ନୂଆଦିଲ୍ଲୀ:ଆଜି ସିବିଆଇର ହୀରକ ଜୟନ୍ତୀ । ପ୍ରଧାମନ୍ତ୍ରୀ ନରେନ୍ଦ୍ର ମୋଦି ଆଦି ଦିଲ୍ଲୀରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ)ର ହୀରକ ଜୟନ୍ତୀ ସମାରୋହକୁ ଉଦଘାଟନ କରିବେ । ଏନେଇ ଗତକାଲି( ରବିବାର) ପିଏମଓ କାର୍ଯ୍ୟାଳୟ ପକ୍ଷରୁ ଏକ ବିବୃତ୍ତି ଜାରି କରାଯାଇ ସୂଚନା ଦିଆଯାଇଛି । ବିବୃତ୍ତି ଅନୁସାରେ, ଏହି କାର୍ଯ୍ୟକ୍ରମରେ ନିଜର କାର୍ଯ୍ୟଦକ୍ଷତା ପାଇଁ ରାଷ୍ଟ୍ରପତି ପଦକ ଏବଂ ସ୍ବର୍ଣ୍ଣ ପଦକ ପାଇବାରକୁ ଯୋଗ୍ୟ ବିବେଚିତ ହୋଇଥିବା ଅଧିକାରୀ ଯୋଗଦେବେ । ସେମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଦକ ଦେଇ ସମ୍ମାନିତ କରାଇବେ ।
ସୂଚନାଅନୁସାରେ, ଆଜି(ସୋମବାର) ମଧ୍ୟାହ୍ନ ୧୨ଟା ସମୟରେ ଦିଲ୍ଲୀର ବିଜ୍ଞାନ ଭବନରେ ସିବିଆଇର ହୀରକ ସମାରୋହକୁ ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାସହ ଭିଡିଓ କନଫେରେନ୍ସ ଜରିଆରେ ଶିଲଂ, ପୁଣେ ଏବଂ ନାଗପୁରରେ ହୋଇଥିବା ସିବିଆଇର ନବନିର୍ମିତ କାର୍ଯ୍ୟାଳୟକୁ ମଧ୍ୟ ଉଦଘାଟନ କରିବେ । ଜାରି କରାଯାଇଥିବା ବିବୃତ୍ତିରେ କୁହାଯାଇଛି ଯେ, ସିବିଆଇର ହୀରକ ଜୟନ୍ତୀ ଉତ୍ସବ ପାଳନ କରିବା ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡାକ ଟିକଟ ଏବଂ ମୁଦ୍ରା ଜାରି କରିବେ । ଏହାସହ ଆଜି ଅନୁସନ୍ଧାନକାରୀ ସଂସ୍ଥାର ଟ୍ବିଟର ପେଜକୁ ମଧ୍ୟ ଜାରି କରିବେ ପ୍ରଧାନମନ୍ତ୍ରୀ । ଗତବର୍ଷ ଅକ୍ଟୋବର ମାସରେ ଇଣ୍ଟରପୋଲ ମହାସଭାରେ ସିବିଆଇ ପ୍ରଥମେ ଟ୍ବିଟର ଆରମ୍ଭ କରିଥିଲା ।