ଡେରାଡୁନ: ଉତ୍ତରାଖଣ୍ଡର ଜୋଶିମଠରେ ଆଜିକୁ 10 ଦିନ ହେବ ଉଦ୍ଧାର କାର୍ଯ୍ୟ ଜାରି ରହିଛି । ଜାତୀୟ ବିପର୍ଯ୍ୟୟ ମୁକାବିଲା ବାହିନୀ ଏବଂ ଅନ୍ୟାନ୍ୟ ଏଜେନ୍ସି ସହିତ ଭାରତ-ତିବ୍ଦତୀୟ ସୀମା ପୋଲିସ କର୍ମଚାରୀ ଚାମୋଲି ଜିଲ୍ଲାରେ ସର୍ଚ୍ଚ ଓ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ନ୍ୟାସନାଲ ଥର୍ମାଲ୍ ପାୱାର୍ କର୍ପୋରେସନ୍ (ଏନଟିପିସି) ଜଳ ବିଦ୍ୟୁତ୍ ପ୍ରକଳ୍ପର ନିର୍ଦ୍ଦେଶକ ଉଜ୍ବଲ ଭଟ୍ଟାଚାର୍ଯ୍ୟ ଏହା ପୂର୍ବରୁ କହିଥିଲେ, ‘ଆମେ ତପୋବନ୍ ଟନେଲ୍ ଭିତରେ 135 ମିଟର ପର୍ଯ୍ୟନ୍ତ ଗତି କରିଛୁ । ମୃତଦେହକୁ ସେମାନଙ୍କ ପରିବାର ସଦସ୍ୟଙ୍କ ନିକଟକୁ ଫେରାଇ ଆଣିବା ପାଇଁ ସତର୍କତାର ସହ ଉଦ୍ଧାର କରାଯାଇଛି ’ ।
ତେବେ ବର୍ତ୍ତମାନ ସୁଦ୍ଧା 58 ଜଣଙ୍କ ମୃତଦେହ ଉଦ୍ଧାର କରାଯାଇଛି । ଏହାସହ 24ଟି ଶରୀରର ଅଙ୍ଗ ମିଳିଛି । 58ଟି ମଧ୍ୟରୁ 30ଟି ମୃତଦେହକୁ ଚିହ୍ନଟ କରାଯାଇଥିବାବେଳେ ଗୋଟିଏ ଅଙ୍ଗକୁ ଚିହ୍ନଟ କରାଯାଇଛି । ଜୋଶିମଠରେ 179ଟି ନିଖୋଜ ମାମଲା ଦାୟର ହୋଇଛି । 91 ପରିବାର ଲୋକଙ୍କ ଡିଏନଏ ସଂଗ୍ରହ କରାଯାଇଥିବା ଚମୋଲୀ ପୋଲିସ ପକ୍ଷରୁ ସୂଚନା ମିଳିଛି ।