ଇସଲାମାବାଦ:ଲାଗି ରହିଥିବା ରାଜନୈତିକ ସଙ୍କଟ ମଧ୍ୟରେ ଆଜି ଦେଶକୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ଇମ୍ରାନ ଖାନ । ଗତକାଲି ତାଙ୍କର ସମ୍ବୋଧନ କାର୍ଯ୍ୟକ୍ରମ ବାତିଲ କରାଯାଇଥିବାବେଳେ ଏହା ପୁଣି ଥରେ ହେବା ନେଇ ସ୍ଥିର କରାଯାଇଛି । ପାକିସ୍ତାନର ସୂଚନା ଓ ପ୍ରସାରଣ ମନ୍ତ୍ରୀ ଇମ୍ରାନଙ୍କ ସମ୍ବୋଧନ ନେଇ ଟ୍ବିଟ କରି ସୂଚନା ଦେଇଛନ୍ତି ।
କ୍ଷମତା ବଜାୟ ରଖିବା ପାଇଁ ସମସ୍ତ କାର୍ଡ ଖେଳି ମଧ୍ୟ ବିଫଳ ହେବାକୁ ନଜର ଆସୁଥିବା ଇମ୍ରାନ ଏବେ ତାଙ୍କୁ ଗାଦିରୁ ହଟାଇବା ନେଇ ବିଦେଶୀ ଷଡଯନ୍ତ୍ର ହୋଇଥିବା ଅଭିଯୋଗ ଆଣିଛନ୍ତି । ଇମ୍ରାନ କ୍ୟାବିନେଟ ସହଯୋଗୀ, ବରିଷ୍ଠ ସାମ୍ବାଦିକ ଓ ଗଣମାଧ୍ୟକୁ ଅବଗତ କରି କହିଛନ୍ତି ଯେ, ତାଙ୍କୁ କ୍ଷମତାରୁ ହଟାଇବା ନେଇ ବିଦେଶରୁ ଷଡଯନ୍ତ୍ର ଜାରିରହିଛି । ଏହା ଦର୍ଶାଇ ସେ କୋର୍ଟରେ ମଧ୍ୟ ଦ୍ବାରସ୍ଥ ହୋଇଥିବା ଜଣାପଡିଛି ।
ଆଜି ସେ ସୁରକ୍ଷା କମିଟି ବୈଠକ ଡାକିଥିଲେ ସୁଦ୍ଧା ବିରୋଧୀଙ୍କ ପକ୍ଷରୁ ଏହାକୁ ବର୍ଜନ କରାଯିବା ନେଇ ମଧ୍ୟ ସ୍ପଷ୍ଟ କରାଯାଇଛି । ଏପରି ସମୟରେ ବେସ ଏକୁଟିଆ ନଜର ଆସୁୁଥିବା ଇମ୍ରାନ ସଂସଦ ଭଙ୍ଗ କରିବା ପାଇଁ ପ୍ରକ୍ରିୟା ଆରମ୍ଭ କରିବାକୁ ଚାହୁଁଥିବା କଥା ମଧ୍ୟ ସାମ୍ନାକୁ ଆସିଛି । ସଂସଦ ଭଙ୍ଗ ହେଲେ ସାରା ଦେଶରେ ପୁୁଣି ଥରେ ସାଧାରଣ ନିର୍ବାଚନ ହେବାର ସାମ୍ବିଧାନିକ ବିଧି ରହିଥିବାବେଳେ ବିରୋଧୀ ଏପରି କରିବାକୁ ଦେବେ ନାହିଁ ।