ଜୟପୁର: ଆଜି ରାଜସ୍ଥାନ ଜୟପୁରରେ ବିଶାଳ ରାଲି କରିବ କଂଗ୍ରେସ । ଦେଶରେ ଦରଦାମ୍ ବୃଦ୍ଧି(Inflation) ପ୍ରତିବାଦରେ ଏହି ରାଲି ଆୟୋଜିତ ହେବାକୁ ଯାଉଛି । ଜୟପୁରସ୍ଥିତ ବିଦ୍ୟାନଗର ଷ୍ଟାଡିୟମ ଠାରେ ଏହି 'ମହଙ୍ଗାଇ ହଟାଓ ମହାରାଲି'କୁ ସମ୍ବୋଧିତ କରିବେ କଂଗ୍ରେସ ନେତା ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଭଦ୍ରା । ରାଲିରେ ସାରା ଦେଶରୁ ବହୁସଂଖ୍ୟକ ଦଳୀୟ କାର୍ଯ୍ୟକର୍ତ୍ତା ଏବଂ ଅନ୍ୟ ପ୍ରମୁଖ ନେତା ଭାଗ ନେବେ । ଶନିବାର କଂଗ୍ରେସ ମହାସଚିବ ତଥା ରାଜସ୍ଥାନ ପ୍ରଭାରୀ ଅଜୟ ମାକନ ଏକ ସମ୍ବାଦିକ ସମ୍ମିଳନୀ ଜରିଆରେ ଏ ସମ୍ପର୍କରେ ସୂଚନା ଦେଇଛନ୍ତି ।
ମାକନ କହିଛନ୍ତି ଯେ, ମୁଦ୍ରାସ୍ଫୀତି ବୃଦ୍ଧି ବିରୁଦ୍ଧରେ ପ୍ରସ୍ତାବିତ ରାଲିରେ ପ୍ରିୟଙ୍କା ଏବଂ ରାହୁଲ ଗାନ୍ଧୀ ଯୋଗଦାନ କରିବେ । ଏହା ଏକ ରାଷ୍ଟ୍ରୀୟ ରାଲି ଅଟେ, ଯେଉଁଥିରେ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀ, ପୂର୍ବତନ ମୁଖ୍ୟମନ୍ତ୍ରୀ ମଧ୍ୟ ସାମିଲ ହେବେ । କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ ରାଲିର ଅଂଶ ହେବେ କି ନାହିଁ ତାହା ଏଯାଏଁ ସ୍ପଷ୍ଟ ହୋଇନି । କଂଗ୍ରେସ ମହାସଚିବ ରଣଦୀପ ସିଂହ ସୁରଜେୱାଲା ମଧ୍ୟ ସମ୍ମିଳନୀରେ ଦରଦାମ୍ ବୃଦ୍ଧି ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେତୃତ୍ବାଧୀନ ରାଷ୍ଟ୍ରୀୟ ଜନତାନ୍ତ୍ରିକ ଗଠବନ୍ଧନ ସରକାରଙ୍କ ନୀତି ଏବଂ ନିଷ୍ପତ୍ତିକୁ ଟାର୍ଗେଟ କରିଛନ୍ତି ।