ପାଟନା: ହିନ୍ଦୁ ଧର୍ମଗ୍ରନ୍ଥ ସମ୍ପର୍କରେ ବିବାଦୀୟ ମନ୍ତବ୍ୟ ଦେଇ ଅଡୁଆରେ ଫସିଛନ୍ତି ବିହାର ଶିକ୍ଷାମନ୍ତ୍ରୀ ଚନ୍ଦ୍ରଶେଖର । RJD ନେତା ତଥା ଶିକ୍ଷାମନ୍ତ୍ରୀ କହିଛନ୍ତି ଯେ, "ରାମାୟଣକୁ ନେଇ ରଚିତ ରାମଚରିତମାନସ ସମାଜରେ ଘୃଣା ବିସ୍ତାର କରୁଛି । 'ରାମଚରିତମାନସ', 'ମନୁସ୍ମୃତି' ଓ 'ବଞ୍ଚ ଅଫ୍ ଥଟ୍' ସମାଜରେ ବିଭେଦତା ସୃଷ୍ଟି କରୁଛି । ଦଳିତ, ପଛୁଆବର୍ଗ ଓ ମହିଳାଙ୍କୁ ଶିକ୍ଷାରୁ ବଞ୍ଚିତ କରୁଛି ।" ନାଳନ୍ଦା ମୁକ୍ତ ବିଶ୍ବବିଦ୍ୟାଳୟର ୧୫ତମ ସମାବର୍ତ୍ତନ ଉତ୍ସବରେ ଯୋଗ ଦେବା ଅବସରରେ ସେ ଏହି ବୟାନ ଦେଇଛନ୍ତି । ଯାହାକୁ ନେଇ ଏବେ ଚାରିଆଡେ ବିବାଦ ଜୋର ଧରିଛି ।
ସମାବର୍ତ୍ତନ ଉତ୍ସବରେ ଶିକ୍ଷାମନ୍ତ୍ରୀଙ୍କ ସହ ବିହାର ରାଜ୍ୟପାଳ ଫଗୁ ଚୌହାନ ଉପସ୍ଥିତ ଥିଲେ । ଏହି ସମୟରେ ମନ୍ତ୍ରୀ କହିଥିଲେ ଯେ, "ରାମଚରିତମାନସକୁ ବିରୋଧ କରାଗଲା କାରଣ ସମାଜର ତଳୁଆ ବର୍ଗର ଲୋକେ ଶିକ୍ଷିତ ହେଲେ ସମାଜ ବିଷାକ୍ତ ହୋଇଯାଏ ବୋଲି ଏଥିରେ ଉଲ୍ଲେଖ ଅଛି । ଏହା ଦଳିତ, ପଛୁଆ ବର୍ଗ ଓ ମହିଳାଙ୍କ ଶିକ୍ଷାକୁ ବିରୋଧ କରେ । ରାମଚରିତମାନସ, ମନୁସ୍ମୃତି, ଏମ୍ ଏସ୍ ଗୋଲୱାଲକରଙ୍କ ବଞ୍ଚ ଅଫ୍ ଥଟ୍ ଭଳି ପୁସ୍ତକ ସାମାଜିକ ବିଭେଦ ସୃଷ୍ଟି କରୁଛି । ଘୃଣାର ମଞ୍ଜି ବୁଣୁଛି । ଗୋଟିଏ ରାଷ୍ଟ୍ର କେବଳ ସ୍ନେହ ପ୍ରେମ ଦ୍ବାରା ମହାନ ହୋଇପାରିବ । ସେଥିପାଇଁ ଲୋକମାନେ ମନୁସ୍ମୃତିକୁ ପୋଡିଦେଲେ ।''