ବିଶ୍ବବିଦ୍ୟାଳୟ ଛାତ୍ରଛାତ୍ରୀଙ୍କ ଆଡମିଟ୍‌ କାର୍ଡରେ ପ୍ରଧାନମନ୍ତ୍ରୀ ଓ ରାଜ୍ୟପାଳଙ୍କ ଫଟୋ

ବିହାରର ଲଳିତ ନାରାୟଣ ମିଥିଳା ବିଶ୍ବବିଦ୍ୟାଳୟରେ ବ୍ୟାପକ ଅବ୍ୟବସ୍ଥା । ଛାତ୍ରଛାତ୍ରୀଙ୍କ ଆଡମିଟ୍‌ କାର୍ଡରେ ଲାଗିଛି ପ୍ରଧାନମନ୍ତ୍ରୀ ମୋଦି ଓ ରାଜ୍ୟପାଳ ଫଗୁ ଚୌହାନଙ୍କ ଫଟୋ (PM Modi Photo Viral)। ଛାତ୍ରଛାତ୍ରୀଙ୍କୁ ଦାୟୀ କଲେ କଲେଜ କର୍ତ୍ତୁପକ୍ଷ । କହିଲେ ବଦନାମ କରିବା ପାଇଁ ହୋଇଛି ଷଡଯନ୍ତ୍ର । ନିଆଯିବ କଡା କାର୍ଯ୍ୟାନୁଷ୍ଠାନ । ଅଧିକ ପଢନ୍ତୁ

ପାଟନା:ବିହାରର ଦରଭଙ୍ଗାରେ ଥିବା ଲଳିତ ନାରାୟଣ ମିଥିଳା ବିଶ୍ବବିଦ୍ୟାଳୟ (Lalit Narayan Mithila University Darbhanga) ପୂର୍ବରୁ ମଧ୍ୟ କିଛି ନା କିଛି ଅବ୍ୟବସ୍ଥା ପାଇଁ ସର୍ବଦା ଚର୍ଚ୍ଚାର ପରିସରରେ ରହି ଆସିଛି । ତେବେ ଚଳିତ ଥର କିଛି ଭିନ୍ନ କାରନାମା ପାଇଁ ଏବେ ଚର୍ଚ୍ଚାରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ । ସ୍ନାତକ ତୃତୀୟ ବର୍ଷର କିଛି ଛାତ୍ରଛାତ୍ରୀଙ୍କ ଆଡମିଟ କାର୍ଡରେ ପରୀକ୍ଷାର୍ଥୀଙ୍କ ବଦଳରେ ରହିଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିହାର ରାଜ୍ୟପାଳ ଫଗୁ ଚୌହାନଙ୍କ ଫଟୋ (PM Modi Photo Viral)। ଯାହାକୁ ନେଇ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କ କାର୍ଯ୍ୟଶୈଳୀକୁ ନେଇ ପ୍ରଶ୍ନବାଚୀ ସହ ଅସନ୍ତୋଷ ଦେଖିବାକୁ ମିଳିଛି ।

ଆଡମିଟ କାର୍ଡରେ ପିଏମ ମୋଦିଙ୍କ ଫଟୋ:

ବିଶ୍ୱବିଦ୍ୟାଳୟର (Lalit Narayan Mithila University Darbhanga) ରେଜିଷ୍ଟ୍ରାର ଏଥିପାଇଁ ଛାତ୍ରଙ୍କୁ ଦାୟୀ କରିଥିବାବେଳେ, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ବୋଲି କହିଛନ୍ତି । ଲଲିତ ନାରାୟଣ ମିଥିଳା ​​ବିଶ୍ୱବିଦ୍ୟାଳୟର ସ୍ନାତକୋତ୍ତର ତୃତୀୟ ବର୍ଷ ପରୀକ୍ଷାର ଆଡମିଟ୍ କାର୍ଡ ବିଶ୍ୱବିଦ୍ୟାଳୟ ପ୍ରକାଶ କରିଥିଲା । ଯେଉଁଥିରେ ବିଶ୍ବ ବିଦ୍ୟାଳୟ ଅଧୀନରେ ଆସୁଥିବା ଜିଡି କଲେଜର ଜଣେ ଛାତ୍ର ରବିଶ କୁମାର ସାନୁଙ୍କ ଆଡମିଟ୍ କାର୍ଡରେ ବିହାର ରାଜ୍ୟପାଳ ଫାଗୁ ଚୌହାନଙ୍କ ଫଟୋ ଲାଗିଥିବା ଦେଖିବାକୁ ମିଳିଥିଲା (PM Modi picture on LNMU student admit card) ।

ଅନ୍ୟ ଜଣେ ଛାତ୍ରୀଙ୍କ କ୍ଷେତ୍ରରେ ମଧ୍ୟ ଏପରି ବ୍ୟତିକ୍ରମ ଦେଖିବାକୁ ମିଳିଥିଲା । ଏସଏମଜେ କଲେଜ ମଧୁବାଣୀର ଭୂଗୋଳ ଛାତ୍ର ଗୁଡିଆ କୁମାରୀଙ୍କ ଆଡମିଟ କାର୍ଡରେ ତାଙ୍କ ନିଜ ଫଟୋ ବଦଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫଟୋ ଲାଗିଥିବା ଦେଖିବାକୁ ମିଳିଛି । ଏପରି ଦୁଇଟି ଘଟଣା ସାମ୍ନାକୁ ଆସିବା ପରେ ବିଶ୍ୱବିଦ୍ୟାଳୟର କାର୍ଯ୍ୟଶୈଳୀ ଓ ଦାୟିତ୍ବହୀନତା ନେଇ ଛାତ୍ରଛାତ୍ରୀ ଓ ଅଭିବାବକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି ।

ଛାତ୍ରଛାତ୍ରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ:

ଘଟଣାକୁ ନେଇ ବିଶ୍ୱବିଦ୍ୟାଳୟର ରେଜିଷ୍ଟ୍ରାର ଡ.ମୁସ୍ତାକ୍ ଅହମ୍ମଦ କହିଛନ୍ତି ଏହା ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କ ତ୍ରୁଟି ନୁହେଁ ବରଂ କିଛି ଛାତ୍ର ଉଦ୍ଦେଶ୍ୟମୂଳକ ଭାବେ ଏପରି କରି କଲେଜକୁ ବଦନାମ କରିବାକୁ ଚେଷ୍ଟା କରିଛନ୍ତି । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ କୂଳପତିଙ୍କ କାର୍ଯ୍ୟାଳୟରୁ ନିର୍ଦ୍ଦେଶ ଆସିସାରିଛି । ଆବଶ୍ୟକ ପଡିଲେ ସେମାନଙ୍କ ନାମରେ ଥାନାରେ ଏତଲା ମଧ୍ୟ ଦାଏର କରାଯାଇପାରେ । ତଦନ୍ତ ପରେ ଏପରି କେମିତି ହେଲା ତାହା ସ୍ପଷ୍ଟ ହେବା ନେଇ ସେ କହିଛନ୍ତି ।