ମସଜିଦ କାନ୍ଥରେ 'ଜୟ ଶ୍ରୀରାମ' ଲକ୍ଷ୍ନୌ: ମସଜିଦ କାନ୍ଥରେ 'ଜୟ ଶ୍ରୀରାମ' ନାରା । ଏହି ଲେଖାକୁ ନେଇ ଏବେ ତେଜିଛି ବିବାଦ । ସୋସିଆଲ ମିଡିଆରେ ଏହାର ଏକ ଭିଡିଓ ଭାଇରାଲ ହେବାରେ ଲାଗିଛି । ସମାଜବାଦୀ ପାର୍ଟି ଏବଂ କଂଗ୍ରେସ ଏହାକୁ ନେଇ ବିରୋଧ ପ୍ରଦର୍ଶନ କରିଛନ୍ତି । ଏହି ମସଜିଦଟି ଦିଲ୍ଲୀ ସୀମାବର୍ତ୍ତୀ ଅଞ୍ଚଳରେ ଥିବାରୁ ଦିଲ୍ଲୀ ପୋଲିସ ଏନେଇ ମାମଲା ରୁଜୁ କରି ତଦନ୍ତ ଚଳାଇଛି । ସୂଚନା ଅନୁସାରେ, ଶନିବାର ରାତିରେ ଦିଲ୍ଲୀ ଗେଟ୍ ଛକଠାରେ ଥିବା ଏକ ମସଜିଦ କାନ୍ଥରେ 'ଜୟ ଶ୍ରୀ ରାମ' ଲେଖାଥିବା ଦେଖିବାକୁ ମିଳିଥିଲା । କେହି କେହି ଏହାର ଏକ ଭିଡିଓ ପ୍ରସ୍ତୁତ କରି ଏହାକୁ ସୋସିଆଲ ମିଡିଆରେ ଭାଇରାଲ କରିଥିଲେ ।
ଜଣେ ଯୁବକ 'ଜୟ ଶ୍ରୀରାମ' ଶବ୍ଦ ବଡ଼ ଅକ୍ଷରରେ ଲେଖୁଥିବା ଭିଡିଓରେ ଦେଖାଯାଉଛି । ଏହି ବିଷୟରେ ସୂଚନା ପାଇବା ମାତ୍ରେ ଅଞ୍ଚଳର ଉଭୟ ସମ୍ପ୍ରଦାୟର ଲୋକମାନେ ଏକତ୍ରିତ ହୋଇଥିଲେ । ଏହି ଘଟଣାକୁ ନେଇ ସମ୍ପୃକ୍ତ ଅଞ୍ଚଳରେ ଉତ୍ତେଜନାମୂଳକ ପରିସ୍ଥିତି ଉପୁଜିଥିଲା । ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତଜେନାକାରୀଙ୍କୁ ବୁଝାସୁଝା କରିଥିଲା । ଏହି ମାମଲାକୁ ଗମ୍ଭୀରତାର ସହ ଗ୍ରହଣ କରି ପୋଲିସ ମସଜିଦ କାନ୍ଥରେ ନାମ ଲିଭାଇ ଦେଇଛି ।
ମସଜିଦ କାନ୍ଥରେ ଧାର୍ମିକ ନାରାକୁ ନେଇ ଉପୁଜିଥିବା ବିବାଦର ଖବର ପାଇ ସମାଜବାଦୀ ପାର୍ଟି ଏବଂ କଂଗ୍ରେସ ଦଳର କର୍ମୀମାନେ ଘଟଣାସ୍ଥଳରେ ପହଞ୍ଚିଥିଲେ । ସମାଜବାଦୀ ପାର୍ଟିର କର୍ମକର୍ତ୍ତା କହିଛନ୍ତି ଯେ, ଆଲିଗଡର ଭାଇଚାରା ନଷ୍ଟ କରିବାକୁ ଉଦ୍ୟମ କରାଯାଉଛି । ଉଭୟ ପକ୍ଷ ଏକ ମାମଲା ଦାୟର କରି ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଦାବି କରିଥିବା ଜଣାପଡିଛି। ପୋଲିସ ଅଜ୍ଞାତ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
ସେପଟେ ଥାନା ଅଧିକାରୀ ରାମକେଶ କହିଛନ୍ତି, "ଅପରାଧ ରୋକିବାକୁ ରାତିରେ ପୋଲିସ ପାଟ୍ରୋଲିଂ କରୁଥିଲା । ଏହି ସମୟରେ ମସଜିଦ କାନ୍ଥରେ ଏକ ଧାର୍ମିକ ନାରା ଲେଖାଯାଇଥିବା ଖବର ମିଳିଥିଲା । ଘଟଣାସ୍ଥଳରେ ପହଞ୍ଚିବା ପରେ ଦେଖିବାକୁ ମିଳିଥିଲା ଯେ, ଉଭୟ ସମ୍ପ୍ରଦାୟର ଲୋକେ ଭିଡ ଜମାଇଛନ୍ତି । ସ୍ଥିତି ଉତ୍ତେଜନାପୂର୍ଣ୍ଣ ରହିଥିବାବେଳେ ତାହାକୁ ଆୟତ୍ତ କରାଯାଇଥିଲା । ଏହି ମାମଲାର ତଦନ୍ତ ଚାଲିଛି । ଅଭିଯୁକ୍ତ ସମ୍ପର୍କରେ ତଥ୍ୟ ମିଳିବା ପରେ କାର୍ଯ୍ୟାନୁଷ୍ଠାନ ନିଆଯିବ ।"
ଏହା ମଧ୍ୟ ପଢନ୍ତୁ...ଇନ୍ଦିରା ଗାନ୍ଧୀ ମଧ୍ୟ ଶ୍ରୀମନ୍ଦିରକୁ ପ୍ରବେଶ କରି ପାରି ନଥିଲେ, କାମିୟା ମନ୍ଦିରକୁ କାହିଁକି ପ୍ରବେଶ କଲେ ପ୍ରଶ୍ନ ପଚାରିଲେ ମନମୋହନ
