ଚଣ୍ଡୀଗଡ:ସମାଜସେବୀ ପଦ୍ମଶ୍ରୀ ବାବା ଇକବାଲ ସିଂହଙ୍କ ପରଲୋକ(Padma Shri Baba Iqbal Singh passed away) । ୯୫ ବର୍ଷ ବୟସରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ଗତ ଏକ ମାସ ଧରି ଅସୁସ୍ଥତା କାରଣରୁ ବାବା ଇକବାଲ ସିଂହ ପଞ୍ଜାବର ଏକ ଘରୋଇ ମେଡିକାଲରେ ଚିକିତ୍ସାଧୀନ ଥିଲେ । ଶନିବାର ତାଙ୍କର ମୃତ୍ୟୁ ଘଟିଛି ।
୧୯୨୬ ମସିହା ମେ ୧ ତାରିଖରେ ପଞ୍ଜାବର ଗୁରୁଦାସପୁର ଅଞ୍ଚଳରେ ଇକବାଲ ସିଂହଙ୍କ ଜନ୍ମ । ସେ ପାକିସ୍ତାନର ଫୈସଲାବାଦ ସ୍ଥିତ କୃଷି ବିଶ୍ବବିଦ୍ୟାଳୟରେ ଅଧ୍ୟୟନ କରିଥିଲେ । ପରେ ହିମାଚଳ ପ୍ରଦେଶର କୃଷି ବିଭାଗରେ ସିଭିଲ ସରଭ୍ୟାଣ୍ଟ ଭାବେ ନିଜ କ୍ୟାରିୟର ଆରମ୍ଭ କରିଥିଲେ । ୧୯୮୬ ମସିହାରେ ଚାକିରିରୁ ଅବସରରେ ପରେ ଇକବାଲ ସିଂହ ହିମାଚଳ ପ୍ରଦେଶ ସିରମୋର ଜିଲ୍ଲାର ବାରୁ ସାହିବ(Baru Sahib) ଚାଲି ଯାଇଥିଲେ ଏବଂ ସେଠାରେ ଅକାଳ ଏକାଡେମୀ(Akal Academy) ଆରମ୍ଭ କରିଥିଲେ ।
ହିମାଚଳ ପ୍ରଦେଶ, ପଞ୍ଜାବ ହରିୟାଣା, ଉତ୍ତରପ୍ରଦେଶ ଏବଂ ରାଜସ୍ଥାନର ବିଭିନ୍ନ ଗ୍ରାମୀଣ ଅଞ୍ଚଳରେ ୧୨୯ଟି ଲୋ କଷ୍ଟ୍ ( low-cost) ସ୍କୁଲ ଏବଂ ଦୁଇଟି ଘରୋଇ ବିଶ୍ବବିଦ୍ୟାଳୟ ପ୍ରତିଷ୍ଠା କରିଛନ୍ତି ଇକବାଲ ସିଂହ । ବାବା ଇକବାଲ ସିଂହଙ୍କ ବିୟୋଗରେ ପ୍ରଧାନମନ୍ତ୍ରୀଙ୍କ ସମେତ ରାଷ୍ଟ୍ରପତି ଏବଂ କେନ୍ଦ୍ରମନ୍ତ୍ରୀମାନେ ଶୋକ ପ୍ରକାଶ କରିଛନ୍ତି ।