ଚଣ୍ଡିଗଡ଼:ଭାରତୀୟ କୁସ୍ତି ମହାସଂଘର ପୂର୍ବତନ ଅଧ୍ୟକ୍ଷ ବ୍ରିଜଭୂଷଣଙ୍କୁ ନେଇ କୁସ୍ତିଯୋଦ୍ଧାଙ୍କ ମଧ୍ୟରେ କମୁନି ଅସନ୍ତୋଷ । ବ୍ରିଜଭୂଷଣଙ୍କ ଗିରଫ ଦାବିରେ ଅଡ଼ି ବସିଛନ୍ତି କୁସ୍ତିଯୋଦ୍ଧା । ଏହାରି ଭିତରେ କଂଗ୍ରେସ ନେତା ରାହୁଲ ଗାନ୍ଧୀ ଆଜି(ବୁଧବାର) ସକାଳୁ ସକାଳୁ ହରିୟାଣା ଇଜ୍ଜର ଜିଲ୍ଲାର ଛାରା ଗାଁ ଗସ୍ତ କରିଛନ୍ତି । ସେଠାରେ ବୀରେନ୍ଦ୍ର ଆର୍ଯ୍ୟ ଆଖଡ଼ାରେ ପହଞ୍ଚି ଅଲମ୍ପିକ ବିଜେତା ବଜରଙ୍ଗ ପୁନିଆଙ୍କୁ ଭେଟିଛନ୍ତି । ରାହୁଲ ଆଖଡ଼ାରେ ପହଞ୍ଚିବା ପରେ ତାଙ୍କୁ ଫୁଲତୋଡା ବଦଳରେ ତଟ୍କା ମୂଳା ଦେଇ କୁସ୍ତିଯୋଦ୍ଧାମାନେ ସ୍ବାଗତ କରିଥିଲେ । କଂଗ୍ରେସ ନେତା କୁସ୍ତିଯୋଦ୍ଧାଙ୍କ ସହ କିଛି ସମୟ ଅତିବାହିତ କରିଥିଲେ । ଏମିତିକ ପୁନିଆଙ୍କ ସହ ସେ କୁସ୍ତି ଅଭ୍ୟାସ କରିଥିବାର ମଧ୍ୟ ଦେଖିବାକୁ ମିଳିଥିଲା ।
ରାହୁଲ ଗାନ୍ଧୀ କୁସ୍ତିଯୋଦ୍ଧାଙ୍କୁ ଭେଟି ତାଙ୍କର ଦିନଚର୍ଯ୍ୟା ପଚାରି ବୁଝିଥିଲେ । କହିରଖୁଛୁ କି, ଛାରା ଗାଁରେ କୁସ୍ତିଯୋଦ୍ଧା ଦୀପକ ପୁନିଆଙ୍କ ଘର । ଉଭୟ ଦୀପକ ଓ ବଜରଙ୍ଗ ପୁନିଆ ବୀରେନ୍ଦ୍ର ଆଖଡ଼ାରେ କୁସ୍ତି ଆରମ୍ଭ କରିଥିଲେ । ତେବେ ରାହୁଲଙ୍କ ପୂର୍ବରୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଦିଲ୍ଲୀଠାରେ କୁସ୍ତିଯୋଦ୍ଧାମାନଙ୍କ ସହ ସାକ୍ଷାତ କରିଥିଲେ । ପ୍ରିୟଙ୍କା ସାକ୍ଷୀ ମଲ୍ଲିକ ଓ ବଜରଙ୍ଗ ପୁନିଆଙ୍କ ସହ କଥାବର୍ତ୍ତା ହୋଇ ସେମାନଙ୍କ ସମସ୍ୟା ବୁଝିଥିଲେ ଏବଂ କୁସ୍ତିଯୋଦ୍ଧାଙ୍କ ଲଢେଇରେ ସବୁପ୍ରକାର ସମର୍ଥନ ଦେବାକୁ ଆଶ୍ବାସନା ଦେଇଥିଲେ ।
ଏହା ମଧ୍ୟ ପଢନ୍ତୁ: Wrestlers vs Brij Bhushan: 'ଆମ ଲଢେଇ WFI ମୁଖ୍ୟଙ୍କ ବିରୋଧରେ, ସରକାରଙ୍କ ସହ ନୁହେଁ'