ଥିରୁଅନନ୍ତପୁରମ/ବେଙ୍ଗାଲୁରୁ:ଦୁଇ ଦିନିଆ କେରଳ ଓ କର୍ଣ୍ଣାଟକ ଗସ୍ତରେ ଯାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି (pm modi in kerala)। ପ୍ରଧାନମନ୍ତ୍ରୀ ଗୁରୁବାର କେରଳରେ ପହଞ୍ଚିଥିବା ବେଳେ ଏକାଧିକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ଆଜି ସେ କୋଚିରେ ଭାରତୀୟ ନୌସେନା ପାଇଁ ନିର୍ମିତ ବିମାନବାହକ ଜାହାଜ INS ବିକ୍ରାନ୍ତକୁ ନୌସେନାରେ ସାମିଲ କରାଇବେ । ଆଜି ଏହି କାର୍ଯ୍ୟକ୍ରମ ପରେ ସେ କର୍ଣ୍ଣାଟକର ମାଙ୍ଗାଲୋରରେ ପହଞ୍ଚିବେ (PM in Mangaluru on Friday to inaugurate and lay foundation)। ସେଠାରେ ମଧ୍ୟ ସେ ଏକାଧିକ ପ୍ରକଳ୍ପର ଶୁଭାରମ୍ଭ ସହ ଅନ୍ୟ କିଛି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବାର କାର୍ଯ୍ୟକ୍ରମ ରହିଛି ।
ଗତକାଲି(ଗୁରୁବାର) ପ୍ରଧାନମନ୍ତ୍ରୀ କେରଳରେ ପହଞ୍ଚିବା ପରେ ତାଙ୍କୁ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ଦ୍ବାରା ଭବ୍ୟ ସ୍ବାଗତ କରାଯାଇଥିଲା । ବିମାନ ବନ୍ଦରରୁ ସଭାସ୍ଥଳକୁ ଯିବା ବେଳେ ପ୍ରବଳ ବର୍ଷା ସତ୍ତ୍ବେ ମଧ୍ୟ ଲୋକଙ୍କ ମଧ୍ୟରେ ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ ବେଶ ଉତ୍ସାହ ଦେଖିବାକୁ ମିଳିଥିଲା । କେରଳରେ ଏକାଧିକ ପ୍ରକଳ୍ପର ଭିତ୍ତିପ୍ରସ୍ତର ଓ ଉଦଘାଟନ କରିବା ଅବସରରେ ପ୍ରଧାନମନ୍ତ୍ରୀ କହିଥିଲେ, ‘ଦେଶରେ ଅତ୍ୟାଧୁନିକ ଭିତ୍ତିଭୂମି ପ୍ରତିଷ୍ଠା କରିବାକୁ ହେଲେ ସମଗ୍ର ଦେଶବାସୀଙ୍କୁ ମୌଳିକ ସୁବିଧା ଯୋଗାଇବା ନିହାତି ଆବଶ୍ୟକ । ତାଙ୍କ ସରକାର ଏ ଦିଗରେ ନିରବଚ୍ଛିନ୍ନ ଭାବେ କାର୍ଯ୍ୟ ଜାରି ରଖିଛି । ’