ମୋଦି-ମମତା ସମ୍ପର୍କ: କେବେ ତିଖା ତ, କେବେ ମିିଠା

ରାଜନୈତିକ ବିବାଦ ସତ୍ତ୍ବେ ମଧ୍ୟ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ସୁସମ୍ପର୍କ ରହିଛି । ଶନିବାର ମୁଖ୍ୟ ବିଚାରପତି ଓ ମୁଖ୍ୟମନ୍ତ୍ରୀମାନଙ୍କ ସମ୍ମିଳନୀରେ ଏହାର ଏକ ଉଦାହରଣ ମଧ୍ୟ ଦେଖିବାକୁ ମିଳିିଛି । ଅଧିକ ପଢନ୍ତୁ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ମଧ୍ୟରେ ରାଜନୈତିକ ବିବାଦ ଯେ କେତେ ତୀବ୍ର ତାହା ସମସ୍ତେ ଜାଣନ୍ତି । ଏପରି କି ଉଭୟଙ୍କ ମନ୍ତବ୍ୟ ଓ ପରସ୍ପର ପ୍ରତି ବୟାନରେ ମଧ୍ୟ ଏହି କଥା ପ୍ରତିଫଳିତ ହେବାର ଦେଖାଯାଏ । କିନ୍ତୁ ରାଜନୀତିରେ ସବୁକିଛି ଯେପରି ଦେଖାଯାଏ ବାସ୍ତବରେ ତାହା ସେପରି ନୁହେଁ, ଏହି ଉକ୍ତିକୁ ବୁଝିବା ପାଇଁ ମୋଦି-ମମତାଙ୍କ ସମ୍ପର୍କକୁ ଉଦାହରଣ ଭାବେ ନିଆ ଯାଇପାରେ । ଶନିବାର ମୁଖ୍ୟ ବିଚାରପତି ଓ ମୁଖ୍ୟମନ୍ତ୍ରୀମାନଙ୍କ ସମ୍ମିଳନୀରେ ମମତା ଏବଂ ମୋଦି ମୁହାଁମୁହିଁ ହୋଇଥିଲେ, ସେତେବେଳେ ଏପରି ବ୍ୟତିକ୍ରମ ଦେଖିବାକୁ ମିଳିଥିଲା ।

ଏହି କାର୍ଯ୍ୟକ୍ରମରେ ପ୍ରଧାନ ବିଚାରପତି ଏନ.ଭି ରାମଣା ମଧ୍ୟ ଉପସ୍ଥିତ ଥିଲେ । ସୋସିଆଲ ମିଡିଆରେ ସେମାନଙ୍କ ସାକ୍ଷାତର ଏକ ଭିଡିଓ ଦିନକୁ ଦିନ ଭାଇରାଲ ହେବାରେ ଲାଗିଛି । ଏଥିରେ ପ୍ରଧାନମନ୍ତ୍ରୀ ମୋଦି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ନାଲି ଲଙ୍କା (Red chilli) ଉପରେ କିଛି ବୁଝାଉଥିବାବେଳେ ମମତା ମଧ୍ୟ ମୋଦିଙ୍କ କଥା ବେଶ ଉତ୍ସୁକତାର ସହ ଶୁଣୁଥିବା ଦେଖିବାକୁ ମିଳିଛି । ଏହି ବାର୍ତ୍ତାଳାପ ସମୟରେ ମୋଦି ଓ ମମତାଙ୍କ ମଝିରେ ପ୍ରଧାନ ବିଚାରପତି ରମଣା ମଧ୍ୟ ଉପସ୍ଥିତ ରହିଛନ୍ତି ।

ପ୍ରଧାନମନ୍ତ୍ରୀ ମୋଦି ଏବଂ ମମତାଙ୍କ ସମ୍ପର୍କରେ ତିକ୍ତତା ଥିଲେ ମଧ୍ୟ କିଛି ସାର୍ବଜନୀନ ମଞ୍ଚରେ ଉଭୟଙ୍କ ଆଚରଣ ସେମାନଙ୍କ ବ୍ୟକ୍ତିଗତ ସୁସମ୍ପର୍କର ପରିଚୟ ଦେଇଥାଏ । ମମତା ଥରେ କହିଥିଲେ ଯେ ସେ ପ୍ରତିବର୍ଷ ପ୍ରଧାନମନ୍ତ୍ରୀ ମୋଦିଙ୍କ ନିକଟକୁ ପଶ୍ଚିମବଙ୍ଗର ପ୍ରସିଦ୍ଧ ଆମ୍ବ ପଠାନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ, ଗତବର୍ଷ ମମତା ବାନାର୍ଜୀ ମୋଦିଙ୍କ ନିକଟକୁ ସାଗର, ମାଲଦା ଏବଂ ଲକ୍ଷ୍ମଣଭୋଗ ଆମ୍ବ ମଧ୍ୟ ପଠାଇଥିଲେ ।

ପ୍ରଧାନମନ୍ତ୍ରୀ ମୋଦି ଏହା ମଧ୍ୟ କହିଛନ୍ତି ଯେ ଦିଦି ତାଙ୍କ ପାଇଁ ପ୍ରତିବର୍ଷ କୁର୍ତ୍ତା ଏବଂ ପଶ୍ଚିମବଙ୍ଗ ମିଠା ପଠାନ୍ତି । ରାଜନୈତିକ ମନ୍ତାନ୍ତର ସତ୍ତ୍ବେ ମଧ୍ୟ ଉଭୟଙ୍କ ମଧ୍ୟରେ ଭଲ ସମ୍ପର୍କ ରହିଛି ବୋଲି ପ୍ରଧାନମନ୍ତ୍ରୀ ମୋଦି କହିଥିଲେ । ଅବଶ୍ୟ ରାଜନୈତିକ ପ୍ରସଙ୍ଗରେ ଉଭୟ ପରସ୍ପରର କଠୋର ବିରୋଧି ଭାବେ ନଜର ମଧ୍ୟ ଆସନ୍ତି । କିନ୍ତୁ ରାଜନୈତିକ ମନ୍ତାନ୍ତର ଯେ, ବ୍ୟକ୍ତିଗତ ସମ୍ପର୍କରେ ପ୍ରଭାବ ପକାଇପାରେ ନାହିଁ ତାହା ଏହି ଭିଡିଓରେ ପ୍ରମାଣିତ ହୋଇଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ