ନୂଆଦିଲ୍ଲୀ:ଭାରତୀୟ ନ୍ୟାୟିକ ବ୍ୟବସ୍ଥାରେ ଯେକୌଣସି ଜଘନ୍ୟ ଅପରାଧ ପାଇଁ ସର୍ବାଧିକ ମୃତ୍ୟୁଦଣ୍ଡର ବ୍ୟବସ୍ଥା ରହିଛି । ଅନ୍ୟ ରାଷ୍ଟ୍ରମାନଙ୍କରେ ମୃତ୍ୟୁଦଣ୍ଡର ଏକାଧିକ ପଦ୍ଧତି କାର୍ଯ୍ୟକାରୀ ହେଉଥିବା ବେଳେ ଭାରତରେ ମାନବୀୟ ଦୃଷ୍ଟିକୋଣରୁ କେବଳ ଫାଶୀ ପଦ୍ଧତି ହିଁ ବ୍ୟବହାର କରାଯାଇଥାଏ । ତେବେ ଏବେ ଫାଶୀ ଠାରୁ ମଧ୍ୟ କମ ଯନ୍ତ୍ରଣାଦାୟକ ମୃତ୍ୟୁଦଣ୍ଡର ପ୍ରଣାଳୀ ଖୋଜିବା ଦିଗରେ ସର୍ବୋଚ୍ଚ କୋର୍ଟ ବିଚାର ବିମର୍ଶ କରୁଛନ୍ତି । ଫାଶୀ ଠାରୁ ଅନ୍ୟ କୌଣସି କମ ଯନ୍ତ୍ରଣାଦାୟକ ପ୍ରଣାଳୀରେ ମୃତ୍ୟୁଦଣ୍ଡ ସମ୍ଭବ କି ନୁହେଁ, ସେ ନେଇ ସର୍ବୋଚ୍ଚ କୋର୍ଟ କେନ୍ଦ୍ର ସରକାରଙ୍କ ଠାରୁ ରିପୋର୍ଟ ମାଗିଛନ୍ତି ।
ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ ଚନ୍ଦ୍ରଚୂଡଙ୍କ ନେତୃତ୍ବରେ ପି.ଏସ ନରସିହ୍ମାଙ୍କୁ ନେଇ ଦୁଇ ଜଣିଆ ଖଣ୍ଡପୀଠ ଏହି ସମ୍ପର୍କିତ ଏକ ମାମଲାର ଶୁଣାଣି କରି ମୃତ୍ୟୁଦଣ୍ଡ ପ୍ରଣାଳୀର ମାନବୀୟ ଦିଗ ଉପରେ ଗୁରୁତ୍ବ ଦେଇଥିଲେ । ଫାଶୀ ଦଣ୍ଡର ବିକଳ୍ପ ଭାବେ ବର୍ତ୍ତମାନ ସମୟରେ କୌଣସି ନୂତନ ପଦ୍ଧତି ବ୍ୟବହାର କରାଯାଇ ପାରିବ କି ନାହିଁ, ସେ ନେଇ କେନ୍ଦ୍ର ସରକାର ଅନୁଧ୍ୟାନ କରି ରିପୋର୍ଟ ଦାଖଲ କରିବାକୁ ଖଣ୍ଡପୀଠ କହିଛନ୍ତି ।
ଆଇନଜୀବୀ ଋଷି ମାଲୋହୋତ୍ରାଙ୍କ ଦ୍ବାରା ଏହି ଆବେଦନ କରାଯାଇଥିଲା । ଫାଶୀ ଠାରୁ ମଧ୍ୟ କମ ଯନ୍ତ୍ରଣା ଓ ମାନବୀୟ ଭାବେ ଦୋଷୀଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରିବା ପାଇଁ ଏହି ଆବଦନରେ ଦର୍ଶାଯାଇଥିଲା । କୋର୍ଟ ଏହି ପ୍ରସଙ୍ଗରେ ଏକ ବିଶେଷଜ୍ଞ କମିଟି ମଧ୍ୟ ଗଠନ କରିପାରନ୍ତି । ଏହି ଉଚ୍ଚସ୍ତରୀୟ କମିଟିରେ ଚିକିତ୍ସା ବିଜ୍ଞାନ, ଆଇନ ବିଶେଷଜ୍ଞ ଓ ମାନବାଧିକାର କର୍ମୀ ମଧ୍ୟ ରହିବେ । ଏମ୍ସ ଡାକ୍ତର, ଜାତୀୟ ଆଇନ ବିଶ୍ବବିଦ୍ୟାଳୟ (NLU) ପ୍ରଫେସର ଓ ଅନ୍ୟ କିଛି କ୍ଷେତ୍ରରୁ ବିଶେଷଜ୍ଞ ଏହି ସମ୍ଭାବିତ କମିଟିରେ ସ୍ଥାନ ପାଇବେ ।