ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସୁପ୍ରିମକୋର୍ଟଙ୍କ କ୍ଲିନଚିଟ । ଗୁଜରାଟ ଦଙ୍ଗା(Gujarat Riots) ମାମଲାକୁ ନେଇ ଆସିଥିବା ସମସ୍ତ ଅଭିଯୋଗକୁ ଖଣ୍ଡନ କରି କ୍ଲିନଚିଟ ରାୟକୁ କାଏମ ରଖିଛନ୍ତି ସୁପ୍ରିମକୋର୍ଟ । ସୁପ୍ରିମକୋର୍ଟ(SupremCourt) ରାୟ ପରେ ପୁରା ଘଟଣାକୁ ନେଇ ମୁହଁ ଖୋଲିଛନ୍ତି କେନ୍ଦ୍ର ଗୃହମନ୍ତ୍ରୀ ମନ୍ତ୍ରୀ ଅମିତ ଶାହ (Amit Shah) । ସମ୍ବାଦ ସରାବହ ସଂସ୍ଥା ANIକୁ ସାକ୍ଷାତକାର ଦେଇ ଶାହ କହିଛନ୍ତି ପ୍ରଧାନମନ୍ତ୍ରୀ ମୋଦି 19 ବର୍ଷ ହେଲା ଭଗବାନ ଶିବଙ୍କ ପରି ବିଷ ପାନ କରିଚାଲିଛନ୍ତି । ଚୁପଚାପ ସମସ୍ତ ଅପବାଦ ନିନ୍ଦାକୁ ବିନା ଦୋଷରେ ସହିଛନ୍ତି ।
ଅତ୍ୟନ୍ତ ବାଷ୍ପରୁଦ୍ଧ କଣ୍ଠରେ ଅମିତ ଶାହ (Amit Shah) କହିଛନ୍ତି, ଦେଶର ଶକ୍ତିଶାଳୀ ନେତା ବିନା ଗୋଟିଏ ଶବ୍ଦ ଉଚ୍ଚାରଣ କରି ସମସ୍ତ ଦୁଃଖକୁ ନିଜ ମଧ୍ୟରେ ଚାପି ରଖିଛନ୍ତି । ଆଉ ବିନା ଶବ୍ଦରେ ଏକା ଲଢେଇ ଜାରି ରଖିଛନ୍ତି । ଯାହା କଳ୍ପନା କରିବା ମଧ୍ଯ ସହଜ ନୁହେଁ । ଆଉ ଆଜି ଯେତେବେଳେ ସତ୍ୟ ପ୍ରସ୍ଫୁଟିତ ହୋଇ ସାମନାକୁ ଆସିଛି ସୁନା ପରି ଚମକୁଛି । ଆଉ ଏହି ସତ୍ୟ ହିଁ ଏବେ ଆନନ୍ଦ ଅନୁଭବ ଦେଉଛି ।
ଗୃହମନ୍ତ୍ରୀ କହିଛନ୍ତି ମୁଁ ପ୍ରଧାନମନ୍ତ୍ରୀ ମୋଦିଙ୍କୁ ଅତି ନିକଟରୁ ଦେଖିଛି । ସେ କିଭଳି କଷ୍ଟ ପାଉଥିଲେ । ଯାହା ଆଉ କେହି ଅନୁଭବ କରିପାରିବେ ନାହିଁ । ସବୁକିଛି ସତ୍ୟ ଥାଇ ସୁଦ୍ଧା ଆମେ କିଛି କହିନଥିଲୁ । ସବୁ ଦୁଃଖକୁ ମୋଦି ପାନ କରିଚାଲିଥିଲେ । ଜଣେ ମଜବୁତ ଶକ୍ତିଶାଳୀ ରାଜନେତା ହିଁ ଏହି ପରିସ୍ଥିତିରେ ନିଜକୁ ସଠିକ ମାର୍ଗରେ ନେଇପାରିବ । ଶାହ ଆହୁରି କହିଛନ୍ତି ନ୍ୟାୟିକ ପ୍ରକ୍ରିୟାରେ ସମସ୍ୟା ନଆସୁ, ସେଥିପାଇଁ ଆମେ ସବୁ କିଛି ଜାଣିଥିଲେ ମଧ୍ୟ ଚୁପ ରହିଥିଲୁ ।
ମୋଦିଙ୍କୁ ପ୍ରଶଂସା କରିବାକୁ ଯାଇ ଶାହ କହିଛନ୍ତି, ‘ସେତେବେଳେ ଘଟଣାକୁ ନେଇ ଏସଆଇଟି ମୁଖ୍ୟମନ୍ତ୍ରୀ ଥିବା ନରେନ୍ଦ୍ର ମୋଦି(Narendra Modi )ଙ୍କୁ ଜେରା କରିଥିଲା । ମୋଦି ପୁରା ସହଯୋଗ କରିଥିଲେ । ଏହି ମାମଲାରେ ତାଙ୍କର(ଅମିତ ଶାହ ) ମଧ୍ୟ ଗିରଫ ହୋଇଥିଲା । ହେଲେ କୌଣସି ପ୍ରତିବାଦ କରିନଥିଲେ । କୌଣସି ଦଳୀୟ ବିଧାୟକ, ସାଂସଦ କିମ୍ବା ପଦାଧିକାରୀଙ୍କୁ କହିନଥିଲେ ପ୍ରତିବାଦ କରିବାକୁ । ଦଳୀୟ କର୍ମୀ ଆସିନଥିଲେ ରାସ୍ତାକୁ । ଆଇନକୁ କୋର୍ଟକୁ ପୁରା ସମ୍ମାନ ଦେଇଥିଲେ ମୋଦି । ଘଣ୍ଟା ଘଣ୍ଟା ଧରି ଜେରାର ସମ୍ମୁଖିନ ହୋଇଥିଲେ । ଯେଉଁମାନେ ଅଭିଯୋଗ ଆଣିଥିଲେ ତାଙ୍କର ଯଦି ମାନବିକତା ଅଛି କ୍ଷମା ମାଗନ୍ତୁ । କାରଣ ପ୍ରଧାନମନ୍ତ୍ରୀଙ୍କ ପରି ଜଣେ ବିଶ୍ବନେତାଙ୍କୁ ବିରୋଧ କରିବା ପାଇଁ ଯେଉଁ ମିଛ ଅଭିଯୋଗ ଅଣାଯାଇଥିଲା ତାହା ଆଜି ବିଫଳ ହୋଇଛି । ଲୋକତନ୍ତ୍ରରେ କିଭଳି ସମ୍ବିଧାନକୁ ସମ୍ମାନ ଦିଆଯାଏ, ତାହା ମୋଦି କରି ଦେଖାଇଛନ୍ତି ବୋଲି ଶାହ କହିଛନ୍ତି ।
ବର୍ତ୍ତମାନ ନ୍ୟାସନାଲ ହେରାଲ୍ଡ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଜେରାର ସମ୍ମୁଖୀନ ହେଉଥିବା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ କଡା ପ୍ରହାର କରି ଶାହ କହିଛନ୍ତି ଆଜି କାହିଁକି କଂଗ୍ରେସ ଧାରଣ ପ୍ରତିବାଦ ଆନ୍ଦୋଳନ କରୁଛି ? ଯଦି ଦୁର୍ନୀତି କରିନାହାଁନ୍ତି ବିନା ଶକ୍ତି ପ୍ରଦର୍ଶନରେ ଆଇନର ସାମନା କରନ୍ତୁ । ସତ୍ୟ ଦିନେ ସାମନାକୁ ଆସିବ ।
