ନୂଆଦିଲ୍ଲୀ: ଶିକ୍ଷା କ୍ଷେତ୍ରରେ ବଜେଟକୁ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦେଶର ଯୁବଗୋଷ୍ଠୀ ତଥା ଭବିଷ୍ୟତ ନେତାଙ୍କ ପାଇଁ ୫ଟି ପଏଣ୍ଟରେ ଆଲୋଚନା କରିବା ସହ ଚଳିତ ବର୍ଷ କେନ୍ଦ୍ର ବଜେଟ୍ ଶିକ୍ଷା କ୍ଷେତ୍ରରେ କିପରି ସକରାତ୍ମକ ପ୍ରଭାବ ପକାଇବ ବୋଲି କହିଛନ୍ତି । ବଜେଟରେ ହୋଇଥିବା ଘୋଷଣା ଗୁଡିକୁ ତୁରନ୍ତ କାର୍ଯ୍ୟକାରୀ କରିବାକୁ ଭାରତ ସରକାର ବିଭିନ୍ନ କାର୍ଯ୍ୟକ୍ରମ ଆୟୋଜନ କରୁଛନ୍ତି । ଏ ନେଇ ଆଜି (ସୋମବାର) ଶିକ୍ଷା ଓ ଦକ୍ଷତା କ୍ଷେତ୍ରରେ ଆୟୋଜିତ ୱେବିନାରରେ ଯୋଗ ଦେଇ ଏହି ମତାମତ ଦେଇଛନ୍ତି ପ୍ରଧାନମନ୍ତ୍ରୀ ।
ବଜେଟ ପରବର୍ତ୍ତୀ ସେମିନାରକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି, ଆମ ଯୁବ ଗୋଷ୍ଠୀ ଭବିଷ୍ୟତର ଜଣେ ଜଣେ ନେତା । ଆଜିର ଯୁବପିଢୀଙ୍କୁ ସଶକ୍ତ କରିବା ମାନେ ଦେଶର ଭବିଷ୍ୟତକୁ ସଶକ୍ତ କରିବା । ଶିକ୍ଷା କ୍ଷେତ୍ରରେ ବଜେଟ ୨୦୨୨ରେ ୫ଟି ଜିନିଷ ଉପରେ ଗୁଗୁତ୍ବ ଦିଆଯାଇଛି । ପ୍ରଥମ ବିଶ୍ବସ୍ତରୀୟ ସମାନତା ଶିକ୍ଷାର ବିସ୍ତାର ହେବା ଦରକାର । ଶିକ୍ଷା ବ୍ୟବସ୍ଥାକୁ ସମ୍ପ୍ରସାରଣ କରିବା, ଶିକ୍ଷାର ଗୁଣାତ୍ମକ ବିକାଶ ଦିଗରେ ଏହି ବଜେଟ ପ୍ରସ୍ତୁତ ହୋଇଛି ।
ଦ୍ବିତୀୟରେ ଦକ୍ଷତା ବିକାଶରେ ଗୁରୁତ୍ବ ଦେଇଛନ୍ତି ପ୍ରଧାନମନ୍ତ୍ରୀ । ଦେଶରେ ଏକ ଡିଜିଟାଲ ଦକ୍ଷତା ବିକାଶର ଇକୋ ସିଷ୍ଟମ ତିଆରି ହେବ । ଶିଳ୍ପର ଚାହିଦା ଅନୁସାରେ ଦକ୍ଷତାର ବିକାଶ, ଶିଳ୍ପ ଲିଙ୍କେଜ କିପରି ସୃଦୁଢ ହେବ ସେ ଦିଗରେ ଗୁରୁତ୍ବ ଦିଆଯାଇଛି ବୋଲି କହିଛନ୍ତି ପ୍ରଧାନମନ୍ତ୍ରୀ ।