ଭୋପାଳ:ମଧ୍ୟପ୍ରଦେଶରେ ମର୍ମନ୍ତୁଦ ସଡକ ଦୁର୍ଘଟଣା । ମଧ୍ୟ ପ୍ରଦେଶର ବେତୁଲ ଜିଲ୍ଲାର ଝାଲାର ଠାରେ ବସ୍-କାର ମୁହାଁମୁହିଁ ଧକ୍କା । ଯାତ୍ରୀବାହୀ ବସ୍ ସହ କାରର ମୁହାଁମୁହିଁ ଧକ୍କା ହେବାରୁ ୧୧ଜଣ ଯାତ୍ରୀଙ୍କର ମୃତ୍ୟୁ ହୋଇଥିବାବେଳେ କିଛି ଯାତ୍ରୀ ଆହକ ହୋଇଥିବା ନେଇ ସୂଚନା ରହିଛି । ମୃତକଙ୍କ ମଧ୍ୟରେ ଦୁଇ ଜଣ ଶିଶୁ ରହିଥିଲେ । ଏନେଇ ସୂଚନା ଦେଇଛନ୍ତି ବେତୁଲ ଏସପି ସିମାଲା ପ୍ରସାଦ । ବିଳମ୍ବିତ ରାତି ପ୍ରାୟ ୨ଟାରେ ଏହି ଦୁର୍ଘଟଣା ହୋଇଥିବା ନେଇ ସୂଚନା ରହିଛି ।
ଏହା ମଧ୍ୟ ପଢନ୍ତୁ: ମଧ୍ୟପ୍ରଦେଶରେ ବସ୍-କାର ମୁହାଁମୁହିଁ ଧକ୍କା, ୧୧ ମୃତ
ଜିଲ୍ଲା ମୁଖ୍ୟାଳୟଠାରୁ ପ୍ରାୟ 36 କିଲୋମିଟର ଦୂରରେ ଥିବା ଭେଇନସଦେହି ଠାରେ ଏହି ଦୁର୍ଘଟଣା ଘଟିଛି ବୋଲି ବେତୁଲ ପୋଲିସ ନିୟନ୍ତ୍ରଣ କକ୍ଷର ସହକାରୀ ସବ୍ ଇନ୍ସପେକ୍ଟର ଶିବରାଜ ସିଂ ଠାକୁର କହିଛନ୍ତି । ମୃତକମାନଙ୍କ ମଧ୍ୟରେ ୬ଜଣ ପୁରୁଷ, ୩ଜଣ ମହିଳା, ଜଣେ ୫ ବର୍ଷର ନାବାଳିକା ସହ ଜଣେ ଶିଶୁ ରହିଛନ୍ତି ।ପୋଲିସର କହିବା ଅନୁସାରେ, ମୃତକମାନେ ସମସ୍ତେ ଶ୍ରମିକ ହୋଇଥିବାବେଳେ ସେମାନେ ମହାରାଷ୍ଟ୍ରର ଅମରାବତୀରୁ ଘରକୁ ଫେରୁଥିଲେ । ଗ୍ୟାସ୍ କଟର୍ ଯୋଗେ କାର୍ଟିକୁ କାଟିବା ପରେ ମୃତଦେହ ଗୁଡିକୁ ଉଦ୍ଧାର କରାଯାଇଥିଲା ।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଡ୍ରାଇଭରଙ୍କ ଆଖି ଲାଗିଯିବାରୁ କାର୍ଟି ବିପରୀତ ଦିଗରୁ ଆସୁଥିବା ଖାଲି ବସ୍ ସହିତ ଧକ୍କା ହୋଇଥିଲା । ତେବେ ପୋଲିସ ମୃତଦେହଗୁଡିକୁ ଉଦ୍ଧାରକରି ହସ୍ପିଟାକୁ ପଠାଇବା ସହ ନିଜଆଡୁ ଏକ ମାମଲା ରୁଜୁକରି ତଦନ୍ତ ଆରମ୍ଭ କରିଛି । ଏହି ଦୁର୍ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଭୀର ଶୋକବ୍ୟକ୍ତ କରିବା ସହ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି । ମୃତକଙ୍କ ପରିବାରୁ PMNRF ପାଣ୍ଠିରୁ ୨ଲକ୍ଷ ଓ ଆହତଙ୍କ ପରିବାରକୁ ୫୦ ହଜାର ଟଙ୍କା ଦିଆଯିବା ନେଇ ମୋଦି ଟ୍ବିଟ ଯୋଗେ ସୂଚନା ଦେଇଛନ୍ତି ।
