ହାଇଦ୍ରାବାଦ: ତେଲେଙ୍ଗାନା ରଚକୋଣ୍ଡା ସେଣ୍ଟ୍ରାଲ କ୍ରାଇମ ଷ୍ଟେସନ ପୋଲିସ ପକ୍ଷରୁ ରତ୍ନ ପଥର କାରବାର ମାମଲାରେ 17.72 କୋଟି ଟଙ୍କା ସମେତ ଗୋଟିଏ କାର ଏବଂ 10ଟି ମୋବାଇଲ ଜବତ କରାଯାଇଛି । ଘଟଣାରେ ସମ୍ପୃକ୍ତ 7 ଜଣ ଅଭିଯୁକ୍ତଙ୍କ ନାମରେ ମାମଲା ରୁଜୁ ହୋଇଛି । ଅଭିଯୁକ୍ତମାନେ ହେଲେ ଭେଲପୁରି ପ୍ରବଣ କୁମାର, ଡୋଣ୍ଡାପତି ରାମକ୍ରିଷ୍ଣ, ନଲାବୋଥୁଲା ସୁରେଶ ଗୋପି, ଚନ୍ଦୁଲୁରି ବିଜୟ କୁମାର, କମ୍ଭାପତି ସୂର୍ଯ୍ୟମ୍, ଚାନ୍ଦୁଲୁରି ନଗେନ୍ଦ୍ର ପ୍ରସାଦ, ବେଲମକୋଣ୍ଡା ମୂରଲୀକ୍ରିଷ୍ଣ ।
ସୂଚନାଯୋଗ୍ୟ, ମୂରଲୀକ୍ରିଷ୍ଣଙ୍କ ଘର ଆନ୍ଧ୍ରପ୍ରଦେଶ କ୍ରିଷ୍ଣା ଜିଲ୍ଲାରେ । ସେ ଜଣେ ଜ୍ୟୋତିର୍ବିଦ ହୋଇଥିବାବେଳେ ହାଇଦ୍ରାବାଦରେ ବସବାସ କରନ୍ତି । ଅଭିଯୁକ୍ତ ନିଜର 'ଭକ୍ତିନିଥି' ନାମକ ୱେବସାଇଟ ଯୋଗେ ଲୋକମାନଙ୍କୁ ରତ୍ନ ପଥର(ଜେମ୍ ଷ୍ଟୋନ) ବିକ୍ରୟ କରନ୍ତି । ଏପରିକି ସେ ନକଲି ନୋଟ କାରବାରରେ ମଧ୍ୟ ସମ୍ପୃକ୍ତ । ଏହି ବେଆଇନ କାରବାର ପାଇଁ ମୂରଲୀଙ୍କର କିଛି ଉଚ୍ଚସ୍ତରୀୟ ଦଳ ସହିତ ମଧ୍ୟ ବ୍ୟବସାୟିକ ସମ୍ପର୍କ ଥିବା ଜଣାପଡିଛି । ସେହିପରି ଅନ୍ୟ ଜଣେ ଅଭିଯୁକ୍ତ ନଗେନ୍ଦ୍ର ପ୍ରସାଦ ମୂରଲୀକ୍ରିଷ୍ଣଙ୍କ ଆତ୍ମୀୟ ହୋଇଥିବା ସୂଚନା ମିଳିଛି । ସେ ହିଁ ଆଉ ଜଣେ ଅଭିଯୁକ୍ତ ପବନକୁ ମୂରଲୀଙ୍କ ସହ ପରିଚିତ କରିଥିଲା ।