ନୂଆଦିଲ୍ଲୀ:ବାରମ୍ବାର ଯାନ୍ତ୍ରିକ ତ୍ରୁଟି କାରଣରୁ ବିବାଦରେ ସ୍ପାଇସଜେଟ ଏୟାର ଲାଇନ୍ସ । ଏୟାର ଲାଇନ୍ସର ଉଡାଣ ଅନୁମତିକୁ ରଦ୍ଦ କରିବା ପାଇଁ ଦିଲ୍ଲୀ ହାଇକୋର୍ଟରେ ଜନସ୍ବାର୍ଥ ମାମଲା ଦାଏର ହୋଇଛି । ନିକଟ ଅତୀତରେ ଏକାଧିକ ଉଡାଣରେ ଯାନ୍ତ୍ରିକ ତ୍ରୁଟି ଦେଖାଯିବା ପରେ ଯାତ୍ରୀଙ୍କ ସୁରକ୍ଷା କାରଣରୁ କମ୍ପାନୀର ଉଡାଣ ବନ୍ଦ କରିବାକୁ କେନ୍ଦ୍ରକୁ ନିର୍ଦ୍ଦେଶ ଦେବାକୁ ଜନସ୍ବାର୍ଥ ମାମଲାରେ ଦର୍ଶାଇଛନ୍ତି ଆବେଦନକାରୀ ।
ରାହୁଲ ଭରଦ୍ବାଜ ନାମକ ଜଣେ ବ୍ୟକ୍ତି ଓ ତାଙ୍କର 4 ବର୍ଷର ପୁଅ ଏହି ଜନସ୍ବାର୍ଥ ମାମଲାର ଆବେଦନକାରୀ ଭାବେ ରହିଛନ୍ତି । ତେବେ ଯାତ୍ରା ବେଳେ ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇଥିବା ଯାତ୍ରୀଙ୍କୁ କ୍ଷତିପୂରଣ ବାବଦକୁ ସେମାନଙ୍କ ଯାତ୍ରାର ଟିକେଟ ମୂଲ୍ୟ ମଧ୍ୟ ରିଫଣ୍ଡ କରିବାକୁ ଆବେଦନରେ ଉଲ୍ଲେଖ କରାଯାଇଛି । ବିମାନ କମ୍ପାନୀ ସୁରକ୍ଷା ସମ୍ପର୍କିତ ସମସ୍ତ ଗାଇଡଲାଇନ ଅନୁସରଣ କରୁନାହିଁ । ଫଳରେ ଏପରି ଏକାଧିକ ଅଭାବନୀୟ ଘଟଣା ଘଟୁଛି ବୋଲି ଆବେଦନକାରୀ ଯୁକ୍ତି ବାଢିଛନ୍ତି ।