ନୂଆଦିଲ୍ଲୀ:ଆଜି ଲୋକସଭାରେ ଆଗତ ହୋଇଛି ବହୁଚର୍ଚ୍ଚିତ ମହିଳା ସଂରକ୍ଷଣ ବିଲ୍ । ସରକାରୀ ପ୍ରକ୍ରିୟା ଆରମ୍ଭ ହେବା ପୂର୍ବରୁ ମୁଖ୍ୟ ବିରୋଧୀ ଦଳ କଂଗ୍ରେସ ଏହି ବିଲ୍ ଆଗତ ନେଇ ଦାବି ଉଠାଇଥିଲା । ତେବେ ଆଜି ବିଲ୍ ଆଗତ ହେବା ପରେ ଏହାକୁ କଂଗ୍ରେସ ସମର୍ଥନ କରିବ କି ନାହିଁ ବୋଲି ଗଣମାଧ୍ୟମର ପ୍ରଶ୍ନରେ କୌଣସି ଉତ୍ତର ଦେଇନାହାନ୍ତି ଦଳର ଚର୍ଚ୍ଚିତ ନେତା ତଥା ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ । ଆଜି ସଂସଦ ଭବନ ପରିସରରେ ଏହି ବିଲକୁ କଂଗ୍ରେସ ସମର୍ଥନ କରିବ କି ନାହିଁ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ କୌଣସି ପ୍ରତିକ୍ରିୟା ରଖିବାକୁ ରାହୁଲ ମନା କରିଥିଲେ । ଉଚିତ ସମୟ ଆସିଲେ ସେ ପ୍ରତିକ୍ରିୟା ରଖିବେ ବୋଲି କହି ଚାଲିଯାଇଥିଲେ ।
ଆଜି କେନ୍ଦ୍ର ଆଇନ ମନ୍ତ୍ରୀ ଅର୍ଜୁନରାମ ମେଘଓ୍ବାଲ ଏହି ବିଲ୍କୁ ଲୋକସଭାରେ ଆଗତ କରିଥିବା ବେଳେ ଆସନ୍ତାକାଲି ଏହା ଉପରେ ଚର୍ଚ୍ଚା ହେବ । ଅଧିବେଶନର ଦ୍ବିତୀୟ କାର୍ଯ୍ୟଦିବସ ଆରମ୍ଭ ହେବା ପରେ ପ୍ରଥମ ସିଟିଂରେ ଏହି ବିଲ୍ ଆଗତ ହୋଇଛି । ଏହି ବିଲର ନାମ ରଖାଯାଇଛି ‘ନାରୀ ଶକ୍ତି ବନ୍ଦନ ଅଧିନିୟମ’ । 21ରେ ରାଜ୍ୟସଭାରେ ମଧ୍ୟ ଏହା ଆଗତ ହୋଇ ଚର୍ଚ୍ଚା ହେବ । ତେବେ ସଂଖ୍ୟା ଦୃଷ୍ଟିରୁ ଏହି ବିଲ୍ ଲୋକସଭାରେ ପାରିତ ହେବାରେ କୌଣସି ସମସ୍ଯା ନାହିଁ । ରାଜ୍ୟସଭାରେ ମଧ୍ୟ ଭାରତୀୟ ଜନତା ପାର୍ଟି ନେତୃତ୍ବାଧୀନ ଏନଡିଏ ସରକାରଙ୍କ ନିକଟରେ 2 ତୃତୀୟାଂଶ ଭୋଟ ନଥିଲେ ସୁଦ୍ଧା ଏକାଧିକ ଅଣ-ଏନଡିଏ ଦଳର ସମର୍ଥନରେ ଏହା ପାରିତ ହେବାର ଯଥେଷ୍ଟ ସମ୍ଭାବନା ରହିଛି ।