ଚଣ୍ଡିଗଡ: ପ୍ରଧାନମନ୍ତ୍ରୀ ମୋଦିଙ୍କ ଗସ୍ତରେ ସୁରକ୍ଷା ବିଭ୍ରାଟ ଓ କାର୍ଯ୍ୟକ୍ରମ ବାତିଲ ପ୍ରସଙ୍ଗରେ ପ୍ରତିକ୍ରିୟା ପ୍ରକାଶ କରିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନୀ । ମୁଖ୍ୟମନ୍ତ୍ରୀ ଚନ୍ନୀ ସୁରକ୍ଷା ତଥା ପ୍ରଧାନମନ୍ତ୍ରୀଙ୍କ ପ୍ରୋଟୋକଲର ଅବହେଳା ଅଭିଯୋଗକୁ ସମ୍ପୂର୍ଣ୍ଣ ଖଣ୍ଡନ ସହ ଭିନ୍ନ କରଣ ମଧ୍ୟ ଦର୍ଶାଇଛନ୍ତି ।
ଖରାପ ପାଗ ଯୋଗୁ ପ୍ରଧାନମନ୍ତ୍ରୀଙ୍କ ହେଲିକପ୍ଟର ଉଡାଣ ସମ୍ଭବ ନହେବା କାରଣରୁ ପ୍ରଧାନମନ୍ତ୍ରୀଙ୍କ ଗସ୍ତ ବାତିଲ କରିବା ପାଇଁ ପରାମର୍ଶ ଦେଇଥିଲା ପଞ୍ଜାବ ପୋଲିସ । ତେବେ ଶେଷ ମୁହୂର୍ତ୍ତରେ ପ୍ରଧାନମନ୍ତ୍ରୀ ସଡକ ପଥରେ ସଭାସ୍ଥଳ ଅଭିମୁଖେ ଯାତ୍ରା ଆରମ୍ଭ କରିଥିଲେ । ଯାତ୍ରା ପାଇଁ ନିର୍ଦ୍ଧାରିତ ହୋଇଥିବା ମାର୍ଗ ସମ୍ପର୍କରେ ମଧ୍ୟ ସ୍ଥାନୀୟ ପୋଲିସ ପାଖରେ ମଧ୍ୟ କିଛି ସୂଚନା ନଥିବା କହିଛନ୍ତି ମୁଖ୍ୟମନ୍ତ୍ରୀ ଚନ୍ନୀ । ତେଣୁ ଏପରି ବ୍ୟତିକ୍ରମ ସାମ୍ନାକୁ ଆସିଲା । ଏଥିରେ ପଞ୍ଜବ ପୋଲିସ ପକ୍ଷରୁ କୌଣସି ତ୍ରଟି ହୋଇନାହିଁ ବୋଲି କହିବା ସହ ସେ ଏହି ଘଟଣା ପାଇଁ ଦୁଖଃ ମଧ୍ୟ ପ୍ରକାଶ କରିଛନ୍ତି । ଏହାସହ ତଦନ୍ତ କରାଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ଚନ୍ନୀ ।
ଘଟଣା ପରେ ସାରା ଦେଶରେ ଚର୍ଚ୍ଚା ଆରମ୍ଭ ହୋଇଛି । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏପରି ବ୍ୟତିକ୍ରମ ପାଇଁ ପଞ୍ଜାବ ସରକାରଙ୍କୁ ସିଧାସଳଖ ଦାୟୀ ବୋଲି ଦର୍ଶାଇବା ସହ ଏହା ଏକ ଷଡଯନ୍ତ୍ର ବୋଲି କହିଛନ୍ତି । ପଞ୍ଜାବରେ କ୍ଷମତାରେ ଥିବା କଂଗ୍ରେସ ସରକାର ପ୍ରଧାନମନ୍ତ୍ରୀଙ୍କ ସୁରକ୍ଷା ପରି ସମ୍ବେଦନଶୀଳ ପ୍ରସଙ୍ଗରେ ଖେଳଓ୍ବାଡ କରିଛି । ଆଗାମୀ ବିଧାନସଭା ନିର୍ବାଚନରେ ପରାଜିତ ହେବା ଭୟରେ ପ୍ରଧାନମନ୍ତ୍ରୀଙ୍କ ଗସ୍ତ ଓ ତାଙ୍କ କାର୍ଯ୍ୟକ୍ରମକୁ ରୋକିବା ତାଙ୍କ ସୁରକ୍ଷା ପ୍ରସଙ୍ଗରେ ମଧ୍ୟ ଷଡଯନ୍ତ୍ର କରିବାକୁ କଂଗ୍ରେସ ସରକାର ପଛଘୁଞ୍ଚା ଦେଇନଥିବା ନଡ୍ଡା କହିଛନ୍ତି ।