ନୂଆଦିଲ୍ଲୀ:ଜମ୍ମୁ ଏବଂ କାଶ୍ମୀର ସୁରକ୍ଷା ପ୍ରସଙ୍ଗକୁ ନେଇ ଚିନ୍ତାରେ ସୁରକ୍ଷାବାହିନୀ । ଏହି ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିବା ବେଳେ ଏବେ ଆତଙ୍କୀ ସାଟେଲାଇଟ ଫୋନର ବ୍ୟବହାର କରିବା ସୁରକ୍ଷା ବଳ ପାଇଁ ଏକ ଚ୍ୟାଲେଞ୍ଜ ପାଲିଟିଛି । ତେବେ ମିଳିଥିବା ଖବର ଅନୁଯାୟୀ ଜମ୍ମୁ ଏବଂ କାଶ୍ମୀରରେ ଏବେ ଇରିଡିୟମ ସାଟେଲାଇଟ ଫୋନ ବ୍ୟବହାରର ସକ୍ରିୟତା ନେଇ କେନ୍ଦ୍ରୀୟ ସୁରାକ୍ଷା ବଳ ଲାଗି ଟେନସନ ପାଲିଟିଛି । ସେହିପରି ଗୁଇନ୍ଦା ବିଭାଗ ସୂଚନା ଅନୁସାରେ, ଜମ୍ମୁ ଏବଂ କାଶ୍ମୀର ଅଞ୍ଚଳରେ ଏବେ ସାଟେଲାଇଟ ଫୋନ ସକ୍ରିୟ ଭାବେ ବ୍ୟବହାର କରାଯାଉଛି । ଏହି ଫୋନ ସବୁ ଆତଙ୍କବାଦୀ କାର୍ଯ୍ୟକଳାପରେ ବ୍ୟବହରା କରାଯାଉଥିବା ଗୁଇନ୍ଦା ବିଭାଗ ଜାଣିବାକୁ ପାଇଛି । ଏଥିସହ କାଶ୍ମୀର ଭ୍ୟାଲି ଓ ପାକିସ୍ତାନ ଅଧିକୃତ କାଶ୍ମୀରରେ ଏହି ସାଟେଲାଇଟ ଫୋନର ବ୍ୟବହାର ବ୍ୟାପକ ପରିମାଣରେ ହେଉଥିବା ଗୁଇନ୍ଦା ବିଭାଗ ଜାଣିବାକୁ ପାଇଛି ।
ସେହିଭଳି ଏତେ ସଂଖ୍ୟକ ସାଟେଲାଇଟ ଫୋନର ବ୍ୟବହାର ଯୋଗଁ ଜୁନ୍ ୩୦ରେ ହେବାକୁ ଥିବା ଅମରନାଥ ଯାତ୍ର ସୁରକ୍ଷା ନେଇ ସୁରକ୍ଷା ବାହିନୀର ଚିନ୍ତା ବଢାଇଛି । ତେବେ ଏହି ଯାତ୍ରରେ ପ୍ରାୟ ୭ ଲକ୍ଷ ଶ୍ରଦ୍ଧାଳୁ ଆସିବାକୁ ଥିବା ବେଳେ ସୁରକ୍ଷା ସେନା ପାଇଁ ବଡ ଚ୍ୟାଲେଞ୍ଜିଂ ହେବ । ଏପଟେ କୌଣସି ଅଘଟଣ ଏଡେଇବା ପାଇଁ ସୁରକ୍ଷା ବଳ ଏବଂ ସୁରକ୍ଷା ଏଜେନ୍ସି ପକ୍ଷରୁ ପ୍ରସ୍ତୁତି ଆରମ୍ଭ କରାଯାଇଛି ।
ଏତଦ୍ବ୍ୟତିତ୍ ଶ୍ରଦ୍ଧାଳଙ୍କୁ ସୁରକ୍ଷିତ ଯାତ୍ରା ଓ ଦର୍ଶନ ଲାଗି ଏକ ନିରାପଦ ରାସ୍ତା ଯୋଗାଇବା ପାଇଁ ସେନା ପକ୍ଷରୁ ସୁରକ୍ଷା ପ୍ରସ୍ତୁତି ଆରମ୍ଭ କରାଯାଇଛି । ଏଥିସହ ଚଳିତ ବର୍ଷ ବହୁ ସଂଖ୍ୟାରେ ତୀର୍ଥଯାତ୍ରୀଙ୍କ ଆଗମନକୁ ଦେଖି ସୁରକ୍ଷା ଏଜେନ୍ସିଗୁଡିକ ଜମ୍ମୁ ଏବଂ କାଶ୍ମୀରରେ ସୁରକ୍ଷା ଢାଞ୍ଚାରେ ଥିବା ସମସ୍ତ ଫାଙ୍କା ପୂରଣ ପାଇଁ କାର୍ଯ୍ୟ କରୁଛନ୍ତି ବୋଲି ସରକାରୀ ସୂତ୍ରରୁ ଜଣାପଡିଛି । ଏପଟେ ଜମ୍ମୁ ଏବଂ କାଶ୍ମୀରରେ ସାଟେଲାଇଟ ଫୋନ ବ୍ୟବହାର ହେଉଥିବା ନେଇ ଚଳିତ ବର୍ଷ ଫେବୃଆରୀ ମାସରେ ଗୁଇନ୍ଦା ବିଭାଗ ଜାଣିବାକୁ ପାଇଥିଲା ।
ଅପରପକ୍ଷରେ କାଶ୍ମୀର ଭ୍ୟାଲି ଓ ପାକ ଅଧିକୃତ କାଶ୍ମୀରରେ ୮ଟି ସାଟେଲାଇଟ ଫୋନ ବ୍ୟବାହାର ହେଉଥିବା ଖବର ମିଳିଥିଲା । ତେବେ ଏହା ଦ୍ବାରା ଜମ୍ମୁ ଏବଂ କାଶ୍ମୀରରେ ଲୁଚି ରହିଥିବା ଆତଙ୍କବାଦୀ ଏବଂ ପିଓକେ(PoK)ରେ ସେମାନଙ୍କ ହ୍ୟାଣ୍ଡେଲରମାନଙ୍କ ମଧ୍ୟରେ ଯୋଗାଯୋଗ ହେଉଥିବା ଗୁଇନ୍ଦା ବିଭାଗ ଜାଣିବାକୁ ପାଇଥିଲା । ବର୍ତ୍ତମାନ ତଥ୍ୟରୁ ଜଣାପଡୁଛି ଯେ, ଏହି ସଂଖ୍ୟା ଦୁଇ-ଡଜନରୁ ଅଧିକ ହୋଇଯାଇଛି ।