ଦେଶବ୍ୟାପୀ ଇଣ୍ଡିଗୋ ବିମାନ ବିଳମ୍ବ, ସ୍ପଷ୍ଟୀକରଣ ମାଗିଲା DCGA

ଶନିବାର ଦେଶର ବିଭିନ୍ନ ସ୍ଥାନରେ ଇଣ୍ଡିଗୋ ବିମାନର ଉଡାଣ ବିଳମ୍ବ ହୋଇଥିଲା । ପର୍ଯ୍ୟାପ୍ତ ପରିମାଣର କ୍ରୁ ସଦସ୍ୟଙ୍କ ଅଭାବ ଯୋଗୁଁ ଇଣ୍ଡିଗୋର ମାତ୍ର 45 ପ୍ରତିଶତ ବିମାନର ଉଡ଼ାଣ ନିର୍ଦ୍ଧାରିତ ସମୟରେ ହୋଇଥିଲା। ଅଧିକ ପଢ଼ନ୍ତୁ

ନୂଆଦିଲ୍ଲୀ: ଶନିବାର ଦେଶର ବିଭିନ୍ନ ସ୍ଥାନରେ ଇଣ୍ଡିଗୋ ବିମାନର ଉଡାଣ ବିଳମ୍ବ ହୋଇଥିଲା । ପର୍ଯ୍ୟାପ୍ତ ପରିମାଣର କ୍ରୁ ସଦସ୍ୟଙ୍କ ଅଭାବ ଯୋଗୁଁ ଇଣ୍ଡିଗୋର ମାତ୍ର 45 ପ୍ରତିଶତ ବିମାନର ଉଡ଼ାଣ ନିର୍ଦ୍ଧାରିତ ସମୟରେ ହୋଇଥିଲା । ଏହାର କାରଣ ନେଇ ବିମାନ ଚଳାଚଳ କ୍ଷେତ୍ରର ନିୟମ ସଂସ୍ଥା ଡିସିଜିଏ କମ୍ପାନୀକୁ ସ୍ପଷ୍ଟୀକରଣ ମାଗିଛି ।

ସୂତ୍ରରୁ ପ୍ରକାଶ ଯେ, ଶନିବାର ଟାଟା ଅଧିଗ୍ରହଣ ଏୟାର ଇଣ୍ଡିଆ କ୍ରୁ ସଦସ୍ୟ ନିଯୁକ୍ତି ପାଇଁ ଦ୍ବିତୀୟ ପର୍ଯ୍ୟାୟ ସାକ୍ଷାତକାର ଥିଲା । ସେଥିରେ ଅଂଶଗ୍ରହଣ କରିବା ଲାଗି ଇଣ୍ଡିଗୋର ଏକାଧିକ କ୍ରୁ ସଦସ୍ୟ ଅସୁସ୍ଥତା କାରଣ ଦର୍ଶାଇ ଛୁଟିରେ ରହିଥିଲେ । ଫଳରେ ଉଡ଼ାଣ ବିଳମ୍ବ ହୋଇଥିଲା । ଅନ୍ୟପଟେ ଏହି ଘଟଣାର ଯାଞ୍ଚ କରାଯାଉଥିବା ନେଇ ରବିବାର ଡିସିଜିଆଇ ମୁଖ୍ୟ କହିଛନ୍ତି । ଇଣ୍ଡିଗୋ ହେଉଛି ଦେଶର ବୃହତ୍ତମ ବିମାନ କମ୍ପାନୀ। ପ୍ରତିଦିନ ଦେଶ ଭିତରେ ଓ ଦେଶ ବାହାରେ 1600ରୁ ଉର୍ଦ୍ଧ୍ବ ବିମାନ ଚଳାଚଳ କରିଥାଏ ।

ଡିସିଜିଆଇ ୱେବସାଇଟ ଅନୁଯାୟୀ ଶନିବାର ଦିନ ଏୟାର ଇଣ୍ଡିଆର 77.1%, ସ୍ପାଇସଜେଟର 80.4 %, ଭିସ୍ତାରାର 86.3%, ଗୋ ଫାଷ୍ଟର 88% ଓ ଏୟାର ଏସିୟାର 92.3% ଏବଂ ଇଣ୍ଡିଗୋର ମାତ୍ର 45.2% ବିମାନ ଠିକ ସମୟରେ ଉଡ଼ାଣ ଆରମ୍ଭ କରିଥିଲା।