ପାଟନା:ମହିଳା ଫୁଟବଲ ଖେଳାଳିଙ୍କୁ ଦୁଷ୍କର୍ମ ଉଦ୍ୟମ । ବିହାରର ସିଓ୍ବାନ ଜିଲ୍ଲାରୁ ସାମ୍ନାକୁ ଆସିଛି ଏପରି ଲଜ୍ଜା ଜନକ ଘଟଣା । ଏନେଇ ଖେଳାଳି ଜଣଙ୍କ ଜିଲ୍ଲାପାଳଙ୍କ ନିକଟରେ ପହଞ୍ଚି ଜଣେ ଯୁବକ ତାଙ୍କୁ ଦୁଷ୍କର୍ମ ଉଦ୍ୟମ କରିଥିବା ଅଭିଯୋଗ କରିଛନ୍ତି । ପୀଡିତା ଜଣଙ୍କ ମେରବା ପୋଲିସ ଷ୍ଟେସନ ଅଞ୍ଚଳର ହୋଇଥିବା ବେଳେ ଫୁଟବଲ ଖେଳରେ ଦେଶ ତଥା ବିଦେଶରେ ଅନେକ ଥର ପୁରସ୍କୃତ ହୋଇ ଦେଶକୁ ଗର୍ବିତ କରାଇଛନ୍ତି । ଏହି ଘଟଣାରେ ତଦନ୍ତ କରାଯାଇ ଯୁବକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି । ପୋଲିସ ଏହି ଘଟଣାରେ ତଦନ୍ତ ଜାରି ରଖିଛି ।
ଫୁଟବଲ ଖେଳାଳିଙ୍କୁ ଦୁଷ୍କର୍ମ ଉଦ୍ୟମ କରିଥିଲେ ଗ୍ରାମର ଯୁବକ:ମହିଳା ଫୁଟବଲ ଖେଳାଳି ଜଣଙ୍କ କହିଛନ୍ତି ଯେ, ''ସୋମବାର ସନ୍ଧ୍ୟାରେ ମୁଁ ଗାଁକୁ ବୁଲିବାକୁ ଯାଇଥିଲି । ଏହି ସମୟରେ ଜଣେ ଯୁବକ ମୋତେ ଟାଣି ନେଇ ଏକ ଖୋଲା ସ୍ଥାନକୁ ନେଇଯାଇଥିଲା । ଏହାପରେ ମୋତେ ଦୁଷ୍କର୍ମ ଉଦ୍ୟମ କରିଥିଲା । ମୁଁ ପାଟି କରିବାରୁ କରିବାରୁ ସେ ମୋତେ ଆକ୍ରମଣ କରିଥିଲା । ଏହାପରେ ସ୍ଥାନୀୟ ଲୋକେ ଆସୁଥିବା ଦେଖି ସେ ଘଟଣାସ୍ଥଳରୁ ଫେରାର ହୋଇଯାଇଥିଲା । ଏଥିସହ ମୋତେ ହତ୍ୟା କରିବାକୁ ଧମକ ମଧ୍ୟ ଦେଇଥିଲା । ''
ଜାତୀୟ ଓ ଅନ୍ତର୍ଜାତୀୟ କ୍ରୀଡାରେ ଭାଗ ନେଇଛନ୍ତି:ପୀ଼ଡିତା ଜଣଙ୍କ ସିଓ୍ବାନ ଜିଲ୍ଲାପାଳଙ୍କୁ ଲିଖିତ ଆକାରରେ ଅଭିଯୋଗ କରିଛନ୍ତି । ଏଥିସହ ଦୁଷ୍କର୍ମ ଉଦ୍ୟମ କରିଥିବା ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି। ଆମେ ଆପଣଙ୍କୁ ଜଣାଇ ଦେଉଛୁ ଯେ, ଏହି ମହିଳା ଫୁଟବଲ ତାରକା ଜଣଙ୍କ ଏକ ସ୍ପୋଟ୍ସ ଏକାଡେମୀରେ ରହି ତାଲିମ ନେଉଥିଲେ । 2022ରେ ଅଲମ୍ପିକ୍ସ ୟୁନାଫାଇଡରେ ଭାଗ ନେବାକୁ ଆମେରିକା ଯାଇଥିଲେ । ସେଠାରେ ସେ ବ୍ରୋଞ୍ଚ ପଦକ ହାସଲ କରି ଦେଶର ନାମକୁ ଗର୍ବିତ କରାଇଥିଲେ।
ସେ ଓଡିଶା ଓ ରାଜସ୍ଥାନରେ ମଧ୍ୟ ଖେଳିଛନ୍ତି । ବର୍ତ୍ତମାନ ଏହି ଖେଳାଳି ଜଣଙ୍କୁ ଦୁଷ୍କର୍ମ ଉଦ୍ୟମ ହୋଇଥିବା ଘଟଣା ସାମ୍ନାକୁ ଆସିବା ପରେ ପୋଲିସ ଘଟଣାର ତଦନ୍ତ କରୁଛି । ଯୁବକଙ୍କୁ ବର୍ତ୍ତମାନ ସୁଦ୍ଧା ଗିରଫ କରାଯାଇନାହିଁ । ଜଣେ ଅନ୍ତର୍ଜାତୀୟ ଖେଳାଳିଙ୍କୁ ଦୁଷ୍କର୍ମ ଉଦ୍ୟମ ଅତ୍ୟନ୍ତ ନିନ୍ଦନୀୟ ଘଟଣା । ଜଣେ ମହିଳା ଖେଳାଳି ଯଦି ସୁରକ୍ଷିତ ନୁହନ୍ତି ତେବେ ଜଣେ ସାଧାରଣ ମହିଳା ସମାଜରେ କିପରି ସୁରକ୍ଷିତ ରହିବ ସେନେଇ ସ୍ଥାନୀୟ ଲୋକେ ପ୍ରଶ୍ନ କରିଛନ୍ତି ।
ନିକଟରେ ହରିୟାଣାରେ ଜଣେ ମହିଳାଙ୍କୁ ଇଣ୍ଟରଭ୍ୟୁ ପାଇଁ ଡକାଇ ନିଶା ଦେବା ପରେ ଦୁଷ୍କର୍ମ କରାଯାଇଥିବା ଅଭିଯୋଗ ସାମ୍ନାକୁ ଆସିଥିଲା । ଇଞ୍ଜିନିୟରିଂ ଗ୍ରାଜୁଏଟ ମହିଳାଙ୍କୁ ଏକ କାରରେ ଦୁଷ୍ମର୍ମ କରାଯାଇଥିବା ନେଇ ଥାନାରେ ଅଭିଯୋଗ ହୋଇଥିଲା ।
