ଲାହୋର: ଅନାରକଲୀ ବଜାର ଲାହାରୀ ଗେଟ ଏରିଆ ନିକଟରେ ଏକ ଜୋରଦାର ବିସ୍ଫୋରଣ ହୋଇଛି । ଏଥିରେ ଦୁଇଜଣଙ୍କ ପ୍ରାଣହାନୀ ହୋଇଥିବା ବେଳେ ୨୨ରୁ ଅଧିକ ଗୁରୁତର ଭାବରେ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଜଣେ ଛୋଟଛୁଆ ସାମିଲ ରହିଛି ।
ବିସ୍ଫୋରଣ ଏତେ ଜୋରଦାର ଥିଲା ଯେ ପାଖରେ ଥିବା ଦୋକାନ ଓ ଘର ଗୁ଼ଡ଼ିକ ଝରକା ଭାଙ୍ଗି ଯାଇଥିବା ଦେଖିବାକୁ ମିଳିଛି । ପାଖରେ ଥିବା କେତେକ ବାଇକ ମଧ୍ୟ ସମ୍ପୂର୍ଣ୍ଣ ଭାବରେ ଜଳି ପୋଡ଼ି ପାଉଁଶ ହୋଇଯାଇଛି । ସ୍ଥାନୀୟ ପୋଲିସର ସୂଚନା ଅନୁଯାୟୀ ଲାହୋରୀ ଗେଟ୍ ବଜାର ନକିଟରେ ବିସ୍ଫୋରଣ ଯୋଗୁଁ ଏକ ୧.୫ଫୁଟ୍ର ଏକ ବଡ଼ ଗର୍ତ୍ତ ସୃଷ୍ଟି ହୋଇଛି ।
ଆହତ ହୋଇଥିବା ବ୍ୟକ୍ତିବିଶେଷଙ୍କୁ ମାୟୋ ହସ୍ପିଟାଲ୍ରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ନେଇ ହସ୍ପିଟାଲ କର୍ତ୍ତୃପକ୍ଷ ସୂଚନା ଦେଇଛନ୍ତି । ସେମାନଙ୍କ ଜୀବନ ବଞ୍ଚାଇବା ପାଇଁ ଡାକ୍ତରମାନେ ଆପ୍ରାଣ ଚେଷ୍ଟା ଜାରି ରଖିଛନ୍ତି । ଅନ୍ୟ ଆହତ ବ୍ୟକ୍ତିବିଶେଷଙ୍କୁ ପ୍ରାଥମିକ ଚିକିତ୍ସା ସୁବିଧା ଯୋଗାଇ ଦିଆଯାଇଛି ।
ଲହୋରର ଅନାରକଲୀ ବଜାର ଏକ ବ୍ୟସ୍ତବହୁଳ ସ୍ଥାନ । ଏଠାରେ ପ୍ରତିଦିନ ହଜାର ହଜାର ଗ୍ରାହକଙ୍କ ଭିଡ଼ ଜମିଥାଏ । ଏଠାରେ ବହୁ ଛୋଟବଡ଼ ବ୍ୟବସାୟୀଙ୍କୁ ରୋଜାଗାର ବାଟ ମିଳିଥାଏ । ତେବେ ଏଭଳି ସ୍ଥାନରେ କିଏ ଆଉ କାହିଁକି ବିସ୍ଫୋରଣ ଘଟାଇଲା ତାହାର ତଦନ୍ତ ଜାରି ରହିଛି । ଏହାକୁ ନେଇ ସ୍ଥାନୀୟ ପୋଲିସ ସୂଚନା ଦେଇଛି ।
@ani