ଶିଲଂ: ମେଘାଳୟ କଂଗ୍ରେସକୁ ପୁଣି ବଡ ଝଟକା । ଦଳକୁ ଅଲବିଦା କହିଲେ ଅବଶିଷ୍ଟ ୫ ବିଧାୟକ । ନିକଟରେ ଦଳର ୧୨ ବିଧାୟକ ତୃଣମୂଳ କଂଗ୍ରେସ (ଟିଏମସି) ରେ ସାମିଲ ହୋଇଥିବାବେଳେ ଅବଶିଷ୍ଟ ବିଧାୟକ ଆଜି ଦଳ ଛାଡି କ୍ଷମତାରେ ଥିବା BJP ନେତୃତ୍ବାଧୀନ ମେଣ୍ଟ ମେଘାଳୟ ଡେମୋକ୍ରାଟିକ୍ ଆଲାଏନ୍ସ (MDA)ରେ ଯୋଗ ଦେଇଛନ୍ତି । ଏହି ବିଧାୟକମାନଙ୍କ ମଧ୍ୟରେ ଏମ୍ ଆମ୍ପାରିନ୍ ଲିଙ୍ଗଡୋହ, ପି.ଟି ସାକ୍କି, ମାୟରାଲବୋର୍ନ୍ ସିୟମ, କିମଫା ଏସ. ମାରବାନିଆଙ୍ଗ, ଏବଂ ମୋହେଣ୍ଡ୍ରୋ ରାପ୍ସଙ୍ଗ୍ ରହିଛନ୍ତି ।
ଗତବର୍ଷ (୨୦୨୧) ନଭେମ୍ବରରେ ପୂର୍ବତନ ମୁଖ୍ୟମନ୍ତ୍ରୀ ମୁକୁଲ ସାଙ୍ଗମାଙ୍କ ସମେତ 12 ଜଣ କଂଗ୍ରେସ ବିଧାୟକ ଦଳରୁ ଇସ୍ତଫା ଦେବା ସହ ତୃଣମୂଳ କଂଗ୍ରେସରେ ଯୋଗଦାନ କରିଥିଲେ । ଦଳ ପାଖରେ ଆଉ ମାତ୍ର ୫ ବିଧାୟକ ରହିଥିଲେ । ଆଜି ୫ ବିଧାୟକ ଦଳ ଛାଡିବା ପୂର୍ବରୁ ମୁଖ୍ୟମନ୍ତ୍ରୀ କନରାଡ କେ.ସାଙ୍ଗମାଙ୍କୁ ଭେଟି ମିଳିତ ମେଣ୍ଟରେ ଯୋଗ ଦେବା ପାଇଁ ଇଚ୍ଛା ପ୍ରକାଶ କରିଥିଲେ । ତେବେ ସେମାନଙ୍କୁ ମେଣ୍ଟ ପକ୍ଷରୁ ସ୍ବାଗତ କରାଯାଇଛି । ଉପମୁଖ୍ୟମନ୍ତ୍ରୀ ପ୍ରେଷ୍ଟୋନ୍ ଟିନସଙ୍ଗଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ ବିଧାୟକମାନଙ୍କୁ ମିଳିତ ମଞ୍ଚକୁ ସ୍ୱାଗତ କରିଛନ୍ତି।