ନୂଆଦିଲ୍ଲୀ: 5 ରାଜ୍ଯର ବିଧାନସଭା ନିର୍ବାଚନ ପୂର୍ବରୁ ପୁଣି ଥରେ ଗାନ୍ଧୀ ପରିବାର ସହ ଜଡିତ ବହୁଚର୍ଚ୍ଚିତ ନ୍ୟାସନାଲ ହେରାଲ୍ଡ ମାମଲାରେ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) । ନ୍ୟାସନାଲ ହେରାଲ୍ଡ ମାମଲା ସହ ଜଡ଼ିତ ଦେଶର ବିଭିନ୍ନ ସ୍ଥାନରେ ଥିବା 752 କୋଟି ଟଙ୍କାର ସମ୍ପତ୍ତି ଜବତ କରିଛି ସଂସ୍ଥା । ଏନେଇ ପ୍ରବର୍ତ୍ତନ ନିର୍ଦ୍ଦେଶାଳୟ ନିଜେ ଟ୍ବିଟ୍ କରି ସୂଚନା ଦେଇଛି । ଏହି ଜବତ ସମ୍ପତ୍ତି ମଧ୍ୟରେ ଦିଲ୍ଲୀରେ ଥିବା ହେରାଲ୍ଡ ହାଉସ, ଲକ୍ଷ୍ନୌରେ ଥିବା ନେହୁରୁ ଭବନ ଓ ମୁମ୍ବାଇ ସ୍ଥିତ ନେହେରୁ ଭବନ ମଧ୍ୟ ରହିଛି । ଏଥିରୁ କିଛି ଜବତ ସମ୍ପତ୍ତି ଗାନ୍ଧୀ ପରିବାର ସହ ଜଡ଼ିତ ।
ତେବେ ଏହି ସମ୍ପତ୍ତି ମଧ୍ୟରେ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଓ ପୁଅ ତଥା ସାଂସଦ ରାହୁଲ ଗାନ୍ଧୀଙ୍କ ସହ ଜଡିତ କମ୍ପାନୀ ‘ୟଙ୍ଗ୍ ଇଣ୍ଡିଆ’ର ମାଲିକାନାରେ ଥିବା 90 କୋଟି ସମ୍ପତ୍ତି ମଧ୍ୟ ରହିଛି । ଆଜିର କାର୍ଯ୍ୟାନୁଷ୍ଠାନ ସମ୍ପର୍କରେ ଇଡି ଟ୍ବିଟ କରି ସୂଚନା ଦେଇଛି । ପିଏମଏଲଏ ଆକ୍ଟ-2000 ଅନୁସାରେ, ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଇଡି କହିଛି । ତେବେ ନିର୍ବାଚନ ପୂର୍ବରୁ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ୱାରା ଏହି କାର୍ଯ୍ୟାନୁଷ୍ଠାନକୁ କଂଗ୍ରେସ ଟାର୍ଗେଟ୍ କରିଛି । ବରିଷ୍ଠ ଆଇନଜୀବୀ ତଥା କଂଗ୍ରେସ ନେତା ଅଭିଷେକ ମନୁ ସିଙ୍ଘଭି ଏହି କାର୍ଯ୍ୟାନୁଷ୍ଠାନକୁ ଜାରି ରହିଥିବା ବିଧାନସଭା ନିର୍ବାଚନ ସହ ଯୋଡ଼ିଛନ୍ତି । ବିଧାନସଭା ନିର୍ବାଚନରେ ପରାଜୟରୁ ଧ୍ୟାନ ହଟାଇବା ପାଇଁ ଏହା ଏକଛତ୍ରବାଦୀ କାର୍ଯ୍ୟାନୁଷ୍ଠାନ ବୋଲି ସିଙ୍ଗଭି କହିଛନ୍ତି ।