Private Bus catches fire: ନାଶିକରେ ଘରୋଇ ଯାତ୍ରୀବାହୀ ବସରେ ଅଗ୍ନିକାଣ୍ଡ, ୧୪ ଯାତ୍ରୀ ଜୀବନ୍ତ ଦଗ୍ଧ

ନାଶିକରେ ଘରୋଇ ଯାତ୍ରୀବାହୀ ବସରେ ଅଗ୍ନିକାଣ୍ଡ । ୧୪ ଯାତ୍ରୀ ଜୀବନ୍ତ ଦଗ୍ଧ । ମହାରାଷ୍ଟ୍ର ନାଶିକରେ ଘରୋଇ ବସରେ ଲାଗିଲା ନିଆଁ । ବସ ଭିତରେ ଥିବା ୧୪ ଜଣ ଯାତ୍ରୀ ଜୀବନ୍ତ ଦଗ୍ଧ ହୋଇଥିବା ଜଣାପଡ଼ିଛି । ଅଧିକ ପଢନ୍ତୁ

ମୁମ୍ବାଇ: ମହାରାଷ୍ଟ୍ରର ନାଶିକ ଠାରେ ଘଟିଛି ଅଘଟଣ । ନାଶିକ-ଔରଙ୍ଗାବାଦ ରାସ୍ତା (Nashik-Aurangabad road) ର ଚିଲ୍ଲୀ ଚୌକ ହୋଟେଲ ନିକଟରେ ଶନିବାର ସକାଳେ ଏକ ଘରୋଇ ବସରେ ନିଆଁ (Private bus catches fire in Nashik) ଲାଗିଥିବା ଜଣାପଡ଼ିଛି । ଏହି ଅଗ୍ନିକାଣ୍ଡରେ ବସରେ ଥିବା ୧୪ ଜଣ ଯାତ୍ରୀ ନିଆଁରେ ପୋଡ଼ି ହୋଇ ଜୀବନ୍ତ ଦଗ୍ଧ ହୋଇଛନ୍ତି । ଘଟଣାରେ ବସ ଡ୍ରାଇଭରର ମଧ୍ୟ ମୃତ୍ୟୁ ଘଟିଥିବା ବେଳେ ଭୋର ୪ଟା ୨୦ ମିନିଟରେ ଏହି ଅଗ୍ନିକାଣ୍ଡ ଘଟିଥିଲା ।

ନାଶିକରେ ଘରୋଇ ବସରେ ଅଗ୍ନିକାଣ୍ଡ

ଏହି ବସଟି ୟବତମାଲରୁ ନାସିକ ଆଡ଼କୁ ଯାତ୍ରା କରୁଥିଲା । ବସରେ ପ୍ରାୟ ୩୦ରୁ ଅଧିକ ଯାତ୍ରୀ ରହିଥିଲେ । ଚିଲ୍ଲୀ ଚୌକ ହୋଟେଲ ନିକଟରେ ଔରଙ୍ଗାବାଦ ରାସ୍ତାରେ ଯାତ୍ରୀବାହୀ ବସଟି ଏକ ଟ୍ରକ ସହିତ ଧକ୍କା ହୋଇଥିଲା । ଏହି ଧକ୍କା ପରେ ଟ୍ରକର ଡିଜେଲ ଟ୍ୟାଙ୍କ ଖୋଲିଯାଇଥିଲା । ଡିଜେଲ ରାସ୍ତାରେ ପଡ଼ିଥିବା ବେଳେ ବସଟି ପୁଣି ଆଉ ଏକ ଚାରି ଚକିଆ ଯାନ ସହିତ ଧକ୍କା ହୋଇଥିଲା । ଏହାପରେ ବସରେ ସଙ୍ଗେ ସଙ୍ଗେ ନିଆଁ ଲାଗିବା ସହିତ ଅଗ୍ନିକାଣ୍ଡ ଘଟିଥିଲା ।

ତେବେ ରାତି ସମୟ ହୋଇଥିବାରୁ ବସ୍‌ରେ ଅନେକ ଯାତ୍ରୀ ଶୋଇଥିଲେ । ହଠାତ୍‌ ଦୁର୍ଘଟଣା ସମ୍ପର୍କରେ କେହି ବୁଝିବା ଆଗରୁ କ୍ଷଣିକ ମଧ୍ୟରେ ବସରେ ଲାଗିଥିଲା ନିଆଁ । କିଛି ସେକେଣ୍ଡ ମଧ୍ୟରେ ଅନେକ ଯାତ୍ରୀଙ୍କ ଶରୀରରେ ନିଆଁ ଲାଗିଥିଲା । ଫଳରେ ଅନେକ ଯାତ୍ରୀ ଜୀବନ ବଞ୍ଚାଇ ବାହାରକୁ ପଳାଇ ଆସିଥିବା ବେଳେ ଆଉ କିଛି ଯାତ୍ରୀ ଜୀବନ୍ତ ଦଗ୍ଧ ହୋଇଛନ୍ତି । ନାଶିକ ପୋଲିସ ଘଟଣା ସମ୍ପର୍କରେ ଖବର ପାଇବା ପରେ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଜାରି ରଖିଛି ।

ଅନ୍ୟପଟେ ମୁମ୍ବାଇର ନ୍ୟୁ ତିଲକ ନଗର ଅଞ୍ଚଳରେ ମଧ୍ୟ ଅଗ୍ନିକାଣ୍ଡ ଘଟିଛି । ଏଠାରେ ଏକ ଆବାସିକ କୋଠାରେ ଅଗ୍ନିକାଣ୍ଡ ଘଟିଥିବା ବେଳେ ସେଠାରେ ରହୁଥିବା ପ୍ରାୟ ୨୦ଟି ବାସଭବନକୁ ସୁରକ୍ଷାର ସହିତ ସ୍ଥାନାନ୍ତରିତ କରାଯାଇଛି । ଉକ୍ତ ସ୍ଥାନରେ ଏବେ ବି ଉଦ୍ଧାର କାର୍ଯ୍ୟ ଜାରି ରହିଛି । ଅଗ୍ନିକାଣ୍ଡ ଘଟିବା ପରେ ଲୋକମାନେ ଝରକା ଦେଇ ତଳକୁ ଡେଇଁବାକୁ ଉଦ୍ୟମ କରୁଥିବା ମଧ୍ୟ ଦେଖିବାକୁ ମିଳିଥିଲା ।

ବ୍ୟୁରୋ ରିପୋର୍ଟ, ଇଟିଭି ଭାରତ