ନୂଆଦିଲ୍ଲୀ:ପୂର୍ବତନ ଆଇନ ମନ୍ତ୍ରୀ ତଥା ବରିଷ୍ଠ ଓକିଲ ଶାନ୍ତି ଭୂଷଣଙ୍କ ପରଲୋକ । ମଙ୍ଗଳବାର ଦିଲ୍ଲୀସ୍ଥିତ ବାସଭବନରେ ଶେଷ ନିଶ୍ବାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ତାଙ୍କୁ ୯୭ ବର୍ଷ ହୋଇଥିବା ସୂଚନା ।
ତେବେ ନିଜର ଜୀବନକାଳରେ ଅନେକ ଚର୍ଚ୍ଚିତ ମାମଲା ଲଢିଥିଲେ । ଆହ୍ଲାବାଦ ହାଇକୋର୍ଟରେ ଚର୍ଚ୍ଚିତ ମାମଲାରେ ରାଜନାରାୟଣଙ୍କ ପ୍ରତିନିଧିତ୍ବ କରିଥିଲେ । ଏହି ମାମଲା ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧିଙ୍କ ବିରୋଧରେ ରହିଥିଲା । ଏହାପରେ ସେ ଚର୍ଚ୍ଚାକୁ ଆସିଥିଲେ । ବିଗତ ଦିନରେ ସେ ଅନେକ ଅନେକ ମାମଲା ଲଢିବା ସହ ଦୁର୍ନୀତି ବିରୋଧରେ ସ୍ବର ଉଠାଇଥିଲେ । ସେ ମୋରାରଜୀ ଦେଶାଇ ସରକାରରେ ୧୯୭୭ ମସିହାରୁ ୧୯୭୯ ମସିହା ପର୍ଯ୍ୟନ୍ତ ଆଇନମନ୍ତ୍ରୀ ଥିଲେ । ଏହାପରେ ସେ ୧୯୮୦ ମସିହାରେ ସେଣ୍ଟର ଫର ପବ୍ଲିକ ଇଣ୍ଟରେଷ୍ଟ ଲିଟିଗେସନ ପ୍ରତିଷ୍ଠା କରିଥିଲେ ।
ଏହା ମଧ୍ୟ ପଢନ୍ତୁ: Inspiring Stroy: ମହିଳାଙ୍କ ମହତ କାର୍ଯ୍ୟ, ସ୍ତନ୍ୟପାନ କରାଇ ଭୋକିଲା ନବଜାତଙ୍କ ମେଣ୍ଟାଉଛନ୍ତି ଭୋକ
ପୂର୍ବତନ ଆଇନମନ୍ତ୍ରୀ ୨୦୧୮ ମସିହାରେ ସୁପ୍ରିମକୋର୍ଟରେ ଜନସ୍ବାର୍ଥ ମାମଲା ଦାଖଲ କରି ମାଷ୍ଟର ଅଫ ରୋଷ୍ଟର ପ୍ରଣାଳୀରେ ପରିବର୍ତ୍ତନ ପାଇଁ ଦାବି କରିଥିଲେ । ସେ ତାଙ୍କ ରାଜନୈତିକ ଜୀବନରେ ରାଜ୍ୟସଭା ସାଂସଦ ଥିଲେ । ସ୍ବର୍ଗତ ଶାନ୍ତି ଭୂଷଣ କଂଗ୍ରେସ ପରେ ଜନତା ଦଳର ସଦସ୍ୟ ରହିଥିଲେ । ଏହାପରେ ୧୯୮୦ ମସିହାରେ ଭାରତୀୟ ଜନତା ଦଳରେ ଯୋଗ ଦେଇଥିଲେ ଏହାପରେ ୧୯୮୬ ମସିହାରେ ସେ ଭାଜପାରୁ ଇସ୍ତଫା ଦେଇଥିଲେ । ତାଙ୍କ ପୁଅ ତଥା ଆଇନଜୀବୀ ପ୍ରଶାନ୍ତ ଭୂଷଣଙ୍କ ସହ ସେ ୨୦୧୨ ମସିହାରେ ଆମ ଆଦମୀ ପାର୍ଟିର ସଦସ୍ୟ ହୋଇଥିଲେ । ବରିଷ୍ଠ ଆଇନଜୀବୀ ଭାବେ ସ୍ବର୍ଗତ ଶାନ୍ତି ଭୂଷଣ ଏବଂ ତାଙ୍କ ପୁଅ ପ୍ରଶାନ୍ତ ଭୂଷଣ ଜଣାଶୁଣା ଥିଲେ ।
ତେବେ ପୂର୍ବତନ ଆଇନ ମନ୍ତ୍ରୀ ତଥା ବରିଷ୍ଠ ଓକିଲ ଶାନ୍ତି ଭୂଷଣଙ୍କ ପରଲୋକକୁ ନେଇ ଦୁଃଖ ପ୍ରକାଶ କରିଛନ୍ତି କେନ୍ଦ୍ର ଆଇନ ମନ୍ତ୍ରୀ କିରଣ ରିଜଜୁ । ସେ ଟ୍ବିଟ କରି କହିଛନ୍ତି, "ପୂର୍ବତନ ଆଇନ ମନ୍ତ୍ରୀ ଶାନ୍ତି ଭୂଷଣଙ୍କ ଦେହାନ୍ତ ଖବର ଶୁଣି ମୁଁ ଅତ୍ୟନ୍ତ ଦୁଃଖିତ । ଭଗବାନ ତାଙ୍କ ପରିବାରକୁ ସାହାସ ଦିଅନ୍ତୁ । ତାଙ୍କର ଆତ୍ମାର ସଦଗତି ନିମନ୍ତେ ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି ।"
ଉପରାଷ୍ଟ୍ରପତି ଜଗଦୀପ ଧନକଡ଼ ମଧ୍ୟ ଟ୍ବିଟ କରି ଦୁଃଖପ୍ରକାଶ କରିଛନ୍ତି । ସେ କହିଛନ୍ତି, "ନ୍ୟାୟପାଳିକା ତଥା ଜନସମ୍ପର୍କ କ୍ଷେତ୍ରରେ ପୂର୍ବତନ ଆଇନ ମନ୍ତ୍ରୀ ତଥା ବରିଷ୍ଠ ଆଇନଜୀବୀ ଶାନ୍ତି ଭୂଷଣଙ୍କ ଉଲ୍ଲେଖନୀୟ ଅବଦାନ ରହିଥିଲା । ତାଙ୍କ ଦେବାନ୍ତ ଆଇନ କ୍ଷେତ୍ର ପାଇଁ ଏକ ବଡ କ୍ଷତି ଅଟେ । ଭଗବାନ ଶୋକସନ୍ତପ୍ତ ପରିବାରକୁ ଧୌର୍ଯ୍ୟ ଦେବା ସହ ତାଙ୍କ ଆତ୍ମାକୁ ଶାନ୍ତି ଦିଅନ୍ତୁ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
