ଓ୍ବାଶିଂଟନ:ଋଷର ଆକ୍ରମଣ ଓ ୟୁକ୍ରେନରେ ଜାରି ରହିଥିବା ଧ୍ବଂସଳୀଳା ଉପରେ ଏବେ ବିଶ୍ବ ସମୂଦାୟ ନଜର ରଖିଥିବା ବେଳେ ପ୍ରାରମ୍ଭରୁ ୟୁକ୍ରେନକୁ ଋଷ ବିରୋଧରେ ବଳ ଯୋଗାଇ ଆସୁଥିବା ଆମେରିକାର ଆଭିମୁଖ୍ୟକୁ ସମସ୍ତେ ଅପେକ୍ଷା କରିଛନ୍ତି । ଏହାରି ମଧ୍ୟରେ ଆଜି ଆମେରିକା ରାଷ୍ଟ୍ରପତି ଜୋ ବାଇଡେନ ହ୍ବାଇଟ ହାଉସରେ ଥିବା ଯୁଦ୍ଧ ପ୍ରକୋଷ୍ଠ (Situation Room)ରେ ସ୍ଥିତି ନେଇ ଉଚ୍ଚସ୍ତରୀୟ ସମୀକ୍ଷା ବୈଠକ କରିଛନ୍ତି । ବାଇଡେନ ପ୍ରଶାସନର ବହୁ ଗୁରୁତ୍ବପୂର୍ଣ୍ଣ ସାମରିକ ଅଧିକାରୀ ମଧ୍ୟ ଉପସ୍ଥିତ ରହିଛନ୍ତି । ଏହି ସମୀକ୍ଷା ବୈଠକ ପରେ ଆମେରିକା ତାର ପରବର୍ତ୍ତୀ କାର୍ଯ୍ୟପନ୍ଥା ସ୍ଥିର କରିପାରେ ।
ଋଷର ୟୁକ୍ରେନ ଆକ୍ରମଣ ଆନ୍ତର୍ଜାତୀୟ ନିୟମର ସମ୍ପୂର୍ଣ୍ଣ ଉଲ୍ଲଙ୍ଘନ । ଏହାକୁ ନିନ୍ଦା କରିବା ସହ ଏପରି ସମୟରେ ୟୁକ୍ରେନକୁ କିପରି ସହାୟତା ପ୍ରଦାନ କରାଯାଇ ପାରିବ ତାକୁ ନେଇ ରାଷ୍ଟ୍ରପତି ବାଇଡେନ ସମୀକ୍ଷା କରିଥିବା ହ୍ବାଇଟ ହାଉସ ପକ୍ଷରୁ କୁହାଯାଇଛି । ତେବେ ବିଶ୍ବର ପ୍ରମୁଖ କୌଣସି ସଙ୍କଟ ତଥା ଯୁଦ୍ଧ ପରିସ୍ଥିତି ଦେଖାଗଲେ ଓ୍ବାରରୁମରେ ଆମେରିକା ରାଷ୍ଟ୍ରପତି ସ୍ଥିତି ସମୀକ୍ଷା କରିବା ସହ କୌଣସି ସର୍ବୋଚ୍ଚ ନିଷ୍ପତ୍ତି ନେବାର ନଜିର ମଧ୍ୟ ରହିଛି ।