ଜୟପୁର: ରାଜସ୍ଥାନ ଦଖଲ ପାଇଁ ଚାଲିଛି ରଣନୀତି । କ୍ଷମତାକୁ ଫେରିବାକୁ ବ୍ୟଗ୍ର ଗେରୁଆ ଦଳ। କଂଗ୍ରେସକୁ କ୍ଷମତାଚ୍ୟୁତ କରି ମରୂଭୂମିରେ ପଦ୍ମ ଫୁଟାଇବାକୁ ଚାଲିଛି ଦୀର୍ଘମିଆଦି ରଣନୀତି । ଦିଲ୍ଲୀରୁ ଜୟପୁର । ଜାରି ରହିଛି ବୈଠକ । କେଉଁଠି ଲଢିବେ କେଉଁ ଯୋଦ୍ଧା? କିଏ ହେବେ ସେନାପତି? କଣ ହେବ ମୁଦ୍ଦା?କଣ ମିଳିବ ଲୋଭନୀୟ ପ୍ରତିଶୃତି ? ସବୁର ସରିଛି ହିସାବ କିତାବ । ଏବେ ଲଢେଇର ସମୟ । ନିର୍ବାଚନ ଯୁଦ୍ଧର ବିଗୁଲ ବାଜିବା ପରେ ରଣଭୂମିରେ ଗୈରିକି ବାହୀନି । ଅଥଚ ଏଯାଏଁ କାହା ନେତୃତ୍ବରେ ଲଢିବେ ରାଜସ୍ଥାନ ଯୋଦ୍ଧା ନିର୍ଣ୍ଣୟ ନେଇପାରିଲେ ନି ମୋଦି-ଶାହ । ଯାହାକୁ ନେଇ ଏବେ ବଢୁଛି ସସ୍ପେନ୍ସ । ଯଦି ବିଜେପି କ୍ଷମତାକୁ ଆସେ କିଏ ହେବେ ମୁଖ୍ୟମନ୍ତ୍ରୀ? କାହାକୁ ଭରଷା କରିବେ କେନ୍ଦ୍ରୀୟ ନେତୃତ୍ବ । ଏହା ସ୍ପଷ୍ଟ ଯେ ବସୁନ୍ଧରା ରାଜେଙ୍କୁ ଦଳ ଆଉ ସୁଯୋଗ ଦେବ ନାହିଁ । ଏପରି ସ୍ଥିତିରେ ଏବେ ଏକାଧିକ ନାଁ କୁ ନେଇ ଚର୍ଚ୍ଚା । ଯେଉଁ କିଛି ନେତା ମୁଖ୍ୟମନ୍ତ୍ରୀ ଦୌଡରେ ଅଛନ୍ତି ସେମାନଙ୍କ ମଧ୍ୟରୁ ସର୍ବାଗ୍ରେ ଏବେ ବାବା ବାଳକନାଥ। ତେବେ କିଏ ଏହି ବାବା ବାଳକନାଥ ବା ଯୋଗୀ ବାଳକନାଥ । କଣ ତାଙ୍କ ବୃତ୍ତି? କେମିତି ମୁଖ୍ୟମନ୍ତ୍ରୀ ଦୌଡରେ ହେଲେ ସାମିଲ? ପଢନ୍ତୁ ସମ୍ପୂର୍ଣ୍ଣ ରିପୋର୍ଟ...
ଅଧିକ ପଢନ୍ତୁ- Rajasthan Election: କାହିଁକି ବସୁନ୍ଧରାଙ୍କ ଉତ୍ତରାଧିକାରୀ ଅନ୍ୱେଷଣରେ BJP ?
କିଏ ବାବା ବାଳକନାଥ? -ରାଜସ୍ଥାନ ଅଲୱର ଲୋକସଭା ସାଂସଦ ହେଉଛନ୍ତି ବାବା ବାଳକନାଥ । 2019 ଲୋକସଭା ନିର୍ବାଚନରେ ପ୍ରଥମଥର ପାଇଁ ନିର୍ବାଚନ ଲଢି କଂଗ୍ରେସର ଦିଗଜନେତା ଭମ୍ବର ଜିତେନ୍ଦ୍ର ସିଂଙ୍କୁ ବଡ ବ୍ୟବଧାନରେ ପରାସ୍ତ କରି ଲୋକସଭା ପହଞ୍ଚିଥିଲେ । ପ୍ରଥମ ଥର ସାଂସଦ ହୋଇଥିଲେ ମଧ୍ୟ ସଂସଦରେ ନିଜର ଉପସ୍ଥିତି, ବିଭିନ୍ନ ପ୍ରସଙ୍ଗରେ ସ୍ପଷ୍ଟ ଆଭିମୁଖ୍ୟ, ବିତର୍କରେ ସଠିକ ଜବାବ, ବିରୋଧୀଙ୍କୁ ଗଠନ ମୂଳକ ସମାଲୋଚନା କରି ଭିଡ ଭିତରେ ବାରି ହୋଇପଡିଥିଲେ । କଂଗ୍ରେସର ନୀତି, ନୈତିକତାକୁ କଡା ବିରୋଧ କରି ବିଜେପିର ବିଚାରଧାରାକୁ ସୁଦୃଢ ଭାବେ ଲୋକଙ୍କ ସମ୍ମୁଖରେ ରଖିଥାନ୍ତି ସାଂସଦ ବାବା । ଯାହା ଫଳରେ ତାଙ୍କ ଉପରେ ଜାତୀୟ ନେତାଙ୍କ ଭରଷା ବଢିବାରେ ଲାଗିଲା । ଫଳରେ ଧୀରେ ଧୀରେ ରାଜନୀତିରେ ଅନୁଭବ ବଢିବା ରାଜ୍ୟରେ ମଧ୍ୟ ତାଙ୍କର ପ୍ରଭାବ ବଢିବାରେ ଲାଗିଲା ।
ମସ୍ତନାଥ ମଠର ମହନ୍ତ ବାବା ବାଳକନାଥ-ସାଂସଦ ବାବା ବାଳକନାଥ ହରିଯାନା ରୋହତକରେ ଅବସ୍ଥିତ ମସ୍ତନାଥ ମଠର ଅଷ୍ଟମ ମହନ୍ତ । 2016 ମସିହାରେ ମହନ୍ତ ଚାନ୍ଦନାଥ ଯୋଗୀ ବାବା ବାଳକନାଥଙ୍କୁ ନିଜର ଉତ୍ତରାଧୀକାରୀ ଘୋଷଣା କରିଥିଲେ । ବାବା ବାଳକନାଥଙ୍କ ଅଭିଷେକ ଉତ୍ସବରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ବାବା ରାମଦେବଙ୍କ ସମେତ ଦେଶର ବିଭିନ୍ନ ପ୍ରାନ୍ତରୁ ବହୁ ମହନ୍ତ ସାମିଲ ହୋଇଥିଲେ । ବାବା ବାଳକନାଥ ମସ୍ତନାଥ ମଠର ମହନ୍ତ ହେବା ସହିତ ତତସମେତ ବାବା ମସ୍ତନାଥ ବିଶ୍ବବିଦ୍ୟାଳୟର କୁଳାଧିପତି ମଧ୍ୟ ଅଛନ୍ତି ।
ବାବା ବାଳକନାଥଙ୍କ ଶୈଶବ- ବାବା ବାଳକ ନାଥ ଏକ ଯାଦବ ପରିବାରରେ ଜନ୍ମ ଗ୍ରହଣ କରିଥିଲେ । ବାପା ସୁଭାସ ଯାଦବ ମାତା ଉର୍ମିଲା ଦେବୀଙ୍କ ସନ୍ତାନ ହେଉଛନ୍ତି ବାବା ବାଳକନାଥ । ଏକ ଯାଦବ ପରିବାରରେ ଜନ୍ମ ଗ୍ରହଣ କରିଥିବା ବାବା ବାଳକନାଥ 6 ବର୍ଷ ବୟସରୁ ନିଜ ପରିବାର ଛାଡିଥିଲେ । ବର୍ଷ 1985 ରୁ 1991 ପର୍ଯ୍ୟନ୍ତ ସେ ରାଜସ୍ଥାନ ହନୁମାନଗଡ ଜିଲ୍ଲାରେ ଥିବା ନାଥୱାଲୀ ଆଶ୍ରମରେ ରହି ଦିକ୍ଷା ଗ୍ରହଣ କରିବା ସହିତ ବେଦ ଶାସ୍ତ୍ର, ସନାତନ ଧର୍ମ ସଂସ୍କୃତି ଉପରେ ଜ୍ଞାନ ଆରୋହଣ କରିଥିଲେ । ପରେ ମହନ୍ତ ଚାନ୍ଦନାଥ ଯୋଗୀ ବାଳକନାଥଙ୍କୁ ନିଜ ମଠ ମସ୍ତନାଥ ମଠ ହରିୟାଣ ରୋହତକୁ ଆଣିଥିଲେ । ସେହି ମଠର ମହନ୍ତ ଏବେ ଅଛନ୍ତି ବାବା ବାଳକନାଥ ।
ରାଜନୈତିକ ଜୀବନ- ମସ୍ତନାଥ ମଠର ମହନ୍ତ ହେବା ପୂର୍ବରୁ ଜାତୀୟତା ଭାବକୁ ନେଇ ବାବା ଏକାଧିକ କାର୍ଯ୍ୟକ୍ରମ ଆୟୋଜନ କରିବା ସହିତ ଆରଏସଏସର ବହୁ କାର୍ଯ୍ୟକ୍ରମରେ ମଧ୍ୟ ସାମିଲ ହେଉଥିଲେ । ପରେ ବିଧିବଦ୍ଧ ଭାବେ ବିଜେପିରେ ସାମିଲ ହୋଇ ରାଜନୈତିକ ଜୀବନ ଆରମ୍ଭ କଲେ । ତାଙ୍କର ସାଂଗଠନିକ ଦକ୍ଷତା ଦେଖି ତାଙ୍କୁ 2019 ରେ ରାଜସ୍ଥାନ ଅଲୱର ଲୋକସଭା ଆସନରୁ ଦଳ ପ୍ରାର୍ଥୀ କରିଥିଲା । ବାଳକନାଥ ମଧ୍ୟ କଂଗ୍ରେସ ପ୍ରାର୍ଥୀଙ୍କୁ 3 ଲକ୍ଷ ଭୋଟ ବ୍ୟବଧାନରେ ପରାସ୍ତ କରି ଲୋକସଭା ପହଞ୍ଚିଥିଲେ ।