ନୂଆଦିଲ୍ଲୀ:ରାମ ନବମୀ ପର ଠାରୁ ଦେଶର ବିଭିନ୍ନ ସ୍ଥାନରେ କ୍ରମାଗତ ଦେଖିବାକୁ ମିଳୁଛି ସାମ୍ପ୍ରଦାୟିକ ଦଙ୍ଗା । ତେବେ ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ପ୍ରମୁଖ ବିରୋଧୀ ଦଳର ଶୀର୍ଷ ନେତାମାନେ । ଏକ ମିଳିତ ଷ୍ଟେଟମେଣ୍ଟ ଜାରି କରି ଦେଶରେ ଶାନ୍ତି ଏବଂ ସୌହାର୍ଦ୍ଦ୍ୟ ରକ୍ଷା ପାଇଁ ଏହି ନେତାମାନେ ମିଳିତ ନିବେଦନ ମଧ୍ୟ କରିଛନ୍ତି ।
କଂଗ୍ରେସ ମୁଖ୍ୟ ସୋନିଆ ଗାନ୍ଧୀ, ଏନସିପି ମୁଖ୍ୟ ଶରଦ ପାୱାର, ଟିଏମସି ମୁଖ୍ୟ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ, ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ଆରଜେଡି ନେତା ତେଜସ୍ୱୀ ଯାଦବଙ୍କ ସମେତ ବିରୋଧୀ ଦଳର ଏକାଧିକ ନେତାମାନେ ଶାନ୍ତି ଏବଂ ସୌହାର୍ଦ୍ଦ୍ୟ ରକ୍ଷା ପାଇଁ ମିଳିତ ନିବେଦନ କରିଛନ୍ତି । ସେହିପରି ବର୍ତ୍ତମାନ ଜାରି ରହିଥିବା ହିଂସାକୁ ମଧ୍ୟ ଏହି ନେତାମାନେ ନିନ୍ଦା କରିବା ସହ ସାମ୍ପ୍ରଦାୟିକ ହିଂସାରେ ସାମିଲ ଅପରାଧୀଙ୍କୁ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି ।