ପାଟନା: ବିହାରରେ ପଶୁପତି ପାରଶଙ୍କ ନେତୃତ୍ବାଧୀନ RLJP ର ଜଣେ ନେତାଙ୍କୁ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ । ଗୟା ଜିଲ୍ଲାର ଆମସରେ RLJP ନେତା ଅନୱାର ଅଲ୍ଲୀ ଖାନଙ୍କୁ ଗୁଳି କରି ହତ୍ୟା କରାଯାଇଛି । ଆଜି (ବୁଧବାର) ସକାଳେ ଅନଓ୍ବାର ସ୍ଥାନୀୟ ଏକ ସେଲୁନ ଦୋକାନରେ ବସିଥିବା ବେଳେ ଏକାଧିକ ଦୁର୍ବୃତ୍ତ ବାଇକରେ ଆସି ତାଙ୍କୁ ଗୁଳି ଚଳାଇଥିଲେ । ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ହତ୍ୟାକାଣ୍ଡ ସମ୍ପର୍କରେ ଜଣାପଡିବା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ସ୍ଥାନୀୟ ଲୋକେ ଏକାଠି ହୋଇ ହତ୍ୟାକାରୀକୁ ତୁରନ୍ତ ଗିରଫ କରିବା ପାଇଁ ଦାବିରେ ରାସ୍ତା ଅବରୋଧ କରିଥିଲେ । ପୋଲିସ ପହଞ୍ଚି ରାସ୍ତା ଅବରୋଧ ହଟାଇବା ସହ ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ, ଏହି ହତ୍ୟାକାଣ୍ଡ ଗାୟାର ଆମାସ୍ ପୋଲିସ୍ ଷ୍ଟେସନ ଅଞ୍ଚଳରେ ଘଟିଛି । ସ୍ଥାନୀୟ ସିହୁଲି ଗ୍ରାମର ଠିକାଦାର ତଥା ଆରଏଲଜେପି ନେତା ଅନୱାର ଅଲ୍ଲୀ ଖାନ ଆଜି (ବୁଧବାର) ଗାମରିଆ ମୋଡରେ ଥିବା ଏକ ସେଲୁନ ଦୋକାନକୁ ଯାଇଥିଲେ । ସେ ସେଠାରେ ବସିଥିବା ବେଳେ ଗୋଟିଏ ବାଇକରେ ଆସିଥିବା ତିନିଜଣ ଅପରାଧୀ ତାଙ୍କୁ ଅତର୍କିତ ଗୁଳିମାଡ କରିଥିଲେ । ଏକାଧିକ ରାଉଣ୍ଡ ଗୁଳି ଅନଓ୍ବାରଙ୍କ ଶରୀରରେ ବାଜିଥିଲା । ସେ ସେହିଠାରେ ହିଁ ଟଳିପଡିଥିଲେ । ଗୁଳିମାଡ ହେବା ପରେ ଉକ୍ତ ମାର୍କେଟରେ ଭୟର ବାତାବରଣ ସୃଷ୍ଟି ହୋଇଥିଲା । ଏହାରି ମଧ୍ୟରେ ଦୁର୍ବୃତ୍ତମାନେ ଫେରାର ହୋଇଯିବାରେ ସଫଳ ହୋଇଛନ୍ତି । ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ, ଗୋଟିଏ ବାଇକରେ ପ୍ରାୟ 3 ଜଣ ଦୁର୍ବୃତ୍ତ ଆସି ଏହି ଗୁଳିମାଡ କରିଥିଲେ ।