ନୂଆଦିଲ୍ଲୀ: ଭାରତୀୟ କୋଭିଡ ଟିକା କୋଭିସିଲ୍ଡ ଏବଂ କୋଭାକ୍ସିନକୁୁ ମିଳିଲା ଖୋଲା ବଜାର ଅନୁମତି । ଭାରତର ଔଷଧ ନିୟାମକ ସଂସ୍ଥା (DGCI) ଏହାକୁ ଖୋଲା ବଜାରରେ ପ୍ରବେଶ ଅନୁମୋଦନ ଦେଇଛନ୍ତି । କିନ୍ତୁ ଏହା କିଛି ନିର୍ଦ୍ଦିଷ୍ଟ ସର୍ତ୍ତାବଳୀ ସହ ଉପଲବ୍ଧ ହେବା ନେଇ ସୂଚନା ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ । ତେବେ ଏହା ବର୍ତ୍ତମାନ ସାଧାରଣ ଔଷଧ ଦୋକାନ ପରିବର୍ତ୍ତେ ଘରୋଇ ହସ୍ପିଟାଲ ଓ କ୍ଲିନିକରେ ଉପଲବ୍ଧ ହେବ ।
ଅନୁମୋଦନ ପରେ ଖୁବ୍ ଶୀଘ୍ର ଏହି ଦୁଇଟି ଟିକା ବର୍ତ୍ତମାନ ସ୍ଥିର ହୋଇଥିବା ନିର୍ଦ୍ଦିଷ୍ଟ ମୂଲ୍ୟରେ ଘରୋଇ କ୍ଲିନିକ ଓ ହସ୍ପିଟାଲରେ ଉପଲବ୍ଧ ହେବାକୁ ଯାଉଛି । କେବଳ ସରକାରଙ୍କ ଦ୍ବାରା ଜାରି କରାଯାଇଥିବା ଟୀକାକରଣ ଗାଇଡଲାଇନ ତଥା ପ୍ରାପ୍ତ ବୟସ୍କଙ୍କ କ୍ଷେତ୍ରରେ ଏହାର ବ୍ୟବହାର ହୋଇପାରିବା ନେଇ ସର୍ତ୍ତାବଳୀରେ ଉଲ୍ଲେଖ ରହିଛି । ନୂତନ ଡ୍ରଗ୍ସ ଏବଂ କ୍ଲିନିକାଲ ଟ୍ରାଏଲ୍ ନିୟମ-2019 ଅନୁଯାୟୀ ଏହି ଅନୁମୋଦନ ପ୍ରଦାନ କରାଯାଇଛି । ଜାରି ହୋଇଥିବା ସର୍ତ୍ତାବଳୀ ଅନୁଯାୟୀ, ସଂସ୍ଥାଗୁଡ଼ିକ CoWIN ପୋର୍ଟାଲ ପ୍ଲାଟଫର୍ମରେ ସେମାନଙ୍କ ସମସ୍ତ ବିତରଣ ସମ୍ପର୍କିତ ତଥ୍ୟ ମଧ୍ୟ ଅପଲୋଡ କରିବେ ।