ନୂଆଦିଲ୍ଲୀ: ଆଜି ପାଇଁ ପୁଣି ମୁଲତବୀ ରହିଲା ରାଜ୍ୟସଭା । ସାଂସଦଙ୍କ ନିଲମ୍ବନ ନିର୍ଦ୍ଦେଶ ପ୍ରତ୍ୟାହାର ନେଇ ଗୃହରେ ବିରୋଧୀଙ୍କ ହଟ୍ଟଗୋଳ (Opposition MPs protest against suspension) ଯୋଗୁ ଉପରାଷ୍ଟ୍ରପତି ଭେଙ୍କେୟା ନାଇଡୁ ଗୃହକୁ ମୁଲତବୀ ଘୋଷଣା କରିଛନ୍ତି ।
ଆଜି (ବୁଧବାର) ନିଲମ୍ବିତ ସାଂସଦମାନେ ସଂସଦ ଭବନ ପରିସରେ ଥିବା ଗାନ୍ଧୀମୂର୍ତ୍ତି ତଳେ ଧାରଣାରେ ବସିବା ସହ ହାତରେ ପ୍ଲାକକାର୍ଡ ଧରି ପ୍ରତିବାଦ କରିଥିଲେ । ନିଲମ୍ବନ ଆଦେଶ ପ୍ରତ୍ୟାହାର କରିବାକୁ ସାଂସଦମାନେ ଦାବି କରିଆସୁଥିବାବେଳେ ଉପରାଷ୍ଟ୍ରପତି ଏହି ଆଦେଶକୁ ପ୍ରତ୍ୟାହାର କରିବା ସପକ୍ଷରେ ନଥିବା ଦେଖିବାକୁ ମିଳିଛି ।
ବିରୋଧୀଦଳର ସଦସ୍ୟମାନେ 12 ସାଂସଦଙ୍କ ନିଲମ୍ବନକୁ ନେଇ ଗୃହରେ ବିରୋଧ ପ୍ରଦର୍ଶନ ଜାରି ରଖିଥିବାରୁ ଆଲୋଚନାରେ ବାଧା ସୃଷ୍ଟି ହୋଇଥିଲା । ରାଜ୍ୟସଭା ଆରମ୍ଭ ହେବା ପରେ ଦୁଇଥର ସ୍ଥଗିତ ରଖାଯାଇଥିଲା । ସଦସ୍ୟମାନଙ୍କ ନିଲମ୍ବନ ନେଇ ବିରୋଧୀ ଦଳ ନେତା ମଲ୍ଲିକାର୍ଜୁନ ଖାଡଗେଙ୍କୁ କହିବାକୁ ସୁଯୋଗ ଦିଆଯାଉ ବୋଲି ଦାବି କରିଥିଲେ ବିରୋଧୀ । ତେବେ ମଲ୍ଲିକାର୍ଜୁଲଙ୍କୁ ସୁଯୋଗ ଦେବା ପରିବର୍ତ୍ତେ ଜଳଶକ୍ତି ମନ୍ତ୍ରୀ ଡ୍ୟାମ ସୁରକ୍ଷା ବିଲକୁ ଗୃହରେ ଆଗତ କରିଥିଲେ ଯାହାକୁ ନେଇ ବିରୋଧୀ ସାଂସଦମାନେ ନାରାବାଜୀ ସହ ହଟ୍ଟଗୋଳ କରିଥିଲେ । ପରେ ଗୃହକୁ ଆଜି ପାଇଁ ମୁଲତବୀ ଘୋଷଣା କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ