ନୂଆଦିଲ୍ଲୀ:ଏକ ଗୁରୁତ୍ବପୂର୍ଣ୍ଣ ଘଟଣାକ୍ରମେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସାମର ସମସ୍ତ ଲୋକସଭା ଓ ରାଜ୍ୟସଭା ସାଂସଦଙ୍କୁ ସାକ୍ଷାତ କରିବେ । ଗତ ମାସ ସୀମାରେ ଘଟିଥିବା ସଂଘର୍ଷକୁ ନେଇ ଏବେ ଦୁଇ ନର୍ଥ ଇଷ୍ଟ ପଡୋଶୀ ଆସାମ ଓ ମିଜୋରାମ ମୁହାଁମୁହିଁ ସ୍ଥିତିରେ । ସୀମାରେ ଶାନ୍ତି ବଜାୟ ପାଇଁ କେନ୍ଦ୍ରୀୟ ସୁରକ୍ଷା ବଳ ମୁତୟନ ହୋଇଛନ୍ତି ସତ ହେଲେ ସ୍ଥିତି ଏଯାଏଁ ହୋଇନାହିଁ ସ୍ବାଭାବିକ ।
ଏବେ ନର୍ଥଇଷ୍ଟର ଏହି ଦୁଇ ରାଜ୍ୟର ପୁରୁଣା ବିବାଦକୁ ସମାଧାନ କରି ବିକାଶ ରାସ୍ତାରେ ନେଇଯିବାକୁ କେନ୍ଦ୍ର ସରକାର ଉଦ୍ୟମ ଆରମ୍ଭ କରିଛନ୍ତି । ଘଟଣା ପର ଠାରୁ ଉଭୟ ରାଜ୍ୟ କେନ୍ଦ୍ର ଉପରେ ସବୁ ଛାଡି ଦେଇଥିବାରୁ ଏବେ କେନ୍ଦ୍ର ସରକାର ବିବାଦର ସମାଧାନ ପାଇଁ ଉଦ୍ୟମ ଆରମ୍ଭ କରିଛନ୍ତି । ଘଟଣା ପରଠାରୁ ୨ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି ଗୃହମନ୍ତ୍ରୀ ଅମିତ ଶାହା । ଏହାବାଦ ଉଭୟ ରାଜ୍ୟର ମୁଖ୍ୟ ଶାସନ ସଚିବ ଓ ପୋଲିସ ମହାନିର୍ଦ୍ଦେଶକଙ୍କୁ ଦିଲ୍ଲୀ ଡକାଇ କେନ୍ଦ୍ର ଗୃହ ସଚିବ ଆଲୋଚନା କରିଛନ୍ତି ।