ ସଠିକ ଖବର ମିଳି ପାରିନାହିଁ । ଦ୍ରୁତ ଗତିରେ ଆସୁଥିବା ଟ୍ରକଟି କାରଟିକୁ ଧକ୍କା ଦେଇଥିଲା । ଭାରସାମ୍ୟ ହରାଇ ଟ୍ରକଟି ଦୁର୍ଘଟଣା ଘଟାଇଥିବା ଅନୁମାନ କରାଯାଉଛି । କାରରେ 7 ଜଣ ଲୋକ ଥିଲେ । ଘଟଣାସ୍ଥଳରେ 4 ଜଣଙ୍କର ମୃତ୍ୟୁ ହୋଇଥିଲା । ପରେ ଆଉ 2 ଜଣଙ୍କୁ ଡାକ୍ତରଖାନାରେ ମୃତ ଘୋଷଣା କରାଯାଇଥିଲା । ଜଣେ ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଟ୍ରକ ଡ୍ରାଇଭରକୁ ଚିହ୍ନଟ କରାଯାଇଛି । ତାକୁ ଖୁବଶୀଘ୍ର ଗିରଫ କରାଯିବ ବୋଲି ସାଗର ଏସପି ଅଭିଷେତ ତିୱାରୀ କହିଛନ୍ତି ।
ପୋଲିସର ସୂଚନା ଅନୁସାରେ, '' କାରଟି ସାଗରରୁ ଗଦ୍ଧାକୋଟା ଅଭିମୁଖେ ଯାଉଥିଲା । ସେହି ସମୟରେ ଗଦ୍ଧାକୋଟାକୁ ସାଗର ଅଭିମୁଖେ ଆସୁଥିବା ଟ୍ରକ କାରଟିକୁ ଧକ୍କା ଦେଇଥିଲା । ଏହା ପରେ ଟ୍ରକଟି ଏକ ଗଛରେ ପିଟି ହୋଇଥିଲା । ଦୁର୍ଘଟଣା ଖବର ପାଇ ସାଗର ପୋଲିସ ଘଟଣାସ୍ଥଳରେ ପହଞ୍ଚିଥିଲେ ।''