ଚଳନ୍ତା କାରରେ ମହିଳାଙ୍କୁ ଅସଦାଚରଣ ଘଟଣା, ଡ୍ରାଇଭର ଗିରଫ

ମହାରାଷ୍ଟ୍ରରେ ପାଲଘର ଜିଲ୍ଲାରେ କାର ମଧ୍ୟରେ ମହିଳାଙ୍କୁ ଅସଦାଚରଣ ଘଟଣା । ଜଣେ ଅଭିଯୁକ୍ତକୁ ଗିରଫ କଲା ମାଣ୍ଡଭି ପୋଲିସ । ଅଧିକ ପଢନ୍ତୁ

ମୁମ୍ବାଇ: ଚଳନ୍ତା କାରରେ ମହିଳାଙ୍କୁ ଅସଦାଚରଣ ପରେ ୧୦ ମାସର ଶିଶୁକନ୍ୟାକୁ ଗାଡିରୁ ଫିଙ୍ଗିଦେଲା ଜହ୍ଲାଦ । ମହାରାଷ୍ଟ୍ର ପାଲଘର ଜିଲ୍ଲାରେ ଏହି ଘଟଣା ଘଟିଥିବା ବେଳେ ଜଣଙ୍କୁ ଗିରଫ କଲା ପୋଲିସ । ଗିରଫ ବ୍ୟକ୍ତି ଜଣଙ୍କ ହେଉଛନ୍ତି ଡ୍ରାଇଭର ବିଜୟ କୁଶଓ୍ବାହା ବୋଲି ଜଣାପଡିଛି । ପାଲଘର ମାଣ୍ଡଭି ପୋଲିସ ଅଭିଯୁକ୍ତକୁ ଗିରଫ କରିବା ସୂଚନା ମିଳିଛି ।

ଏନେଇ ଜଣେ ପୋଲିସ ଅଧିକାରୀ କହିଛନ୍ତି ଯେ, ''ମହିଳା ଜଣଙ୍କ ଗାଡିରୁ ପଡିଯାଇଥିବା ବେଳେ ସେ ଆହତ ହୋଇଛନ୍ତି । ଏହି ଘଟଣା ନେଇ ମହିଳା ଜଣଙ୍କ ଥାନାରେ ଅଭିଯୋଗ କରିବା ପରେ ତଦନ୍ତ ଆରମ୍ଭ ହୋଇଥିଲା । ଏହାପରେ ମାଣ୍ଡଭି ପୋଲିସ ଷ୍ଟେସନରେ ଆଇପିସି ଧାରା 304 ଏବଂ 354ରେ ଏକ ମାମଲା ରୁଜୁ କରି ଅଭିଯୁକ୍ତ ଡ୍ରାଇଭରକୁ ଗିରଫ କରାଯାଇଛି । ଶିଶୁ କନ୍ୟାଟିକୁ ଗାଡି ବାହାରକୁ ଫୋପାଡି ଦେଇଥିବା ତାର ମୃତ୍ୟୁ ହୋଇଥିବା ବେଳେ ମହିଳା ଜଣଙ୍କ ବର୍ତ୍ତମାନ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ରହିଛନ୍ତି'' ।

ମିଳିଥିବା ସୂଚନା ଅନୁଯାୟୀ, ଶନିବାର ସକାଳ ସମୟରେ ପାଲଘର ଅଞ୍ଚଳର ଜଣେ ମହିଳା ନିଜର ୧୦ ମାସର ଶିଶୁକନ୍ୟାକୁ ନେଇ ପେଲହରରୁ ପୋଶେରକୁ କ୍ୟାବ୍ ଯୋଗେ ଫେରୁଥିଲେ । ବାଟରେ ଆଉ କିଛି ଯାତ୍ରୀ ସେହି କ୍ୟାବ୍‌ରେ ବସିଥିଲେ । କିଛି ବାଟ ଗଲା ପରେ କ୍ୟାବ୍ ଡ୍ରାଇଭର ସମେତ ବସିଥିବା ଅନ୍ୟ ଯାତ୍ରୀମାନେ ମହିଳାଙ୍କ ସହ ଅସଦାଚରଣ କରିବା ଆରମ୍ଭ କରିଥିଲେ । ଏହାକୁ ମହିଳା ପ୍ରତିବାଦ କରିବାରୁ ମୁମ୍ବାଇ-ଅହମ୍ମଦାବାଦ ଜାତୀୟ ରାଜପଥ ନିକଟରେ ସେମାନେ ତାଙ୍କର ଝିଅକୁ ଛଡେଇ ନେଇ ଚଳନ୍ତା ଗାଡିରୁ ବାହାରକୁ ଫିଙ୍ଗି ଦେଇଥିଲେ । ଯାହାଫଳରେ ଶିଶୁଟିର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଏହାପରେ ମହିଳା ଜଣଙ୍କୁ ମଧ୍ୟ ଗାଡି ବାହାରକୁ ଠେଲି ଦିଆଯାଇଥିଲା ।