ଡେରାଡୁନ:ଗୋଟିଏ ପଟେ ଉତ୍ତରାଖଣ୍ଡର ଉତ୍ତରକାଶୀରେ ଟନେଲ ଭିତରେ ଦୀର୍ଘ ୬ ଦିନ ଧରି ଫସି ରହିଥିବା ବେଳେ ଏପଟେ ନୈନିତାଲରେ ଘଟିଛି ଦୁର୍ଘଟଣା । ନୈନିତାଲ ଜିଲ୍ଲାର ଛିଡାଖାନ-ରିଠା ସାହିବ ରାସ୍ତାରେ ଖାଇକୁ ଜିପ୍ ଖସିବା ଯୋଗୁଁ ଘଟିଥିଲା ଦୁର୍ଘଟଣା । ଏହି ଅଘଟଣରେ ଆହତ ଥିବା ୨ ଜଣଙ୍କ ମଧ୍ୟରୁ ଜଣଙ୍କ ମୃତ୍ୟୁ ଘଟିଛି । ଫଳରେ ଦୁର୍ଘଟଣାରେ ମୃତକଙ୍କ ସଂଖ୍ୟା ବୃଦ୍ଧି ପାଇଛି । ଆଉ ଜଣଙ୍କ ମୃତ୍ୟୁ ପରେ ଏବେ ମୃତକଙ୍କ ସଂଖ୍ୟା ୯ରେ ପହଞ୍ଚିଛି । ଯାତ୍ରୀଙ୍କର ଅକାଳ ବିୟୋଗ ପରେ ଏକ୍ସ ସାଇଟ୍ରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଦୁଃଖ ପ୍ରକାଶ କରିବା ସହ ଶୋକସନ୍ତପ ପରିବାରକୁ ଶାନ୍ତ୍ବନା ଜଣାଇଛନ୍ତି ।
ଆଜି (ଶୁକ୍ରବାର) ସକାଳ ୮ଟା ସମୟରେ ଜିପ୍ଟି ଯାତ୍ରୀଙ୍କୁ ନେଇ ହଲଦ୍ବାନୀ ଅଭିମୁଖେ ଯାତ୍ରା କରୁଥିଲା । ଛିଡ଼ାଖାନ-ରିଠା ସାହିବ ରାସ୍ତା ନିକଟରେ ସନ୍ତୁଳନ ହରାଇଥିଲା ଡ୍ରାଇଭର । ଫଳରେ ଜିପ୍ଟି ୫୦୦ ମିଟର ଖାଇକୁ ଖସି ପଡ଼ିଥିଲା । ଖାଇକୁ ଜିପ୍ ଖସିବା ପରେ ସେଥିରେ ଯାତ୍ରା କରୁଥିବା ଯାତ୍ରୀମାନେ ଚିତ୍କାର କରିଥିଲେ । ଏହାପରେ ଦୁର୍ଘଟଣାସ୍ଥଳରେ ପହଞ୍ଚିଥିଲେ ସ୍ଥାନୀୟ ଲୋକେ । ଏହାପରେ ସ୍ଥାନୀୟ ବାସୀ ଏହି ଦୁର୍ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ । ଏହାପରେ ଉକ୍ତ ଅଞ୍ଚଳରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିବା ବେଳେ ଏଥିରେ ଲାଗି ପଡ଼ିଥିଲେ ସ୍ଥାନୀୟ ଲୋକେ ।
ଏହା ବି ପଢନ୍ତୁ- ସମ୍ପର୍କୀୟଙ୍କ ସହ କଥା ହେଲେ ଟନେଲରେ ଫସିଥିବା ଶ୍ରମିକ, କହିଲେ ମୁଁ ଭଲ ଅଛି