ନୂଆଦିଲ୍ଲୀ: ଆଦି ବିଭାଜନ ବିଭୀଷିକା ସ୍ମୃତି ଦିବସ । ୧୯୪୭ ମସିହା ଆଜିର ଦିନରେ ଅର୍ଥାତ୍ ଅଗଷ୍ଟ ୧୪ ତାରିଖରେ ଭାରତ-ପାକିସ୍ତାନ ବିଭାଜନ ହୋଇଥିଲା । ଅଗଷ୍ଟ ୧୪କୁ ସ୍ବାଧୀନତା ଦିବସ ଭାବେ ପାଳନ କରାଯାଏ । ଏ ଦିନରେ ବିଭାଜନ ବେଦନାକୁ ମନେ ପକାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଟ୍ବିଟ କରି ସେହି କଳା ଦିନକୁ ମନେ ପକାଇବା ସହ ବିଭାଜନର ଦୁର୍ଦ୍ଦଶା ଭୋଗିଥିବା ସମସ୍ତଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ପ୍ରଧାନମନ୍ତ୍ରୀ ।
ଟ୍ବିଟ କରି ପ୍ରଧାନମନ୍ତ୍ରୀ କହିଛନ୍ତି,'' ବିଭାଜନ ବିଭୀଷିକା ସ୍ମୃତି ଦିବସ ସେହି ଭାରତବାସୀଙ୍କୁ ଶ୍ରଦ୍ଧାପୂର୍ବକ ସ୍ମରଣ କରିବାର ଦିନଟିଏ ଯେଉଁମାନଙ୍କ ଜୀବନ ଦେଶ ବିଭାଜନରେ ବଳି ପଡିଥିଲା । ଏହା ସହିତ ଏହି ଦିନରେ ସେହି ଲୋକଙ୍କ କଷ୍ଟ ଏବଂ ସଂଘର୍ଷକୁ ମନେ ପକାଇବା ପାଇଁ ପାଳନ ହୋଇଥାଏ । ସମସ୍ତ ପୀଡିତଙ୍କୁ ମୋର ଶତ ଶତ ପ୍ରଣାମ ।'' 2021ରେ ଅଗଷ୍ଟ 14 ତାରିଖକୁ ବିଭାଜନ ବିଭୀଷିକା ସ୍ମୃତି ଦିବସ ଭାବେ ପାଳନ କରିବାକୁ ଘୋଷଣା କରିଥିଲେ ।
ଅନ୍ୟପଟେ ବିଭାଜନ ବିଭୀଷିକା ସ୍ମୃତି ଦିବସରେ ବିଜେପି ପକ୍ଷରୁ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ ହୋଇଛି । କର୍ମଶାଳା ସମେତ ପ୍ରଦର୍ଶନୀ କରାଯାଇଛି । ଉତ୍ତରପ୍ରଦେଶ ବିଜେପି ସାଧାରଣ ସଚିବ ସୁଭାଷ ୟାଦୁଭାଶଂଙ୍କ ସୂଚନା ଅନୁସାରେ ବିଜେପି ନେତା 'ବିଭୀଷିକା ସ୍ମୃତି ଦିବସ' ନାମରେ ନୀରବ ଶୋଭାଯାତ୍ରା କରିବେ । 98ଟି ଜିଲ୍ଲାରେ ଏହି ଶୋଭାଯାତ୍ରା ହେବ । ସଂଘର୍ଷ ଓ ବଳିଦାନ ଦେଇଥିବା ଲକ୍ଷ ଲକ୍ଷ ଭାଇଭଉଣୀଙ୍କ ଯିଏ ବିଭାଜନରେ ଜୀବନ ହରାଇଥିଲେ ସେମାନଙ୍କ ପାଇଁ ଏହା ଏକ ଶ୍ରଦ୍ଧାଞ୍ଜଳି ହେବ ।