Sikkim Flash Flood: ସିକ୍କିମ ବନ୍ୟାରେ ମୃତ୍ୟୁସଂଖ୍ୟା 26କୁ ବୃଦ୍ଧି, ଏବେ ବି 142 ନିଖୋଜ

ସିକ୍କିମ ବନ୍ୟାରେ ଏବେ ସୁଦ୍ଧା 26 ଜଣଙ୍କର ମୃତ୍ୟୁ ହୋଇଥିବା ବେଳେ 142 ଜଣ ନିଖୋଜ ଅଛନ୍ତି। ଅଧିକ ପଢନ୍ତୁ

ଗ୍ୟାଙ୍ଗଟକ:ସିକ୍କିମରେ ପ୍ରଳୟଙ୍କାରୀ ବନ୍ୟା ଜନିତ ମୃତ୍ୟୁସଂଖ୍ୟା ବଢିବାରେ ଲାଗିଛି । ବନ୍ୟାରେ ଏବେ ସୁଦ୍ଧା 26 ଜଣଙ୍କ ମୃତ୍ୟୁ ହୋଇଛି । ସେମାନଙ୍କ ମଧ୍ୟରେ 7 ଜଣ ଯବାନ ଅଛନ୍ତି । ଏବେ ବି 142 ଜଣ ନିଖୋଜ ଥିବାବେଳେ ସମସ୍ତଙ୍କୁ ଉଦ୍ଧାର କରିବାକୁ ସର୍ଚ୍ଚ ଅପରେସନ ଜାରି ରହିଛି । ଏହି ବନ୍ୟା ବିପର୍ଯ୍ୟୟରେ 25 ହଜାର ଲୋକ ପ୍ରଭାବିତ ହୋଇଥିବା ବେଳେ 1200ରୁ ଅଧିକ ଘରଦ୍ବାର ନଷ୍ଟ ହୋଇଛି । ଏଥିସହ 13ଟି ବ୍ରିଜ ଭାଙ୍ଗିଥିବା ସୂଚନା ମିଳିଛି ।

ବର୍ତ୍ତମାନ ପର୍ଯ୍ୟନ୍ତ ସିକ୍କିମର ବିଭିନ୍ନ ଅଞ୍ଚଳରୁ 2,413 ଲୋକଙ୍କୁ ଉଦ୍ଧାର କରାଯାଇଛି । ରାଜ୍ୟରେ ବନ୍ୟା ପୀଡିତଙ୍କ ପାଇଁ ରିଲିଫ କ୍ୟାମ୍ପ କରାଯାଇଛି । 22ଟି ରିଲିଫ୍ କ୍ୟାମ୍ପରେ 6,875 ଲୋକ ଆଶ୍ରୟ ନେଉଛନ୍ତି । ସେମାନଙ୍କ ମଧ୍ୟରେ ଅଧିକାଂଶ ପର୍ଯ୍ୟଟକ ରହିଛନ୍ତି । ସିକ୍କିମ ମୁଖ୍ୟମନ୍ତ୍ରୀ ପ୍ରେମ ସିଂ ତମାଙ୍ଗ ମୃତକଙ୍କ ପରିବାର ପାଇଁ 4 ଲକ୍ଷ ଟଙ୍କା ଲେଖାଏଁ ସହାୟତା ଘୋଷଣା କରିଛନ୍ତି । ସେହିପରି କ୍ୟାମ୍ପରେ ଆଶ୍ରୟ ନେଉଥିବା ବନ୍ୟା ପୀଡିତଙ୍କ ପାଇଁ 2,000 ଟଙ୍କା ସହାୟତା ଘୋଷଣା କରାଯାଇଛି ।

ପ୍ରଳୟଙ୍କାରୀ ବନ୍ୟା ରାଜ୍ୟରେ ବ୍ୟାପକ କ୍ଷୟକ୍ଷତି ଘଟାଇଛି । କିନ୍ତୁ କ୍ଷୟକ୍ଷତି ରିପୋର୍ଟ ବର୍ତ୍ତମାନ ସୁଦ୍ଧା ସାମ୍ନାକୁ ଆସିନାହିଁ । ଏକ କମିଟି ଗଠନ ପରେ କ୍ଷୟକ୍ଷତିର ଆକଳନ କରାଯିବ । ବର୍ତ୍ତମାନ ଉଦ୍ଧାର କାର୍ଯ୍ୟ ଉପରେ ଅଧିକ ଗୁରୁତ୍ବ ଦିଆଯାଉଛି । ବନ୍ୟା ଯୋଗୁଁ ଅନେକ ସ୍ଥାନରେ ରାସ୍ତା ଧୋଇ ଯାଇଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି । ଉତ୍ତର ସିକ୍କିମରେ ଯୋଗାଯୋଗ ପ୍ରଭାବିତ ହୋଇଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ବନ୍ୟାରେ ସିଙ୍ଗତମ ଅନ୍ତର୍ଗତ ବାରଦାଙ୍ଗ ନିକଟରେ ପାର୍କିଂ ହୋଇଥିବା ସେନାର ଅନେକ ଯାନବାହନ ଓ ଲାଚେନ ଉପତ୍ୟାକାରେ ଥିବା ସେନା କ୍ୟାମ୍ପ ଭାସି ଯାଇଥିଲା । ସ୍ଥଳସେନାର ପ୍ରାୟ 23 ଜଣ ଯବାନ ବନ୍ୟାରେ ନିଖୋଜ ହୋଇଯାଇଥିଲେ । ସେମାନଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା 7ଜଣଙ୍କ ମୃତଦେହ ଉଦ୍ଧାର କରାଯାଇଛି । ବାକି ନିଖୋଜ ଯବାନଙ୍କୁ ଉଦ୍ଧାର ପାଇଁ ସର୍ଚ୍ଚ ଅପରେସନ ଜାରି ରହିଛି । ବନ୍ୟା ମାଙ୍ଗନ, ଗ୍ୟାଙ୍ଗଟକ ଏବଂ ପାକୟଙ୍ଗ ଜିଲ୍ଲାରେ ବ୍ୟାପକ କ୍ଷୟକ୍ଷତି ଘଟାଇଛି ।